દિલ્હીની ચૂંટણીમાં હાર પછી દેશભરમાં કોંગ્રેસમાં ઉથલપાથલનાં એંધાણો જોવામાં આવી રહ્યા છે. રાજ્યસભાની ચૂંટણીઓ માથે ગાજી રહી છે ત્યારે જ  દેશભરનાં કોંગ્રેસ નેતાઓમાંથી સુર ઉઠી રહ્યો કે કોંગ્રેસને હવે નવી વિચારધારાની તાતી જરુર છે અને આ માટે હવે યુવા નેતાઓને આગળ કરવામાં આવે. યુવા નેતાઓ દ્વારા રાહુલ ગાંધીને ફરી રાષ્ટ્રીય અધ્યક્ષ બનાવવાની વાત જોર પકડી રહી છે, તો સામે પીઢ નેતાઓ દ્વારા કહેવામાં આવી રહ્યું છે કે, ફરી રાહુલને કમાન્ડ સોંપતા પહેલા કોઇ પણ નોન-નેહરુ-ગાંધી પરિવારનાં નેતાને એકવાર રાષ્ટ્રીય અધ્યક્ષ બનાવવામાં આવવા જોઇએ. બરાબર ત્યારે જ આ રાજ્યનાં નેતાઓ દ્વારા પ્રિયંકા ગાંઘીને પોતાનાં રાજ્ય તરફથી MP તરીકે રાજ્યસભામાં મોકલવામાં આવે તેવી માંગ કરવામાં આવી રહી છે.

જી હા, કોંગ્રેસના ચાર નેતાઓએ પાર્ટી હાઈકમાન્ડ પાસે માંગ કરી છે કે, પ્રિયંકા ગાંધીને મધ્યપ્રદેશની રાજ્યસભા બેઠક પરથી ઉતારવામાં આવે. રાજ્યસભાની ત્રણ બેઠકો આ વર્ષે એપ્રિલમાં મધ્યપ્રદેશથી ખાલી થવાની છે. આ બેઠકોમાંથી એક બેઠક પર કોંગ્રેસના વરિષ્ઠ નેતા દિગ્વિજય સિંહ સાંસદ છે, જ્યારે અન્ય બે બેઠકો પર ભાજપના પ્રભાત ઝા અને સત્યનારાયણ જાટિયા ઉચ્ચ સભાનાં સભ્યો છે. ત્રણેયની મુદત પૂર્ણ થવાને આરે છે.

વર્ષ 2018 માં રાજ્યની વિધાનસભાની ચૂંટણીમાં કોંગ્રેસની જીત બાદ બે બેઠકો કોંગ્રેસની અને એક બેઠક ભાજપના ખાતામાં જવાની સંભાવના છે. આગામી રાજ્યસભાની ચૂંટણીને ધ્યાનમાં રાખીને પૂર્વ કેન્દ્રીય પ્રધાન અરુણ યાદવ અને મધ્યપ્રદેશના ત્રણ વર્તમાન મંત્રીઓ સજ્જન સિંહ વર્મા, પીસી શર્મા અને જયવર્ધન સિંહ સહિત રાજ્યના ચાર નેતાઓએ પાર્ટીના નેતૃત્વ પાસે આ માંગ કરી છે કે રાજ્યની રાજ્યસભા બેઠક પરથી પ્રિયંકા ગાંધીને મેદાનમાં ઉતારવામાં આવે. 

મધ્યપ્રદેશના જાહેર બાંધકામ પ્રધાન સજ્જન સિંહ વર્માએ ટ્વિટ કર્યું છે, ‘ઇન્દિરા ગાંધી અનુસૂચિત જાતિ અને જાતિઓ અને મહિલાઓના ઉત્કર્ષ માટે પ્રતિબદ્ધ હતા. પ્રિયંકા તેના પગલે ચાલે છે. જે રીતે ઈન્દિરા ગાંધી કમલનાથ (મધ્યપ્રદેશના મુખ્ય પ્રધાન) ને મધ્યપ્રદેશ લાવ્યા, તે જ રીતે પ્રિયંકા ગાંધીને રાજ્યથી રાજ્યસભામાં મોકલવાનો સમય આવ્યો છે.

આ સાથે જ અરુણ યાદવે ટ્વીટ કર્યું છે કે, રાહુલ ગાંધીને ફરી એક વાર પાર્ટીની કમાન સોંપવાનો સમય આવી ગયો છે. તે સમયસર પણ બનશે કે પ્રિયંકા ગાંધીને મધ્યપ્રદેશથી રાજ્યસભાના પ્રતિનિધિત્વની તક આપવામાં આવશે, જેથી ફાશીવાદી વિચારધારા સામેના ભૂમિગત સંઘર્ષની ધાર વધુ તીવ્ર બને.’

દરમિયાન મધ્યપ્રદેશના જનસંપર્ક મંત્રી પી.સી. શર્માએ અહીં પત્રકારોને જણાવ્યું હતું કે લોકો કોંગ્રેસના જનરલ સેક્રેટરી પ્રિયંકા ગાંધી વાડ્રામાં તેમની દાદી અને પૂર્વ વડા પ્રધાન ઇન્દિરા ગાંધીની છબી જુએ છે. તેમણે કહ્યું, ‘પ્રિયંકા ગાંધીને મધ્યપ્રદેશની રાજ્યસભા બેઠક પરથી સંસદમાં મોકલવા જોઈએ. જો મધ્યપ્રદેશથી નહીં મોકલવામાં આવે તો તેઓને બીજા કોઈ રાજ્યમાંથી રાજ્યસભામાં મોકલવા જોઈએ. આનાથી પાર્ટીને મજબુત બનાવશે. ‘

મધ્યપ્રદેશથી પ્રિયંકાને રાજ્યસભામાં મોકલવાની માંગના સવાલ પર રાજ્યના શહેરી વિકાસ અને ગૃહ પ્રધાન જયવર્ધનસિંહે કહ્યું કે, જો એમ થાય તો આપણે બધા ખુશ થઈશું. કોંગ્રેસના દિગ્ગજ દિગ્વિજય સિંહના પુત્ર જયવર્ધને કહ્યું, ‘અમે આ પગલાનું સ્વાગત કરીએ છીએ. કોંગ્રેસને તેના (પ્રિયંકા) નેતૃત્વની જરૂર છે જ, પરંતુ તે દેશ માટે પણ જરૂરી છે.

નીચે આપેલી લીંક પર ક્લિક કરીને જોડાવ મંતવ્ય ન્યૂઝ સાથે…

તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ આપના ફોન પર સૌથી ઝડપી મેળવવા માટે આજે જ ડાઉનલોડ કરો “મંતવ્ય ન્યૂઝ” ની નવી મોબાઇલ એપ્લિકેશન.