Amreli News: અમરેલી જિલ્લામાં સિંહોની અવરજવર વચ્ચે વનવિભાગ માટે ફરી એકવાર બે અલગ-અલગ સ્થળે સિંહણના રેસ્ક્યુની કામગીરી સામે આવી છે. જાફરાબાદ તાલુકાના બાબરકોટ ગામમાં 1 વર્ષની બાળ સિંહણ જૂના કૂવામાં (Amreli Lioness Rescue) ખાબકી હતી. જ્યારે ધારી તાલુકાના વિરપુર ગામમાં સુવરનો શિકાર કરવા દોડેલી સિંહણ પણ ખુલ્લા કૂવામાં પડી ગઈ હતી. બંને ઘટનામાં વનવિભાગની ટીમોએ મોડી રાત સુધી રેસ્ક્યુ ઓપરેશન ચલાવી સિંહણોને સુરક્ષિત બહાર કાઢી હતી.
Amreli Lioness Rescue: બાબરકોટમાં 1 વર્ષની બાળ સિંહણ કૂવામાં પડી
જાફરાબાદ તાલુકાના બાબરકોટ ગામમાં મોડી રાત્રે એક વર્ષ જેટલી ઉંમરની સિંહણ (Babarkot Lioness) જૂના કૂવામાં પડી ગઈ હતી. કૂવામાંથી સિંહણના અવાજ સંભળાતા ગ્રામજનો ઘટનાસ્થળે એકઠા થયા હતા. કૂવો ઊંડો હોવાથી સિંહણ માટે જાતે બહાર નીકળવું મુશ્કેલ હતું.
સ્થાનિકોએ તાત્કાલિક વનવિભાગને જાણ કરતાં જાફરાબાદ રેન્જના આરએફઓ જિજ્ઞાસા છેતરણીય સહિતનો સ્ટાફ ઘટનાસ્થળે પહોંચ્યો હતો. ફોરેસ્ટર, ટ્રેકર્સ અને રોડ મિત્ર સહિતની ટીમે જરૂરી સાધનો સાથે રેસ્ક્યુ કામગીરી શરૂ કરી હતી.
ભારે જહેમત બાદ સુરક્ષિત બહાર કાઢી
મોડી રાત સુધી ચાલેલી કામગીરી દરમિયાન વનવિભાગની ટીમે (Amreli Lioness Rescue) સાવચેતીપૂર્વક બાળ સિંહણને કૂવામાંથી બહાર કાઢી હતી. રેસ્ક્યુ દરમિયાન સિંહણને ઈજા ન થાય તેનું ખાસ ધ્યાન રાખવામાં આવ્યું હતું.બહાર કાઢ્યા બાદ સિંહણને વધુ તપાસ અને સારવાર માટે બાબરકોટના એનિમલ કેર સેન્ટર ખાતે ખસેડવામાં આવી હતી.
ગ્રામજનોમાં ચિંતા, રાત્રિ પેટ્રોલિંગ વધારવાની માગ
બાબરકોટ અને આસપાસના વિસ્તારોમાં સિંહોની અવરજવર સતત જોવા મળી રહી છે. રહેણાંક અને ખેતીવાડી વિસ્તારોની આસપાસ વન્યજીવોની હાજરી વધતાં ગ્રામજનોમાં પણ ચિંતા જોવા મળી રહી છે.ખુલ્લા અને જૂના કૂવાઓ વન્યજીવો માટે જોખમી બની શકે છે ત્યારે ગ્રામજનોએ આવા વિસ્તારોમાં રાત્રિ પેટ્રોલિંગ વધારવાની માગ કરી છે. સાથે જ ખુલ્લા કૂવાઓને સુરક્ષિત કરવાની જરૂરિયાત પણ સામે આવી છે.
વિરપુરમાં સુવર પાછળ દોડેલી સિંહણ કૂવામાં ખાબકી
બીજી તરફ, ધારી તાલુકાના વિરપુર ગામમાં પણ સિંહણના રેસ્ક્યુની ઘટના (Virpur Lioness Rescue) બની હતી. ભાભલુભાઈ ધાખડાની વાડી વિસ્તારમાં સિંહણ સુવરનો શિકાર કરવા પાછળ દોડી રહી હતી. આ દરમિયાન સિંહણ અને સુવર બંને ખુલ્લા કૂવામાં પડી ગયા હતા.ઘટનાની જાણ થતાં સ્થાનિકોએ વનવિભાગને જાણ કરી હતી. ત્યારબાદ દલખાણીયા રેન્જનો સ્ટાફ અને રેસ્ક્યુ ટીમ સ્થળ પર પહોંચી હતી.
મોડી રાત સુધી ઓપરેશન, સિંહણને બચાવી
વનવિભાગની (Amreli Forest Department) ટીમે કૂવામાં ફસાયેલી સિંહણને બહાર કાઢવા રેસ્ક્યુ ઓપરેશન હાથ ધર્યું હતું. મોડી રાત સુધીની કામગીરી બાદ સિંહણને સલામત રીતે કૂવામાંથી બહાર કાઢવામાં આવી હતી.રેસ્ક્યુ બાદ સિંહણને પણ વધુ તપાસ અને સારસંભાળ માટે એનિમલ કેર સેન્ટર ખાતે ખસેડવામાં આવી હતી.
અમરેલી જિલ્લામાં સિંહોની અવરજવર માનવ વસાહતો અને ખેતીવાડી વિસ્તારો સુધી જોવા મળતી હોવાથી ખુલ્લા કૂવા, વાડીઓ અને અન્ય જોખમી સ્થળોને સુરક્ષિત બનાવવાની જરૂરિયાત ફરી એકવાર સામે આવી છે. બંને ઘટનામાં સમયસર (Lioness Fell Into Well) માહિતી મળતા વનવિભાગે રાત્રિના સમયે રેસ્ક્યુ કામગીરી કરી સિંહણોને સુરક્ષિત રીતે બહાર કાઢી હતી.
આ પણ વાંચો: નાના સમઢિયાળામાં કૂવામાં પડ્યો સિંહ, વન વિભાગે સિંહનું સફળ રેસ્ક્યૂ કર્યું
આ પણ વાંચો: ગીર ગઢડામાં કૂવામાંથી સિંહનો મૃતદેહ મળ્યો, 3 દિવસ બાદ વનવિભાગને જાણ થતાં અનેક તર્ક વિતર્ક
