Ahmedabad News: અમદાવાદ મ્યુનિસિપલ કોર્પોરેશન (AMC) ના સ્ટેન્ડિંગ કમિટી ચેરમેન કમલેશ પટેલે (Kamlesh Patel AMC) સામાજિક અને શૈક્ષણિક ક્ષેત્રે એક અનોખી પહેલ શરૂ કરી છે. સામાન્ય રીતે નેતાઓને મળવા જતા લોકો ફૂલોના બુકે ભેટમાં આપતા હોય છે, પરંતુ હવે કમલેશ પટેલે કાર્યકરો અને શુભેચ્છકોને ફૂલોના બુકેના બદલે પુસ્તકો ભેટમાં લાવવાની અપીલ કરી છે. આ પહેલ પાછળનો મુખ્ય હેતુ ફૂલોના બગાડને અટકાવવાનો અને ગરીબ બાળકો સુધી શિક્ષણનું દાન પહોંચાડવાનો છે.
“બુકે નહીં, બુક લઈને આવો” અભિયાન
સ્ટેન્ડિંગ કમિટી ચેરમેન કમલેશ પટેલે (Kamlesh Patel AMC) પોતાની ઓફિસે આવતા તમામ કાર્યકરો, મિત્રો અને શુભેચ્છકોને ખાસ અનુરોધ કર્યો છે કે તેઓ શુભેચ્છા વ્યક્ત કરવા માટે ફૂલોના મોંઘાદાટ બુકે લાવવાને બદલે સારાં પુસ્તકો ભેટરૂપે આપે. આ નિર્ણયને અમલમાં મૂકવા માટે તેમની ઓફિસની બહાર “ભેટ અસ્વીકાર” અને “બુકે નહીં, બુક લઈને આવો” જેવા પોસ્ટરો પણ લગાવવામાં આવ્યા છે.
Kamlesh Patel AMC: ગરીબ બાળકોને મળશે પુસ્તકો
ચેરમેન કમલેશ પટેલે (Kamlesh Patel AMC) જણાવ્યું હતું કે, અહીં એકત્રિત થનારા તમામ પુસ્તકો અમદાવાદ મ્યુનિસિપલ સ્કૂલ બોર્ડની શાળાઓમાં અભ્યાસ કરતા ગરીબ અને નબળા વર્ગના બાળકોને આપવામાં આવશે. આ પહેલથી બાળકોમાં વાંચનની આદત વિકસશે અને શિક્ષણ પ્રત્યેનો રસ પણ વધશે.
સમાજમાં સકારાત્મક સંદેશ
સામાન્ય રીતે શુભેચ્છા મુલાકાતોમાં લાખો રૂપિયાના ફૂલોના બુકેનો ઉપયોગ થતો હોય છે, જે થોડા સમયમાં કચરામાં ફેરવાઈ જાય છે. આવી સ્થિતિમાં AMC ચેરમેનની આ પહેલ સમાજમાં સકારાત્મક સંદેશ આપી રહી છે. લોકોમાં પણ આ નિર્ણયને લઈને સકારાત્મક પ્રતિસાદ જોવા મળી રહ્યો છે અને સોશિયલ મીડિયા પર પણ લોકો કમલેશ પટેલની પ્રશંસા કરી રહ્યા છે.
શિક્ષણને પ્રાથમિકતા આપતો નિર્ણય
રાજકારણ અને વહીવટમાં શિક્ષણને પ્રોત્સાહન આપતી આવી પહેલ ભાગ્યે જ જોવા મળે છે. કમલેશ પટેલના આ નિર્ણયને ઘણા લોકો “નાની શરૂઆત, મોટો સંદેશ” તરીકે જોઈ રહ્યા છે. આ પહેલ દ્વારા એક તરફ પુસ્તકોનું દાન થશે અને બીજી તરફ ગરીબ બાળકોને નવી શૈક્ષણિક તક પણ મળશે.
આ પણ વાંચો:AMCની સ્ટેન્ડિંગ કમિટીના નવા ચેરમેન કમલેશ પટેલે પોલિટિક્સમાં જમાવી છે કેમેસ્ટ્રી
આ પણ વાંચો:અમદાવાદના નવા મેયર હિતેશ બારોટનો મોટો નિર્ણય, સરકારી બંગલો અને લક્ઝરી કારનો કર્યો ઇનકાર
