New Delhi News : દેશમાં ચોમાસાની સ્થિતિ હવે બદલાતી જોવા મળી રહી છે. ભારતીય હવામાન વિભાગની નવી સેટેલાઇટ તસવીરોમાં ભારતના મોટા ભાગના વિસ્તારમાં વાદળોની હાજરીમાં નોંધપાત્ર ઘટાડો જોવા મળ્યો છે. ખાસ કરીને ઉત્તર-પશ્ચિમ અને મધ્ય ભારતના વિસ્તારોમાં આ અસર વધુ સ્પષ્ટ છે. આ સ્થિતિને કારણે હવામાન (Weather) નિષ્ણાતો ચોમાસાની ગતિ ધીમી પડવાના સંકેત તરીકે જોઈ રહ્યા છે.
જોકે દેશમાંથી ચોમાસાની સત્તાવાર વિદાય હજુ શરૂ થઈ નથી. નિષ્ણાતોના મતે વાતાવરણમાં થઈ રહેલા ફેરફારો અને અલ નીનોની અસરને કારણે વરસાદી પેટર્નમાં ફેરફાર જોવા મળી શકે છે. આગામી દિવસોમાં વિવિધ રાજ્યોમાં વરસાદની સ્થિતિ અલગ-અલગ રહેવાની શક્યતા છે.
90% વાદળો ઘટ્યા, Weather પેટર્નમાં મોટો ફેરફાર
સેટેલાઇટ તસવીરોમાં દેશના મોટા ભાગના વિસ્તારમાં વાદળોનું પ્રમાણ ઘટેલું જોવા મળ્યું છે. ખાસ કરીને ઉત્તર-પશ્ચિમ અને મધ્ય ભારતમાં આ ફેરફાર નોંધપાત્ર છે. વાદળોમાં ઘટાડો થતાં ચોમાસું (Monsoon) ધીમું પડ્યું હોવાની ચર્ચા તેજ બની છે.
જોકે, માત્ર વાદળોની તસવીરોના આધારે ચોમાસાની સત્તાવાર વિદાય જાહેર કરી શકાય નહીં. આગામી દિવસોમાં વરસાદી સિસ્ટમ, પવનની દિશા અને અન્ય હવામાન પરિબળો પર પણ નજર રહેશે.
બિહારમાં પૂરથી 27 લાખ લોકો અસરગ્રસ્ત
બિહારમાં ભારે વરસાદ અને નદીઓના વધેલા જળસ્તરને કારણે અનેક વિસ્તારોમાં પૂર જેવી સ્થિતિ ઊભી થઈ છે. ગંગા, કોસી, ગંડક, બૂઢી ગંડક, પુનપુન અને બાગમતી સહિતની નદીઓના પાણીમાં વધારો નોંધાયો છે.
રાજ્યના 13 જિલ્લાઓમાં આશરે 27 લાખ લોકો અસરગ્રસ્ત થયા હોવાનું સામે આવ્યું છે. પૂર સંબંધિત ઘટનાઓમાં અત્યાર સુધીમાં 20થી વધુ લોકોના મોત થયાના અહેવાલ છે. અસરગ્રસ્ત વિસ્તારોમાં બચાવ અને રાહત કામગીરી પર તંત્રનું ધ્યાન કેન્દ્રિત છે.
અંબોલીમાં ચેરાપુંજી કરતાં વધુ વરસાદ
મહારાષ્ટ્રના અંબોલીમાં પણ વરસાદે ભારે અસર પેદા કરી છે. ઉપલબ્ધ આંકડા અનુસાર ઓગસ્ટ સુધીમાં અહીં 250 ઇંચથી વધુ વરસાદ નોંધાયો છે. સપ્ટેમ્બર સુધીમાં વરસાદનો આંકડો 400 ઇંચ સુધી પહોંચવાની શક્યતા વ્યક્ત કરવામાં આવી રહી છે.
અંબોલીનો વરસાદ ફરી એકવાર પશ્ચિમ ઘાટના અત્યંત વરસાદી વિસ્તારો તરફ ધ્યાન ખેંચી રહ્યો છે. અહીં સતત વરસાદને કારણે સ્થાનિક જનજીવન અને માર્ગ વ્યવહાર પર પણ અસર થવાની શક્યતા રહે છે.
મધ્ય પ્રદેશમાં 83.5% વરસાદી ક્વોટા પૂર્ણ
મધ્ય પ્રદેશમાં અત્યાર સુધી સરેરાશ 31.1 ઇંચ વરસાદ નોંધાયો છે. રાજ્યમાં અત્યાર સુધીના સીઝનના વરસાદ (Rainfall) ક્વોટામાંથી આશરે 83.5 ટકા પૂર્ણ થયો છે.
ભોપાલ સહિત 12 જિલ્લાઓમાં સામાન્ય કરતાં વધુ વરસાદ નોંધાયો છે. બીજી તરફ 31 જિલ્લાઓમાં હજુ વરસાદ સામાન્ય સ્તરથી ઓછો રહ્યો છે. એટલે રાજ્યમાં વરસાદનું વિતરણ એકસમાન નથી.
હિમાચલમાં ભૂસ્ખલન, હાઈવે પર વાહનોની લાંબી કતાર
હિમાચલ પ્રદેશમાં શિમલા-કિન્નૌર નેશનલ હાઈવે-5 પર વહેલી સવારે ભારે ભૂસ્ખલન થયું. રસ્તા પર મોટા દેવદારના વૃક્ષો પડતાં ઠિયોગના જનોગઘાટ વિસ્તારમાં વાહનવ્યવહાર સંપૂર્ણપણે અટકી ગયો.
હાઈવે બંધ થતાં બંને તરફ વાહનોની લાંબી કતારો લાગી છે. સફરજનની હેરફેર કરતા અનેક વાહનો પણ ફસાયા છે. ઇમરજન્સી વાહનોની અવરજવરમાં પણ મુશ્કેલી સર્જાઈ છે.
ઉત્તરાખંડમાં પણ છેલ્લા એક સપ્તાહથી છૂટોછવાયો વરસાદ ચાલુ છે. ઉત્તરકાશીમાં ભૂસ્ખલનને કારણે મનેરી-ભટવાડી હાઈવે પર વાહનવ્યવહાર પ્રભાવિત થયો છે. હરિદ્વારના સિડકુલ વિસ્તારમાં નાળાના પાણીમાં બે બાળકો તણાયા હતા, જેમાં એકને બચાવી લેવાયો હતો જ્યારે બીજા બાળકની શોધખોળ ચાલુ છે.
હરિયાણામાં ચોમાસું નબળું પડવાની શક્યતા
હરિયાણામાં પણ હવે હવામાન વિભાગ (IMD) અનુસાર ચોમાસાની સક્રિયતા ઘટવાની શક્યતા છે. તાજા હવામાન બુલેટિન મુજબ 8 સપ્ટેમ્બરથી રાજ્યમાં ચોમાસાની ગતિ ઓછી થઈ શકે છે.
આ દરમિયાન વરસાદ (Rain)નું પ્રમાણ ઘટવાની સાથે આગામી દિવસોમાં હવામાનમાં ધીમે ધીમે ફેરફાર જોવા મળી શકે છે.
રાજસ્થાનમાં ચાર દિવસ બાદ ફરી સક્રિય થવાની શક્યતા
રાજસ્થાનમાં હાલમાં ચોમાસું (Monsoon)નબળું પડ્યું છે. કોટા અને ભરતપુરના કેટલાક વિસ્તારોમાં હળવા વરસાદની શક્યતા છે. અગાઉ અલવર, કોટપુતળી, સીકર અને રાજસમંદ જેવા વિસ્તારોમાં વરસાદ નોંધાયો હતો.
હવામાનની હાલની સ્થિતિ જોતા રાજ્યમાં આગામી દિવસોમાં વરસાદી પ્રવૃત્તિમાં ઘટાડો જોવા મળી શકે છે, જોકે ચાર દિવસ બાદ ચોમાસું ચોમાસુ (Monsoon)ફરી સક્રિય થવાની શક્યતા વ્યક્ત કરવામાં આવી છે.
