Banaskantha Weather Update: ગુજરાતમાં ચાલુ વર્ષે પડી રહેલી કાળઝાળ ગરમી વચ્ચે હવામાન વિભાગની આગાહી વરદાન સાબિત થઈ રહી હોય તેમ રાજ્યના અલગ-અલગ વિસ્તારોમાં કુદરતી વાતાવરણમાં મોટા પલટા આવી રહ્યા છે. ઉત્તર ગુજરાતના બનાસકાંઠા જિલ્લાના વાતાવરણમાં આજે મોડી સાંજે અચાનક એકાએક મોટો અને ચોંકાવનારો પલટો જોવા મળ્યો હતો. દિવસભર સૂર્યદેવના પ્રકોપ અને અસહ્ય ઉકળાટ તેમજ બફારાથી ત્રાહિમામ પોકારી ગયેલા સ્થાનિક લોકોને મોડી સાંજે ગરમીમાંથી મોટી રાહત મળી હતી, પરંતુ આ અચાનક આવેલા બદલાવે ચિંતા પણ વધારી છે.
Banaskantha : ધૂળની ડમરીઓ સાથે જાણે ચોમાસું બેસી ગયું!
મળતી માહિતી અનુસાર, બનાસકાંઠા જિલ્લા મથક પાલનપુર ઉપરાંત વડગામ, દાંતા અને તેની આસપાસના ગ્રામ્ય વિસ્તારોમાં મોડી સાંજે અચાનક આકાશ કાળાડિબાંગ વાદળોથી ઘેરાઈ ગયું હતું. વાદળછાયા વાતાવરણની સાથે જ અચાનક તેજ ગતિએ મિની વાવાઝોડા જેવો ફૂંકાવા લાગેલો પવન શરૂ થતાં સમગ્ર પંથકમાં જાણે ભરઉનાળે ચોમાસું બેસી ગયું હોય, તેવી વરસાદી માહોલ જેવી સ્થિતિ સર્જાઈ હતી. પવનની ગતિ એટલી તેજ હતી કે પાલનપુર અને આસપાસના હાઈવે વિસ્તારોમાં ધૂળની ડમરીઓ ઉડતી જોવા મળી હતી, જેના કારણે વાહનચાલકોને પણ થોડીવાર માટે મુશ્કેલી પડી હતી. જોકે, આ પવનને કારણે વાતાવરણમાં અચાનક ઠંડક પ્રસરી ગઈ હતી.
Banaskantha : ખેડૂતોના જીવ તાળવે ચોંટ્યા
દિવસભરના અસહ્ય ઉકળાટ બાદ સાંજે ઠંડો પવન ફૂંકાતા સામાન્ય નાગરિકોને ગરમીથી ચોક્કસપણે આંશિક રાહત મળી છે અને તાપમાનનો પારો પણ નીચે આવ્યો છે. જોકે, બીજી તરફ ઉનાળાની ઋતુમાં અચાનક વાતાવરણમાં આવી ગયેલા આ મોટા પલટાને કારણે કૃષિ પાકો અને કટોકટીના સમયે ઊભા પાકને લઈને જગતના તાત એટલે કે ખેડૂતોમાં ભારે ચિંતાની લાગણી જોવા મળી રહી છે. ઉનાળુ પાકને નુકસાન થવાની ભીતિથી ખેડૂતો મુશ્કેલીમાં મુકાયા છે.
Banaskantha ; હજુ પણ વરસાદની સંભાવના
હવામાન વિભાગના જણાવ્યા અનુસાર, હાલમાં વેસ્ટર્ન ડિસ્ટર્બન્સ (Western Disturbance) સક્રિય થવાને કારણે વાતાવરણમાં આ ફેરફાર નોંધાયો છે. આગામી દિવસોમાં ઉત્તર ગુજરાતના બનાસકાંઠા સહિતના સરહદી વિસ્તારોમાં ગાજવીજ અને તેજ પવન સાથે હળવો વરસાદ કે માવઠું પડવાની સંભાવના પણ નકારી શકાતી નથી. વન વિભાગ અને સ્થાનિક પ્રશાસન પણ સ્થિતિ પર નજર રાખી રહ્યું છે.
આ પણ વાંચો: બનાસકાંઠાના સુઈગામમાં 8 કલાકમાં 8 ઈંચ વરસાદ
આ પણ વાંચો: બનાસકાંઠા વિસ્તારમાં ફરી કમોસમી વરસાદ, મોટાભાગનો લણાયેલ મગફળીનો પાક સડી ગયો
આ પણ વાંચો: બનાસકાંઠામાં ભારે વરસાદે વેર્યો વિનાશ, શાળાઓ બંધ અને લોકોને સ્થળાંતર કરાવાયા…
