SCO Meet: ભારતે આવતા મહિને દિલ્હીમાં યોજાનારી શાંઘાઈ કોઓપરેશન ઓર્ગેનાઈઝેશન (SCO)ની બેઠક માટે પાકિસ્તાનના સંરક્ષણ પ્રધાન ખ્વાજા આસિફને આમંત્રણ મોકલ્યું છે. હાલમાં SCOનું પ્રમુખપદ ભારત પાસે છે, જેમાં ચીન, ભારત, કઝાકિસ્તાન, કિર્ગિસ્તાન, રશિયા, પાકિસ્તાન, તાજિકિસ્તાન અને ઉઝબેકિસ્તાન સભ્ય છે. SCO અધ્યક્ષ હોવાના કારણે ભારતે શ્રેણીબદ્ધ બેઠકોની યજમાની કરવી પડે છે.
રાષ્ટ્રીય સુરક્ષા સલાહકાર (NSA)ને પણ આમંત્રણ મોકલવામાં આવ્યું છે. (SCO Meet) એવા પણ અહેવાલ છે કે ખ્વાજા આસિફે ભારત સરકારનું આમંત્રણ સ્વીકાર્યું છે. જો આસિફ રક્ષા મંત્રીની બેઠકમાં ભાગ લેવા આવશે તો 2011 બાદ આ પ્રકારની પ્રથમ મુલાકાત હશે. 2011માં પાકિસ્તાનના તત્કાલીન વિદેશ મંત્રી હિના રબ્બાની ખારે ભારતની મુલાકાત લીધી હતી.
રાજદ્વારી સૂત્રોએ એક્સપ્રેસ ટ્રિબ્યુન અખબારને જણાવ્યું હતું કે ભારત સરકારે સત્તાવાર રીતે પાકિસ્તાનના વિદેશ કાર્યાલય સાથે આમંત્રણ (પત્ર) શેર કર્યું હતું. ભારતે હજુ સુધી પાકિસ્તાની મીડિયામાં પ્રકાશિત થયેલા સમાચારની પુષ્ટિ કરી નથી.
સમાચારમાં દાવો કરવામાં આવ્યો છે કે ભારતે અગાઉ પાકિસ્તાનના મુખ્ય ન્યાયાધીશ ઉમર અતા બંદિયાલને આમંત્રણ આપ્યું હતું અને ACO વિદેશ મંત્રીઓની બેઠક માટે આમંત્રણ પણ શેર કર્યું હતું. સમાચાર અનુસાર, પાકિસ્તાનના મુખ્ય ન્યાયાધીશ, જોકે, SCO ચીફ જસ્ટિસની બેઠકમાં હાજર રહ્યા ન હતા અને તેમના સ્થાને, જસ્ટિસ મુનીબ અખ્તરે વીડિયો કોન્ફરન્સ દ્વારા તાજેતરમાં પૂર્ણ થયેલી બેઠકમાં ભાગ લીધો હતો.
ઉલ્લેખનીય છે કે, SCO ના વિદેશ મંત્રીઓની બેઠક મે મહિનામાં ગોવામાં યોજાવાની છે જ્યારે રક્ષા મંત્રીઓની બેઠક એપ્રિલમાં નવી દિલ્હીમાં યોજાશે. પાકિસ્તાન સરકારે કહ્યું કે તેણે ભારતમાં યોજાનારી બેઠકોમાં વિદેશ પ્રધાન બિલાવલ ભુટ્ટો ઝરદારી અથવા સંરક્ષણ પ્રધાન આસિફની ભાગીદારી અંગે હજુ સુધી કોઈ નિર્ણય લીધો નથી. ભારતે પહેલાથી જ ચીનના વિદેશ મંત્રી કિન ગેંગને બેઠકમાં ભાગ લેવા આમંત્રણ આપ્યું છે.
ભારત આ વર્ષના અંતમાં વાર્ષિક SCO સમિટ માટે પાકિસ્તાનના વડા પ્રધાન શહેબાઝ શરીફ, ચીનના રાષ્ટ્રપતિ શી જિનપિંગ અને રશિયન પ્રમુખ વ્લાદિમીર પુતિનને પણ આમંત્રણ મોકલશે.
