National News : બાંગ્લાદેશ (Bangladesh)નાં પૂર્વ વડાપ્રધાન શેખ હસીના (Sheikh Hasina)એ દેશ પરત ફરવાને લઈને મહત્વપૂર્ણ જાહેરાત કરી છે. હાલમાં ભારત ખાતે નિવાસ કરી રહેલી હસીનાએ જણાવ્યું છે કે તેઓ આ વર્ષના અંત સુધી બાંગ્લાદેશ પરત ફરવાનો સંકલ્પ ધરાવે છે. તેમના જણાવ્યા મુજબ આ નિર્ણય વ્યક્તિગત સત્તા માટે નહીં પરંતુ દેશમાં લોકશાહી, કાયદાનું શાસન અને જનતાના રાજકીય અધિકારોના પુનઃસ્થાપન માટે છે.
2024ની રાજકીય ઉથલપાથલ બાદ ભારત આવ્યા
વર્ષ 2024 દરમિયાન બાંગ્લાદેશમાં વ્યાપક વિરોધ પ્રદર્શન અને હિંસાની પરિસ્થિતિ સર્જાઈ હતી. વિરોધ પ્રદર્શન ઉગ્ર બનતા શેખ હસીનાએ દેશ છોડ્યો હતો અને ત્યારથી તેઓ ભારતમાં રહી રહ્યા છે. ત્યારબાદ બાંગ્લાદેશની રાજકીય પરિસ્થિતિમાં મોટા ફેરફારો થયા અને તેમની સામે અનેક કાનૂની કાર્યવાહી પણ શરૂ થઈ.
‘મારી વાપસી સત્તા માટે નહીં, લોકશાહી માટે’
એક ખાનગી મીડિયા ચેનલને આપેલા ઈન્ટરવ્યૂમાં શેખ હસીનાએ કહ્યું કે તેમની વાપસી પાછળ કોઈ વ્યક્તિગત મહત્ત્વાકાંક્ષા નથી. તેમણે જણાવ્યું કે બાંગ્લાદેશમાં લોકશાહી, કાયદાનું શાસન અને જનતાના અધિકારોનું રક્ષણ જરૂરી છે. તેમણે દાવો કર્યો કે તમામ મુશ્કેલીઓ અને રાજકીય ષડયંત્રો છતાં તેઓ આ વર્ષના અંત સુધી પોતાના દેશમાં પરત ફરશે.
ફાંસીની સજા પર ઉઠાવ્યા સવાલ
શેખ હસીના (Sheikh Hasina)એ પોતાના વિરુદ્ધ આપવામાં આવેલી મોતની સજાને ગેરકાયદેસર અને રાજકીય પ્રેરિત ગણાવી. તેમના કહેવા મુજબ ન્યાયતંત્રનો ઉપયોગ રાજકીય બદલો લેવા માટે કરવામાં આવ્યો છે. તેમણે કહ્યું કે આવા પ્રયાસો અગાઉ પણ થયા હતા, પરંતુ તેઓ દરેક વખત સફળતાપૂર્વક બહાર આવ્યા છે.
પરિવાર પર થયેલા હુમલાનો કર્યો ઉલ્લેખ
હસીનાએ પોતાના નિવેદનમાં 1975માં તેમના પિતા બંગબંધુ શેખ મુજીબુર રહમાન સહિત પરિવારના સભ્યોની હત્યાનો ઉલ્લેખ કર્યો હતો. સાથે જ 21 ઓગસ્ટના ગ્રેનેડ હુમલા સહિત પોતાના જીવન પર થયેલા હુમલાઓને યાદ કરતાં કહ્યું કે તેઓ મૃત્યુથી ડરતા નથી અને દેશના લોકો માટે કામ કરવાનું ચાલુ રાખશે.
અવામી લીગને ગણાવી જનતાની તાકાત
શેખ હસીના (Sheikh Hasina)એ કહ્યું કે અવામી લીગ (Awami League) માત્ર એક રાજકીય પક્ષ નથી, પરંતુ બંગાળના લોકો, ઇતિહાસ અને રાષ્ટ્રીય ઓળખ સાથે જોડાયેલી શક્તિ છે. છેલ્લા અનેક દાયકાઓમાં પક્ષ પર પ્રતિબંધો અને હુમલાઓ છતાં તે લોકોના સમર્થનથી ફરી ઉભો રહ્યો હોવાનું તેમણે જણાવ્યું.
આગળ શું?
શેખ હસીના (Sheikh Hasina)ના આ નિવેદન બાદ બાંગ્લાદેશના રાજકારણમાં ફરી ચર્ચા તેજ બની છે. જો તેઓ ખરેખર વર્ષના અંત સુધી દેશમાં પરત ફરે છે તો ત્યાંની રાજકીય પરિસ્થિતિ અને સત્તારૂઢ વ્યવસ્થા પર તેની શું અસર પડશે તે જોવાનું રહેશે.
