World News: હોર્મુઝ સ્ટ્રેટમાં 2 નવેમ્બરે ભારતીય ખલાસીઓ સવાર જહાજ પર મિસાઇલથી હુમલો (Indian Ship Missile Attack) થતાં ગુજરાતના દેવભૂમિ દ્વારકા જિલ્લાના એક યુવકનું મોત થયું છે. જહાજમાં કુલ 14 ભારતીય ખલાસીઓ સવાર હતા, જેમાંથી 13ને ઓમાનના કોસ્ટ ગાર્ડે સુરક્ષિત રીતે બચાવી લીધા હતા. મૃતકની ઓળખ સલાયાના રહેવાસી નાહીમ અઝીઝ (Gujarat Sailor Death) તરીકે થઈ છે. આ ઘટનાને પગલે ભારતના વિદેશ મંત્રાલયે વેપારી જહાજો પરના હુમલા તાત્કાલિક બંધ કરવાની માગ કરી છે.
Indian Ship Missile Attack: UAEથી પોરબંદર આવી રહ્યું હતું જહાજ
જહાજના રજિસ્ટર્ડ માલિક પાસેથી મળેલી માહિતી મુજબ, MSV AL JUSUFI (BDI-1442) નામનું જહાજ 31 ઓક્ટોબર, 2026ના રોજ સંયુક્ત આરબ અમીરાતના હમરિયા બંદરેથી ગુજરાતના પોરબંદર તરફ રવાના થયું હતું. 2 નવેમ્બરે ઓમાનના લીમા બંદર નજીક જહાજ પર મિસાઇલથી હુમલો (Hormuz Strait Attack) થયો હતો.
હુમલા બાદ જહાજમાં આગ લાગી હતી. આથી ખલાસીઓએ જહાજ છોડીને રેસ્ક્યૂ બોટમાં આશરો લીધો હતો. ઓમાનના કોસ્ટ ગાર્ડે ઘટનાસ્થળેથી તમામ ખલાસીઓને બચાવીને સુરક્ષિત દરિયાકાંઠાના સ્થળે પહોંચાડ્યા હતા. જોકે, નાહીમ અઝીઝને ખસાબ બંદરની હોસ્પિટલમાં લઈ જવામાં આવી રહ્યો હતો ત્યારે રસ્તામાં તેનું મોત થયું હતું. બાકીના 13 ભારતીય ખલાસીઓ સુરક્ષિત હોવાનું જણાવાયું છે.
હુમલો કોણે કર્યો તેની તપાસ
જહાજ પર મિસાઇલથી હુમલો કેવી રીતે થયો અને તેની પાછળ કોનો હાથ છે તે અંગે હજુ સુધી સત્તાવાર માહિતી સામે આવી નથી. ઘટનાને પગલે ભારતીય વિદેશ મંત્રાલયે વેપારી જહાજોને નિશાન બનાવવામાં આવતાં હોવા અંગે ગંભીર ચિંતા વ્યક્ત કરી છે. મંત્રાલયે સ્પષ્ટ કર્યું છે કે વેપારી જહાજો પરના હુમલા તાત્કાલિક બંધ થવા જોઈએ અને આંતરરાષ્ટ્રીય દરિયાઈ માર્ગો પર જહાજોની અવરજવર તથા વેપાર કોઈપણ અવરોધ વિના ચાલુ રહેવા જોઈએ.
અગાઉ 27 ભારતીયો સવાર ટેન્કર પર પણ હુમલો થયો હતો
હોર્મુઝ સ્ટ્રેટમાં 29 ઓક્ટોબરે પણ ભારતીય ખલાસીઓ ધરાવતા જહાજને નિશાન બનાવવામાં આવ્યું હતું. પનામાનો ધ્વજ ધરાવતા MT લૂઇસ-1 નામના તેલ ટેન્કરમાં 27 ભારતીય ક્રૂ સભ્યો સવાર હતા. અહેવાલ મુજબ, એક નાની બોટ જહાજની નજીક આવી હતી અને તેમાં સવાર લોકોએ જહાજના બાહ્ય ભાગ પર બે વિસ્ફોટકો લગાવીને ત્યાંથી જતા રહ્યા હતા.
થોડીવાર બાદ બંને વિસ્ફોટકોમાં ધડાકા થતાં જહાજના એન્જિન રૂમમાં આગ લાગી હતી અને એન્જિન થોડા સમય માટે બંધ થઈ ગયું હતું. જોકે, ક્રૂએ આગ પર કાબૂ મેળવી લીધો હતો. કેન્દ્રીય મંત્રી સર્બાનંદ સોનોવાલે જણાવ્યું હતું કે જહાજમાં સવાર તમામ 27 ભારતીયો સુરક્ષિત (Indian Crew Members) છે અને કોઈને ઈજા થઈ નથી. આ હુમલા પાછળ કોનો હાથ હતો તે અંગે પણ સ્પષ્ટતા થઈ નહોતી.
હોર્મુઝ અને આસપાસના વિસ્તારમાં 122 જહાજો પર હુમલા
ઇન્ટરનેશનલ મેરીટાઇમ ઓર્ગેનાઇઝેશન (IMO)ના જણાવ્યા મુજબ, 28 ફેબ્રુઆરીએ અમેરિકા-ઈરાન સંઘર્ષ શરૂ થયા બાદથી 30 ઓક્ટોબર સુધી પર્શિયન ગલ્ફ, હોર્મુઝ સ્ટ્રેટ અને ઓમાનની ખાડીમાં કુલ 122 જહાજો પર હુમલા થયા છે. અહેવાલમાં જણાવ્યા મુજબ, ઓક્ટોબર 2026 દરમિયાન હોર્મુઝ વિસ્તારમાં ભારતીય ક્રૂ ધરાવતા પાંચ જહાજો પર હુમલા થયા હતા.
હોર્મુઝ સ્ટ્રેટ વિશ્વના સૌથી મહત્ત્વપૂર્ણ દરિયાઈ વેપાર માર્ગોમાંનો એક છે. અહીંથી મોટા પ્રમાણમાં ક્રૂડ ઓઇલ અને અન્ય પેટ્રોલિયમ ઉત્પાદનોની હેરફેર થાય છે. આ વિસ્તારમાં જહાજો પર સતત થતા હુમલાઓથી વૈશ્વિક તેલ પુરવઠો અને આંતરરાષ્ટ્રીય વેપાર પ્રભાવિત થવાની આશંકા છે.
G20 બેઠકમાં પણ ભારતે ઉઠાવ્યો હતો મુદ્દો
પશ્ચિમ એશિયામાં ચાલી રહેલા સંઘર્ષ વચ્ચે વેપારી જહાજો પરના હુમલાનો (Hormuz Ship Attack) મુદ્દો ભારતે આંતરરાષ્ટ્રીય મંચ પર પણ ઉઠાવ્યો હતો. વિદેશ મંત્રી એસ. જયશંકરે G20 દેશોના વિદેશ મંત્રીઓની બેઠકમાં જણાવ્યું હતું કે દરિયાઈ જહાજો પરના હુમલાની સૌથી વધુ અસર ગરીબ અને વિકાસશીલ દેશો પર પડી શકે છે.
તેમણે ચેતવણી આપી હતી કે દરિયાઈ માર્ગોમાં વિક્ષેપને કારણે પેટ્રોલ-ડીઝલ, ખાદ્યપદાર્થો અને ખાતરના પુરવઠા પર અસર થઈ શકે છે, જેના પરિણામે આ ચીજવસ્તુઓના ભાવમાં પણ વધારો થવાની શક્યતા છે.
આ પણ વાંચો: ચીનની નીતિઓ પર કડક વલણ, ભારતની મદદની પ્રશંસા; હોર્મુઝ-લાલ સમુદ્ર અંગે મોટો નિર્ણય
આ પણ વાંચો: ઓમાન નજીક હોર્મુઝમાં વ્યાપારી જહાજ પર અસ્ત્ર હુમલો, 11 ભારતીય નાવિકો ઘાયલ
આ પણ વાંચો: હોર્મુઝ સ્ટ્રેટમાં ફરી એકવાર કુવૈતના ઓઈલ ટેન્કર પર અજાણ્યા પ્રોજેક્ટાઈલથી હુમલો, એક મહિનામાં પાંચમી ઘટના
