બંગાળમાં બહુમતીથી જીત્યા બાદ ટીએમસીમાં વિપક્ષી પાર્ટીઓના નેતાઓ જોડાઇ રહ્યા છે. TMC ચીફ મમતા બેનર્જી જેવા દિલ્હી પહોંચ્યા કે તરત જ તેમને મળવા નેતાઓ ત્યાં પહોચી ગયા હતાં. સૌથી પહેલા જેડીયુના પૂર્વ નેતા પવન વર્મા મમતાને મળ્યા બાદ ટીએમસીમાં જોડાયા હતા. આ પછી કોંગ્રેસ નેતા કીર્તિ આઝાદ અને રાહુલ ગાંધીના નજીકના ગણાતા અશોક તંવર પણ ટીએમસીમાં જોડાયા.
કોંગ્રેસ નેતા કીર્તિ આઝાદ આજે TMCમાં જોડાયા છે. મમતા બેનર્જીને મળ્યા બાદ તેઓ ટીએમસીમાં જોડાયા હતા. આઝાદે કહ્યું, મને એ કહેતા આનંદ થાય છે કે મમતા બેનર્જીના નેતૃત્વમાં હું દેશના વિકાસ માટે કામ કરીશ. આજે દેશને તેમના જેવા વ્યક્તિત્વની જરૂર છે જે દેશને સાચી દિશા આપી શકે.
રાહુલ ગાંધીના નજીકના ગણાતા અશોક તંવર પણ મંગળવારે તૃણમૂલ કોંગ્રેસમાં જોડાયા હતા. ટીએમસીમાં જોડાયા બાદ કોંગ્રેસના પૂર્વ નેતા અશોક તંવરે કહ્યું કે આજે એક જ નેતા છે જે ભાજપને હરાવી શકે છે. બંગાળમાં મમતા બેનર્જીએ તેમને હરાવ્યા હતા. જેમ ખેડૂતોએ તેમની માંગણીઓ માટે આ સરકારને ઝુકાવી છે, મને લાગે છે કે વિપક્ષોએ પણ એકસાથે આવીને 2024 માં ભાજપને હરાવવાની જરૂર છે.
હરિયાણા કોંગ્રેસના ભૂતપૂર્વ વડા અશોક તંવરે ફેબ્રુઆરી મહિનામાં રાષ્ટ્રીય અપના ભારત મોરચા નામની નવી રાજકીય પાર્ટી શરૂ કરી હતી. અશોક તંવર રાહુલ ગાંધીની નજીકના નેતાઓમાંના એક છે. તંવર 2009 થી 2014 સુધી સિરસાથી સાંસદ હતા અને હરિયાણા વિધાનસભા ચૂંટણીના થોડા દિવસો પહેલા ઓક્ટોબર 2019માં કોંગ્રેસ છોડી દીધી હતી. ટિકિટ વિતરણમાં ગેરરીતિઓ અને ભ્રષ્ટાચારનો આક્ષેપ કરીને, તેમણે પાર્ટી નેતૃત્વ સામે બળવો કર્યો હતો અને કોંગ્રેસના વડાના નિવાસસ્થાન 10 જનપથની બહાર વિરોધ પણ કર્યો હતો.
Former Congress leader Ashok Tanwar joins Trinamool Congress in the presence of party chief and West Bengal CM Mamata Banerjee in New Delhi pic.twitter.com/uacx5seklE
— ANI (@ANI) November 23, 2021
પૂર્વ જનતા દળ (યુ)ના નેતા પવન વર્મા પણ આજે મમતાને મળ્યા હતા અને ટીએમસીમાં જોડાયા હતા. તે જ સમયે, ગીતકાર જાવેદ અખ્તર પણ આજે દિલ્હીમાં મમતા બેનર્જીને મળ્યા હતા. પવન વર્માએ કહ્યું કે વર્તમાન રાજકીય પરિસ્થિતિ અને મમતા બેનર્જીની તાકાતને જોતા મેં ટીએમસીમાં જોડાવાનો નિર્ણય કર્યો છે.
ગીતકાર જાવેદ અખ્તર અને રાજકારણી સુધીન્દ્ર કુલકર્ણી મંગળવારે મમતા બેનર્જીને મળવા દિલ્હી પહોંચ્યા હતા. બંને પશ્ચિમ બંગાળના મુખ્યમંત્રીને મમતા બેનર્જીના ભત્રીજા અભિષેક બેનર્જીના દિલ્હી ખાતેના નિવાસસ્થાને મળ્યા હતા.