Ranchi News: ઝારખંડમાં લાંબા સમયથી પરીક્ષા (Examination) રદ કરવાની માગ સાથે આંદોલન કરી રહેલા વિદ્યાર્થીઓને મોટી સફળતા મળી છે. હેમંત સોરેન સરકારે JSSC-CGL પરીક્ષા રદ કરવાનો નિર્ણય લીધો છે અને 2014થી ભરતી પરીક્ષાઓની તપાસની જાહેરાત કરી છે.
JSSC-CGL પરીક્ષા રદ, વિદ્યાર્થીઓમાં ઉજવણી
મુખ્યમંત્રી હેમંત સોરેનની અધ્યક્ષતામાં સોમવારે મળેલી કેબિનેટની વિશેષ બેઠકમાં મહત્વપૂર્ણ નિર્ણયો લેવામાં આવ્યા હતા. લગભગ સાડા ચાર કલાક સુધી ચાલેલી બેઠક બાદ સરકારે JSSC-CGL પરીક્ષા રદ કરવાનો નિર્ણય જાહેર કર્યો. સરકારના નિર્ણય બાદ લાંબા સમયથી વિરોધ કરી રહેલા વિદ્યાર્થીઓમાં ખુશી જોવા મળી હતી. વિદ્યાર્થીઓએ સરકારના નિર્ણયને પોતાની માંગની મોટી જીત ગણાવીને ઉજવણી કરી હતી.
મુખ્યમંત્રી હેમંત સોરેને (Hemant Soren)કહ્યું કે પરીક્ષા વ્યવસ્થામાં પારદર્શિતા લાવવા સરકાર કામ કરશે. તેમણે જણાવ્યું કે પરીક્ષા કેવી રીતે યોજવી તે અંગે પહેલેથી જ SOP નક્કી કરવામાં આવી છે. જો તેનો યોગ્ય રીતે અમલ થયો હોત તો આ પ્રકારની ગેરરીતિઓ ન સર્જાઈ હોત.
2014થી JPSC-JSSCની તમામ પરીક્ષાઓની તપાસ
સરકારે માત્ર JSSC-CGL પરીક્ષા રદ કરવાનો નિર્ણય લીધો નથી, પરંતુ 2014થી અત્યાર સુધી JPSC અને JSSC દ્વારા લેવામાં આવેલી ભરતી પરીક્ષાઓની વ્યાપક તપાસ કરવાનો પણ નિર્ણય કર્યો છે.
મુખ્યમંત્રીના જણાવ્યા મુજબ આ સમયગાળા દરમિયાન થયેલી નાની કે મોટી તમામ પ્રકારની ભૂલો અને ગેરરીતિઓની તપાસ કરવામાં આવશે. અગાઉ 14મી JPSC PT અને બેકલોગ સિવિલ સર્વિસ પરીક્ષા રદ કરવાનો નિર્ણય આંદોલનકારી વિદ્યાર્થીઓ સાથેની ચર્ચા દરમિયાન લેવામાં આવ્યો હતો.
સરકાર હવે ભરતી પરીક્ષાઓની સમગ્ર પ્રક્રિયાની સમીક્ષા કરશે. તેમાં પ્રશ્નપત્રની સુરક્ષા, પરીક્ષા સંચાલન, એજન્સીઓની ભૂમિકા, મૂલ્યાંકન અને પરિણામ જાહેર કરવાની પ્રક્રિયા જેવા મુદ્દાઓનો સમાવેશ થશે.
IAS અધિકારી અમિતાભ કૌશલની અધ્યક્ષતામાં કમિટી
પરીક્ષા સુધારા (Exam Reforms) માટે IAS અધિકારી અમિતાભ કૌશલની અધ્યક્ષતામાં વિશેષ કમિટી બનાવવાનો નિર્ણય લેવામાં આવ્યો છે. આ કમિટી હાલની પરીક્ષા વ્યવસ્થાનો અભ્યાસ કરીને જરૂરી સુધારા અંગે સરકારને સૂચનો આપશે. સરકારે સામાન્ય લોકો અને વિદ્યાર્થીઓ પાસેથી પણ પરીક્ષા સુધારા અંગે સૂચનો મંગાવ્યા છે. આ માટે ઓનલાઈન પોર્ટલ પર સૂચનો આપવાની વ્યવસ્થા કરવામાં આવી છે.
મુખ્યમંત્રીએ કહ્યું કે સરકાર એવી નવી પરીક્ષા વ્યવસ્થા બનાવવા માંગે છે જેમાં કોઈપણ સ્તરે ગેરરીતિની શક્યતા ન રહે. પરીક્ષા પ્રક્રિયાને વધુ પારદર્શક અને વિશ્વસનીય બનાવવાનો પ્રયાસ કરવામાં આવશે.
વિદ્યાર્થીઓ હજુ પણ CBI તપાસની માગ પર અડગ
સરકારે પરીક્ષા રદ કરવાની માગ સ્વીકારી હોવા છતાં વિદ્યાર્થીઓનું આંદોલન સંપૂર્ણપણે સમાપ્ત થયું નથી. વિદ્યાર્થી નેતા રવિન્દ્ર પાસવાને (Ravindra Paswan)કહ્યું કે હજુ CBI તપાસની માગ સ્વીકારવામાં આવી નથી. તેમણે જણાવ્યું કે વિદ્યાર્થીઓએ મોટી લડાઈ જીતી છે, પરંતુ હજુ એક મહત્વપૂર્ણ માગ બાકી છે. જ્યાં સુધી CBI તપાસની માગ સ્વીકારવામાં નહીં આવે ત્યાં સુધી આંદોલન ચાલુ રાખવાની વાત વિદ્યાર્થી નેતાએ કરી છે.
તેમણે મુખ્યમંત્રીનો આભાર માન્યો અને કહ્યું કે 24 દિવસ બાદ સરકાર દ્વારા વિદ્યાર્થીઓની માગ સાંભળવામાં આવી છે. જોકે, CBI તપાસ ન થાય ત્યાં સુધી કેટલાક વિદ્યાર્થીઓ અનશન ચાલુ રાખશે.
આ સમગ્ર ઘટનાક્રમ વચ્ચે ઝારખંડ (Jharkhand)માં પરીક્ષા વ્યવસ્થામાં મોટા સુધારા કરવાની પ્રક્રિયા હવે શરૂ થવાની છે. સરકાર દ્વારા રચવામાં આવેલી કમિટી શું ભલામણો કરે છે અને આગામી ભરતી પરીક્ષાઓ માટે કયા નવા નિયમો બનાવવામાં આવે છે તેના પર વિદ્યાર્થીઓ અને ઉમેદવારોની નજર રહેશે.
આ પણ વાંચો: ઝારખંડમાં પરીક્ષાની ગેરરીતિ સામે વિદ્યાર્થીઓનું આંદોલન ઉગ્ર, CMના રાજીનામાની માંગ
આ પણ વાંચો: ઝારખંડના લાતેહારમાં રિક્ષા અને કન્ટેનર વચ્ચે ગમખ્વાર અકસ્માત,10 ના મોતની આશંકા
આ પણ વાંચો: ઝારખંડ બંધને લઈને રાંચીમાં ચુસ્ત સુરક્ષા, 3 હજાર પોલીસ જવાનો તૈનાત
