IPL 2023ની છેલ્લી લીગ મેચમાં રોયલ ચેલેન્જર્સ બેંગ્લોરનો સામનો ગુજરાત ટાઇટન્સ સામે થશે. પ્લેઓફમાં પહોંચવા માટે આરસીબીને આ મેચ જીતવી જરૂરી છે. બીજી તરફ, આ મેચ ગુજરાત ટાઇટન્સ માટે પ્રેક્ટિસ મેચ જેવી છે કારણ કે તે પ્લેઓફમાં પ્રવેશી ચૂકી છે. વરસાદના કારણે આ મેચ 55 મિનિટ મોડી શરૂ થઈ છે. જોકે સારી વાત એ છે કે ઓવરોમાં કોઈ કટ કરવામાં આવ્યો નથી. જો આ મેચ પૂર્ણ નહીં થાય તો મુંબઈ ઈન્ડિયન્સ પ્લેઓફમાં પહોંચી જશે. મેચમાં RCBએ ગુજરાત ટાઇટન્સને જીતવા માટે 198 રનનો ટાર્ગેટ આપ્યો છે
વરસાદ અને ભીના આઉટફિલ્ડને કારણે મેચની શરૂઆત 55 મિનિટ મોડી થઈ હતી. જોકે, આ વિલંબની આરસીબીના ઓપનર વિરાટ કોહલી અને ફાફ ડુ પ્લેસિસ પર કોઈ અસર થઈ ન હતી. બંને ખેલાડીઓએ સાથે મળીને 7.1 ઓવરમાં 67 રનની ભાગીદારી કરી હતી. નૂર અહેમદે ડુ પ્લેસિસને આઉટ કરીને આ ખતરનાક ભાગીદારીનો અંત કર્યો હતો. ડુ પ્લેસિસે 19 બોલમાં 28 રન બનાવ્યા જેમાં પાંચ ચોગ્ગા સામેલ હતા.
આ પછી આરસીબીએ પોતાની બીજી વિકેટ ગ્લેન મેક્સવેલ (11 રન)ના રૂપમાં ગુમાવી હતી, જે રાશિદ ખાનના હાથે બોલ્ડ થયો હતો. ત્યારબાદ નૂર અહેમદે મહિપાલ લોમરોર (1 રન)ને પણ વોક કરાવ્યો, જેના કારણે RCBનો સ્કોર ત્રણ વિકેટે 85 રન થઈ ગયો. અહીંથી માઈકલ બ્રેસવેલ અને વિરાટ કોહલીએ 47 રનની ભાગીદારી કરીને દાવને વેગ આપ્યો હતો. બ્રેસવેલ આઉટ થયો હતો પરંતુ કોહલી અંત સુધી ક્રિઝ પર રહ્યો હતો અને શાનદાર સદી રમી હતી. કોહલીએ 60 બોલમાં પોતાની સદી પૂરી કરી હતી, જેમાં 13 ચોગ્ગા અને એક છગ્ગાનો સમાવેશ થાય છે. કોહલીએ સતત બીજી મેચમાં સદી ફટકારી છે. આ પહેલા તેણે સનરાઇઝર્સ હૈદરાબાદ સામે પણ સદી ફટકારી હતી. કોહલીએ 61 બોલમાં 101 રન બનાવ્યા હતા. કોહલી હવે IPLમાં સૌથી વધુ સદી ફટકારનાર ખેલાડી બની ગયો છે. કોહલીએ છ સદી ફટકારનાર ક્રિસ ગેલને પાછળ છોડી દીધો છે
