ગુજરાત વિધાનસભાની ચૂંટણીના પડધમ વાગી ચૂક્યા છે ,આજે ચૂંટણી પંચે રાજ્યમાં ચૂંટણીની તારીખની જાહેરાત કરી દીધી છે, છેલ્લા 27 વર્ષથી ગુજરાતમાં ભાજપનો સિંહાસન છે. ભાજપનો ગઢ માનવામાં આવે છે ગુજરાતને. ગુજરાતમાં 15મી વિધાનસભા ચૂંટણીની તારીખ 1 ડિસેમ્બરે અને પાંચ ડિસેમ્બરે જાહેર થઇ છે. અમદાવાદની એલિસબ્રિજની બેઠક પર ભાજપનો વર્ચસ્વ છે, આ બેઠક 1971 બાદ કોંગ્રેસ ક્યારે જીતી નથી.અમદાવાદની એલિસબ્રિજ બેઠક પર બીજા તબક્કામાં 5 ડિસેમ્બરે ચૂંટણીનું આયોજન કરવામાં આવ્યું છે. હાલમાં અમદાવાદ જિલ્લામાં કુલ 21 વિધાનસભા સીટ પર ચૂંટણી યોજવામાં આવશે. આ બેઠક પર ફરી એકવાર ભાજપનો કેસરિયો લહેરાવશે,અહિના મતદારો ભાજપ પર જ વિશ્વાસ રાખે છે.
અમદાવાદની એલિસબ્રિજ વિધાનસભા બેઠક પર હંમેશા ભાજપનો દબદબો રહે છે. ભાજપે આ વખતે રાકેશ શાહને ફરીવાર ટિકિટ આપી છે. એલિસબ્રિજ બેઠકના મતદાતાઓને ભાજપની કમિટેડ વોટબેંક ગણવામાં આવે છે. 1972 બાદ કોંગ્રેસે એલિસબ્રિજ બેઠક પર ક્યારેય જીત મેળવી નથી. 1962માં કોંગ્રેસના ઉમેદવાર ઈન્દુમતીબહેન જીત્યા હતાં. જે બાદ 1967માં અપક્ષમાં ચૂંટણી લડેલી આર.કે પટેલ ચૂંટણી લડ્યા અને જીત મેળવી હતી. તો 1972 બાદ એલિસબ્રિજ બેઠક પર નવ વખત ચૂંટણી યોજાઈ છે. પરંતુ એક પણ ચૂંટણીમાં કોંગ્રેસને જીત મળી નથી.
એલિસબ્રિજ બેઠક પર ભાજપના અનેક ઉમેદવારનો વિરોધ કરવામાં આવ્યો હોવા છતાં મતદારોનો ઝુકાવ ભાજપ તરફ હંમેશાની જેમ રહ્યો છે. 1972માં બાબુભાઈએ જંયત હરીભક્તને 14 હજાર મતથી હરાવ્યા હતાં. જે બાદ બાબુભાઈ જનતા પાર્ટીમાં જોડાયા હતાં. તો 1985માં પણ બાબુભાઈએ કોંગ્રેસના ઉમેદવારને ફરીવાર હરાવી 3566 મતના માર્જિનથી જીત મેળવી હતી. આમ એલિસબ્રિજ બેઠક પર સવર્ણ મતદારો હંમેશાની જેમ ભાજપ પર જીતનો કળશ ઢોળતા આવ્યાં છે.
ઉલ્લેખનીય છે કે વર્ષ 1972 બાદ કોંગ્રેસ એલિસબ્રિજ ક્યારેય જીતી શકી નથી. એલિસબ્રિજ વિધાનસભામાં સતત ત્રણ ટર્મથી રાકેશ શાહ ધારાસભ્ય છે, આ સીટ 1995થી ભાજપનો ગઢ રહી છે.નોંધનીય છે કે ગુજરાતમાં 14મી વિધાનસભાની ચૂંટણી 9મી ડિસેમ્બર, 2017 અને 14 ડિસેમ્બરના રોજ યોજાઈ હતી. 18મી ડિસેમ્બરના રોજ મતગણતરી કરવામાં આવી હતી. આ ચૂંટણીમાં ભારતીય જનતા પાર્ટીને બહુમતી મળી હતી. જોકે, 2012ની ચૂંટણીની સરખામણીમાં કોગ્રેસનો વોટ શેર અને બેઠકમાં વધારો થયો હતો. ગુજરાતમાં 1985 પછી કોંગ્રેસ પાર્ટીએ સૌથી વધારે બેઠક મેળવી હતી. આ ચૂંટણીમાં બીજેપીને 99 બેઠક મળી હતી. કૉંગ્રેસને 77 બેઠક મળી હતી. એનસીપીને એક બેઠક મળી હતી. બીટીપીને બે બેઠક મળી હતી. અપક્ષના ફાળે ત્રણ બેઠક રહી હતી.
ગુજરાત વિધાનસભાની ચૂંટણી 2022ને લઈને ચૂંટણી પંચે મતદાર સુધારણા કાર્યક્રમ બાદ મતદારોની અંતિમ યાદી જાહેર કરી હતી. પંચ તરફથી જાહેર કરવામાં આવેલી યાદીમાં, રાજ્યમાં કુલ 4,90,89,765 મતદારો નોંધાયા છે. આ સાથે જ, રાજ્યમાં 11,62,528 નવા મતદારો નોંધાયા છે. કુલ મતદારોમાં 2,53,36,610 પુરૂષ અને 2,37,51,738 મહિલા મતદારો સામે આવ્યા છે. જેમાં, 4 લાખથી વધુ વિકલાંગ મતદારો પણ નોંધાયા છે. કુલ મતદારોમાં 1,417 જેટલા ટ્રાન્સજેન્ડર મતદારોનો પણ સમાવેશ છે.
ગુજરાતમાં બે તબક્કામાં મતદાન યોજાશે. ગુજરાત ચૂંટણી માટે 1 અને 5 ડિસેમ્બરનાં રોજ મતદાન થશે. આ સાથે 8 ડિસેમ્બરના રોજ પરિણામ જાહેર કરવામાં આવશે. પ્રથમ તબક્કા માટે પાંચ નવેમ્બરે નોટિફિકેશન જાહેર થશે. જ્યારે, પ્રથમ તબક્કા માટે 14 નવેમ્બર સુધી ભરી શકાશે ફોર્મ. પ્રથમ તબક્કા માટે 15 નવેમ્બર સુધી ફોર્મ ચકાસવામાં આવશે. 17 નવેમ્બર સુધી ફોર્મ પરત ખેંચી શકાશે. બીજા તબક્કા માટે 10 નવેમ્બરે નોટિફિકેશન જાહેર થશે. જેમાં 17 નવેમ્બર સુધી ફોર્મ ભરી શકાશે. જ્યારે 18 નવેમ્બરે ફોર્મ ચકાસણી હાથ ધરાશે અને 21 તારીખ સુધી ફોર્મ પરત ખેંચી શકશે
