Rain-Storm Alert In 17 States: દેશના વિવિધ વિસ્તારોમાં આગામી દિવસોમાં હવામાનમાં મોટા ફેરફારો જોવા મળી શકે છે. ભારતીય હવામાન વિભાગે જણાવ્યું છે કે દક્ષિણ-પશ્ચિમ ચોમાસું હવે કેરળના દરવાજે પહોંચી ગયું છે અને ટૂંક સમયમાં તેની સત્તાવાર એન્ટ્રી થઈ શકે છે. બીજી તરફ દેશના અનેક રાજ્યો માટે વરસાદ, વાવાઝોડા (rain-storm) અને કરાવર્ષાની ચેતવણી પણ જાહેર કરવામાં આવી છે.
હવામાન વિભાગના તાજેતરના અનુમાન પ્રમાણે આગામી બે થી ત્રણ દિવસ દરમિયાન ચોમાસું કેરળમાં પ્રવેશ કરી શકે છે. ચોમાસાની ગતિને અનુકૂળ વાતાવરણ સર્જાતા દક્ષિણ ભારત તેમજ પૂર્વોત્તર રાજ્યોમાં ભારે વરસાદની શક્યતાઓ વધી ગઈ છે.
દેશના ઉત્તર અને મધ્ય વિસ્તારોમાં પણ હવામાન સક્રિય બનશે. દિલ્હી, હરિયાણા, પંજાબ, ઉત્તર પ્રદેશ, રાજસ્થાન અને ઉત્તરાખંડ સહિતના રાજ્યોમાં ગાજવીજ સાથે વરસાદની સંભાવના વ્યક્ત કરવામાં આવી છે. કેટલાક વિસ્તારોમાં 50થી 70 કિલોમીટર પ્રતિ કલાકની ઝડપે પવન ફૂંકાઈ શકે છે, જ્યારે ક્યાંક કરાવર્ષા પણ થઈ શકે છે.
મધ્યપ્રદેશ, છત્તીસગઢ અને મહારાષ્ટ્રના કેટલાક ભાગોમાં આગામી દિવસોમાં વરસાદી માહોલ યથાવત રહેવાની આગાહી છે. ગુજરાતમાં પણ ગાજવીજ સાથે વરસાદી ઝાપટાં પડવાની સંભાવના વ્યક્ત કરવામાં આવી છે, જેના કારણે ગરમીથી લોકોને રાહત મળી શકે છે.
દક્ષિણ ભારતની વાત કરીએ તો કેરળ, માહે, તમિલનાડુ, પુડુચેરી, આંધ્ર પ્રદેશ અને તેલંગાણામાં વરસાદી સિસ્ટમ વધુ સક્રિય બનશે. ખાસ કરીને કેરળ અને માહેના કેટલાક વિસ્તારોમાં ભારેથી અતિભારે વરસાદ પડી શકે છે.
પૂર્વ અને પૂર્વોત્તર ભારતના રાજ્યોમાં પણ હવામાન વિભાગે એલર્ટ જાહેર કર્યું છે. બિહાર, ઝારખંડ, પશ્ચિમ બંગાળ, સિક્કિમ અને ઓડિશામાં વરસાદ સાથે તોફાની પવનની શક્યતા છે. આસામ, મેઘાલય, અરુણાચલ પ્રદેશ, નાગાલેન્ડ, મણિપુર, મિઝોરમ અને ત્રિપુરામાં આગામી સપ્તાહ દરમિયાન ભારે વરસાદ નોંધાઈ શકે છે.
દર વર્ષે સામાન્ય રીતે 1 જૂનની આસપાસ કેરળમાં ચોમાસું પહોંચે છે, પરંતુ આ વર્ષે તેના આગમનમાં થોડો વિલંબ નોંધાયો છે. હવામાન નિષ્ણાતોના મતે વૈશ્વિક હવામાન પરિબળોની અસરને કારણે ચોમાસાની ગતિમાં ફેરફાર થયો છે. જોકે હાલની પરિસ્થિતિને જોતા ટૂંક સમયમાં ચોમાસાની સત્તાવાર શરૂઆત થવાની શક્યતા મજબૂત બની છે.
હવામાન વિભાગે લોકોને તોફાની પવન, વીજળી અને ભારે વરસાદ દરમિયાન સાવચેતી રાખવાની સલાહ આપી છે.
આ પણ વાંચો: દિલ્હી હાઈકોર્ટનો ગુગલને મોટો ઝટકો, હિંદવેર ટ્રેડમાર્ક કેસમાં ₹30 લાખનો દંડ
આ પણ વાંચો: ટિફની ટ્રમ્પે કરી દિલ્હીના અક્ષરધામ મંદિરની મુલાકાત
આ પણ વાંચો: દિલ્હીમાં ISI નું મોટું કાવતરું નિષ્ફળ, દાઉદ કનેક્શન ધરાવતા 9 આતંકીઓની ધરપકડ, હથિયારો જપ્ત
