Ahmedabad News: અમદાવાદમાં ડ્રાઈવિંગ લાઈસન્સ મેળવવા માટે ટેસ્ટ આપવા આવતા અરજદારોને છેલ્લા કેટલાક દિવસોથી ભારે હાલાકીનો સામનો કરવો પડી રહ્યો છે. શહેરના ડ્રાઈવિંગ ટેસ્ટ ટ્રેક પર ટેકનિકલ સમસ્યાઓ અને સર્વર ડાઉનની ફરિયાદોને કારણે ટેસ્ટ પ્રક્રિયા ખોરવાઈ ગઈ હોવાનું સામે આવ્યું છે.
મળતી માહિતી મુજબ, છેલ્લા આઠ દિવસથી સર્વર સંબંધિત સમસ્યાઓના કારણે ડ્રાઈવિંગ ટેસ્ટની કામગીરી પ્રભાવિત થઈ છે. જેના કારણે 50 હજારથી વધુ અરજદારોની પ્રક્રિયા અટવાઈ ગઈ હોવાનું કહેવાય છે. ટેસ્ટ માટે સમયસર પહોંચેલા અરજદારોને વારંવાર RTO કચેરીના ધક્કા ખાવા પડી રહ્યા છે.
અરજદારોનું કહેવું છે કે ઓનલાઈન સિસ્ટમ બંધ હોવાથી ટેસ્ટની તારીખો અને પ્રક્રિયામાં વિલંબ થઈ રહ્યો છે. અનેક લોકોએ લાંબા સમયથી લાઈસન્સ માટે અરજી કરી હોવા છતાં કામગીરી આગળ વધી રહી નથી. પરિણામે વિદ્યાર્થીઓ, નોકરીયાતો અને અન્ય અરજદારો મુશ્કેલીમાં મુકાયા છે.
આ દરમિયાન કેટલાક અરજદારોએ ગંભીર આક્ષેપો પણ કર્યા છે. તેમના જણાવ્યા અનુસાર, કેટલાક એજન્ટો દ્વારા ટેસ્ટ આપ્યા વગર જ લાઈસન્સ અપાવવાના દાવા કરવામાં આવી રહ્યા છે. જોકે, આ દાવાઓ અંગે અધિકૃત રીતે કોઈ પુષ્ટિ થઈ નથી.
RTO તંત્ર દ્વારા સર્વર સમસ્યા દૂર કરવા અને કામગીરીને ઝડપથી સામાન્ય બનાવવા પ્રયાસો ચાલી રહ્યા હોવાનું જણાવાયું છે. અરજદારો હવે તંત્ર પાસેથી વહેલી તકે સમસ્યાનું નિરાકરણ લાવવાની માંગ કરી રહ્યા છે.
આ પણ વાંચો: ડિજિટાઇઝેશનના દાવાથી વિપરીત હકીકતઃ 2023નો ડેટા દર્શાવતી RTO વેબસાઇટ
આ પણ વાંચો: અમદાવાદમાં RTO વિભાગ એક્શનમાં, 2.27 કરોડનો દંડ વસૂલ્યો
આ પણ વાંચો: RTO ચલણની ફેક લિંકે વેપારીને કંગાળ બનાવ્યો, એકાઉન્ટમાંથી રૂ. 4.48 લાખ ગાયબ
