Ahmedabad Naranpura Shastri Nagar Slab Collapse: મેટ્રોસિટી અમદાવાદ જ્યારે વિકાસની નવી ઊંચાઈઓ સર કરી રહ્યું છે, ત્યારે બીજી તરફ શહેરની અનેક જૂની વસાહતોમાં નાગરિકોનો જીવ જોખમમાં હોવાની આઘાતજનક વિગતો સામે આવી રહી છે. શહેરના વ્યસ્ત એવા નારણપુરા વિસ્તારમાં આવેલી શાસ્ત્રીનગર સોસાયટીના અંબિકા એપાર્ટમેન્ટમાં આજે બપોરે એક ફ્લેટની છતમાંથી અચાનક મસમોટા પોપડા ખરી પડવાની ઘટના બની હતી. સદનસીબે દુર્ઘટના સમયે ઘરમાં હાજર પતિ-પત્નીનો આબાદ બચાવ થયો છે, પરંતુ આ ઘટનાએ સ્માર્ટ સિટીના રહેવાસીઓની સલામતી સામે ગંભીર સવાલો ખડા કરી દીધા છે.
પાણીની ટાંકીના લીકેજે સર્જી મોટી આફત
મળતી માહિતી અનુસાર, શાસ્ત્રીનગરના અંબિકા એપાર્ટમેન્ટના બ્લોક નંબર M-56/670 માં એક પરિવાર રહે છે. આ બિલ્ડિંગના ધાબા પર આવેલી કોમન પાણીની ટાંકીમાં લાંબા સમયથી મોટું લીકેજ હતું. આ લીકેજના કારણે સતત પાણી ઉતરતા ઘરની દીવાલો અને છત એકદમ નબળી પડી ગઈ હતી. આજે બપોરના સમયે જ્યારે પરિવાર ઘરમાં હાજર હતો, ત્યારે અચાનક છતનો સિમેન્ટ-કોંક્રિટનો મોટો ભાગ ધડાકાભેર નીચે તૂટી પડ્યો હતો. જોતજોતામાં આખો રૂમ કાટમાળથી ભરાઈ ગયો હતો. જોકે, રાહતની વાત એ છે કે દંપતી થોડાક જ અંતર માટે બચી ગયું હતું અને કોઈ જાનહાનિ થઈ નથી.
રીડેવલપમેન્ટમાં વિલંબ અને રહીશોનો આક્રોશ
આ અકસ્માત બાદ અંબિકા એપાર્ટમેન્ટના અન્ય રહીશો પણ પોતાની સુરક્ષાને લઈ ભારે ચિંતામાં મુકાયા છે. સ્થાનિક લોકોનો આક્ષેપ છે કે બિલ્ડિંગ ખૂબ જ જૂની હોવાના કારણે તેની હાલત દિવસે ને દિવસે જર્જરિત બની રહી છે. આસપાસની અનેક સોસાયટીઓ સમયસર રીડેવલપમેન્ટ (Redevelopment) માં જઈ રહી છે, પરંતુ અંબિકા એપાર્ટમેન્ટ કોઈને કોઈ આંતરિક કે વહીવટી કારણોસર હજુ સુધી રીડેવલપમેન્ટમાં સામેલ થઈ શકી નથી. પરિણામે, અહીં રહેતા અસંખ્ય પરિવારો દરરોજ માથે મોત ભમતું હોય તેવા ભયજનક માહોલમાં જીવવા મજબૂર બન્યા છે.
Naranpura ની ‘એકતા સોસાયટી’ જેવી દુર્ઘટનાનો ડર
સ્થાનિક રહેવાસીઓએ અગાઉ નારણપુરાની જ ‘એકતા સોસાયટી’માં બનેલી કાળઝાળ દુર્ઘટનાનો ઉલ્લેખ કરતા જણાવ્યું હતું કે, ત્યાં પણ આ જ રીતે પાણીની ટાંકી તૂટી પડવાથી એક નિર્દોષ વ્યક્તિએ પોતાનો જીવ ગુમાવવો પડ્યો હતો. એ ભયાનક ઘટનામાંથી પણ જો તંત્ર કે સોસાયટીના સત્તાધીશો કોઈ પાઠ નહીં ભણે, તો આગામી ચોમાસામાં અહીં કોઈ મોટો ગંભીર અકસ્માત સર્જાઈ શકે છે.
હાલમાં રહીશોએ એકસૂરે માંગ કરી છે કે આ જોખમી ઈમારતની તાત્કાલિક ટેકનિકલ તપાસ (Structural Stability Test) કરાવવામાં આવે અને જરૂરી સુરક્ષાના પગલાં લેવાય. સાથે જ જનતાએ સવાલ ઉઠાવ્યો છે કે, જો ભવિષ્યમાં અહીં કોઈ મોટી દુર્ઘટના ઘટે તો તેની અસલી જવાબદારી કોણ લેશે?
આ પણ વાંચો: અમદાવાદના વસ્ત્રાલમાં અસામાજિક તત્વોનો આતંક: ભજન કરતી મહિલાઓ પર હુમલો…
આ પણ વાંચો: અમદાવાદમાં અસામાજિક તત્વો બેફામ, જાહેર રસ્તા પર મહિલાને માર માર્યો
આ પણ વાંચો: અમદાવાદમાં મંદિર પરિસરમાં અસામાજિક તત્વોનો અડ્ડો?દારૂ ગાંજાની મહેફિલ
