ભાગદોડ ભરેલી આધુનિક લાઈફસ્ટાઈલમાં રાત્રિના સમયે ગાઢ અને સંતોષકારક ઊંઘ મેળવવી એક મોટો પડકાર બની ગયો છે. ખાસ કરીને પરણેલા યુગલોમાં ઊંઘ પૂરી ન થવાની સમસ્યા વધી રહી છે. દિવસભર નોકરી, ઘરકામ અને બાળકોની જવાબદારીઓ નિભાવ્યા પછી રાત્રે શાંતિથી ઊંઘવાની ઈચ્છા હોય છે, પરંતુ પાર્ટનરના નસકોરાં, સ્માર્ટફોનનો વપરાશ કે સૂવાના અલગ સમયને કારણે ઊંઘ બગડે છે. આ સમસ્યાના ઉકેલ રૂપે હવે ‘સ્લીપ ડિવોર્સ’ (Sleep Divorce) નો ટ્રેન્ડ ઝડપથી વધી રહ્યો છે.
શું છે આ ‘સ્લીપ ડિવોર્સ’ વિભાવના?
‘સ્લીપ ડિવોર્સ’નો મતલબ લગ્નજીવન કે સંબંધનો અંત નથી, પરંતુ માત્ર એક સારી ઊંઘ મેળવવા માટે દંપતી દ્વારા અલગ-અલગ બેડરૂમમાં, અલગ પથારી પર અથવા અલગ સમયે સૂવાનો નિર્ણય લેવો છે. યુવાનોથી લઈને મોટી ઉંમરના દંપતીઓ પણ પોતાની શારીરિક અને માનસિક તાજગી જાળવી રાખવા માટે આ પદ્ધતિ અપનાવી રહ્યા છે. આ વ્યવસ્થાથી સંબંધમાં કોઈ અંતર આવતું નથી, પરંતુ ઊંઘ વિના થતા કચવાટ અને તણાવમાંથી મુક્તિ મળે છે.
ભારતમાં 78% દંપતીઓ અલગ સૂવાનું કરી રહ્યા છે પસંદ
તાજેતરમાં હાથ ધરાયેલા એક આંતરરાષ્ટ્રીય સ્લીપ સર્વે અનુસાર, ગંભીર માનસિક શાંતિ અને ઊંઘની ગુણવત્તા સુધારવા માટે ભારતના 78% યુગલો ‘સ્લીપ ડિવોર્સ’ પસંદ કરી રહ્યા છે. આ મામલે ભારત વિશ્વમાં પ્રથમ ક્રમે છે, જ્યારે ચીન (67%) બીજા અને દક્ષિણ કોરિયા (65%) ત્રીજા સ્થાને આવે છે. સર્વે દર્શાવે છે કે આ નિર્ણયથી મોટાભાગના લોકોના સ્વાસ્થ્યમાં સકારાત્મક ફેરફાર જોવા મળ્યો છે.
સ્લીપ ડિવોર્સ પાછળના મુખ્ય કારણો:
અલગ-અલગ સ્લીપ શિડ્યુલ: એક પાર્ટનર વહેલા સૂઈને સવારે વહેલો જાગતો હોય, જ્યારે બીજો લેટ નાઈટ પર્સન હોય.
નસકોરાં અને હલનચલન: એક પાર્ટનરના જોરદાર નસકોરાં અથવા પથારીમાં વારંવાર પાસા બદલવાથી બીજાની ઊંઘ ઉડી જવી.
લાઈટ અને ગેજેટ્સ: એક વ્યક્તિને અંધારામાં સૂવું ગમતું હોય જ્યારે બીજાને લાઈટ કે ટીવી/મોબાઈલ ચાલુ રાખીને સૂવાની આદત હોય.
એલાર્મથી ખલેલ: અલગ-અલગ સમયે વાગતા સવારના એલાર્મથી ઊંઘ અધૂરી રહેવી.
સ્લીપ ડિવોર્સથી થતા શારીરિક અને માનસિક ફાયદા
ગાઢ અને ગુણવત્તાયુક્ત ઊંઘ: કોઈ પણ પ્રકારના વિક્ષેપ વગર શરીરને પૂરતો આરામ મળે છે.
સ્વાસ્થ્યમાં સુધારો: પૂરતી ઊંઘથી બ્લડ પ્રેશર, ચિંતા અને ચીડિયાપણું ઘટે છે.
સંબંધોમાં મધુરતા: પૂરતી ઊંઘ મળવાથી દંપતી વચ્ચે અકારણ થતા ઝઘડા ઘટે છે અને પ્રેમ જળવાઈ રહે છે.
મી-ટાઈમ (Me-Time): બંને પાર્ટનરને પોતપોતાની પર્સનલ સ્પેસ મળે છે, જેથી કામ કરવાની ક્ષમતા (Productivity) વધે છે.
આ પણ વાંચો :નેચરલ ગ્લો માટે ઘરે બનાવો ફેસ સીરમ, અજમાવો આ 2 અસરકારક ઉપાય
આ પણ વાંચો :દરરોજ 1-2 પીસ ડાર્ક ચોકલેટ ખાવાના અદ્ભુત ફાયદા, હૃદયથી લઈને યાદશક્તિ સુધી મળશે લાભ
આ પણ વાંચો :બપોરે જમ્યા પછી આળસ અને ઊંઘ આવે છે? ડાયટમાં સામેલ કરો આ 5 સુપરફૂડ્સ, આખો દિવસ રહેશો એનર્જેટિક
