Bhavnagar News: શહેરના દેવબાગ અને વિજયરાજનગર વિસ્તારમાં અશાંત ધારો (Bhavnagar Ashant Dhara) લાગુ હોવા છતાં નિયમોના ભંગ અને મિલકતોમાં ગેરકાયદેસર વસવાટના આક્ષેપોને લઈને સ્થાનિક રહીશો દ્વારા જિલ્લા કલેક્ટર સમક્ષ રજૂઆત કરવામાં આવી છે. રહીશોએ આવેદનપત્ર આપી સમગ્ર મામલે સ્થળ તપાસ કરી નિયમ મુજબ કાર્યવાહી કરવાની માંગ કરી છે.

સ્થાનિકોના જણાવ્યા પ્રમાણે, અશાંત ધારા હેઠળ આવતા વિસ્તારમાં મિલકતોના વેચાણ અને હસ્તાંતરણ અંગેના નિયમોનું પાલન થતું નથી તેવી ફરિયાદો સામે આવી રહી છે. આ ઉપરાંત કેટલાક મકાનો, ફ્લેટ અને પ્લોટમાં નિયમવિરુદ્ધ વસવાટ થતો હોવાનો પણ આક્ષેપ કરવામાં આવ્યો છે.

દેવબાગના રહીશોની મિલકત સોદા અંગે ફરિયાદ

દેવબાગ સોસાયટીના પ્રમુખ જશપાલસિંહ ગોહિલના જણાવ્યા પ્રમાણે, વિસ્તારમાં અશાંત ધારો (Bhavnagar Ashant Dhara) લાગુ હોવા છતાં કેટલાક હિન્દુ માલિકીની મિલકતોમાં અન્ય સમુદાયના પરિવારો ગેરકાયદેસર રીતે રહેતા હોવાની ફરિયાદો મળી છે. તેમણે જણાવ્યું કે દેવબાગ વિસ્તારમાં દેવનાથ મહાદેવનું મંદિર આવેલું હોવાથી ભવિષ્યમાં કાયદો અને વ્યવસ્થાની સ્થિતિ ઊભી ન થાય તે માટે અગાઉ પણ મામલતદાર કચેરી અને પોલીસ સમક્ષ લેખિત રજૂઆત કરવામાં આવી હતી. સ્થાનિકોએ મિલકતોના નિયમવિરુદ્ધ વ્યવહારો અટકાવવા માટે તંત્રનું ધ્યાન દોર્યું હોવા છતાં કેટલાક પ્લોટના વ્યવહારો થયા હોવાનો આક્ષેપ કર્યો છે.

Bhavnagar Ashant Dhara: પ્લોટ નંબર અને સ્થળ સાથે તપાસની માંગ

સ્થાનિક રહીશોએ કલેક્ટર સમક્ષ ચોક્કસ પ્લોટ નંબર અને સ્થળની વિગતો રજૂ કરીને સમગ્ર મામલે સ્થળ તપાસ કરવાની માંગ કરી છે. તેમની માંગ છે કે અશાંત ધારા હેઠળ મિલકતોના હસ્તાંતરણ અને વસવાટને લગતા નિયમોનું ઉલ્લંઘન થયું હોય તો જવાબદાર લોકો સામે કાયદેસરની કાર્યવાહી કરવામાં આવે. સ્થાનિકોએ ગેરકાયદેસર રીતે રહેતા લોકો સામે FIR નોંધવા અને નિયમ મુજબ કાર્યવાહી કરવાની પણ માંગ કરી છે.

Bhavnagar Ashant Dhara: કાર્યવાહી નહીં થાય તો આંદોલનની ચીમકી

રહીશોએ તંત્રને રજૂઆત કરી છે કે સમગ્ર મામલે વહેલી તકે યોગ્ય તપાસ અને કાર્યવાહી કરવામાં આવે. જો તેમની ફરિયાદ અંગે સમયસર પગલાં લેવામાં નહીં આવે તો આગામી દિવસોમાં ઉગ્ર આંદોલનાત્મક કાર્યક્રમો કરવાની ચીમકી પણ આપવામાં આવી છે. જોકે, સ્થાનિકો દ્વારા કરવામાં આવેલા આક્ષેપોની સત્તાવાર તપાસ અને સંબંધિત તંત્રની કાર્યવાહી બાદ જ સમગ્ર મામલાની હકીકત સ્પષ્ટ થશે.

Bhavnagar Ashant Dhara: વિજયરાજનગરમાં નવા બાંધકામ અંગે પણ વિરોધ

બીજી તરફ વડવા ‘અ’ વિસ્તારના વિજયરાજનગરના રહીશ અર્જુનસિંહ અરુણસિંહ જાડેજાએ પણ અશાંત ધારા સંબંધિત મુદ્દો ઉઠાવ્યો છે. તેમના જણાવ્યા પ્રમાણે ડેરી રોડ વિસ્તારમાં અશાંત ધારો (Bhavnagar Ashant Dhara) લાગુ થયા બાદ પણ નવા રહેણાક બાંધકામની તૈયારી ચાલી રહી છે. અહીં 2 BHK અને 3 BHK ફ્લેટની સ્કીમ લાવવાની તૈયારી હોવાનો તેમણે આક્ષેપ કર્યો છે. આ અંગે અગાઉ મામલતદાર અને SDM સમક્ષ પણ અરજી કરવામાં આવી હોવાનું તેમણે જણાવ્યું હતું.

Bhavnagar Ashant Dhara: કલેક્ટર અને SDM સમક્ષ રૂબરૂ રજૂઆત

દેવબાગ અને વિજયરાજનગરના રહીશો દ્વારા આ મુદ્દે એકસાથે જિલ્લા કલેક્ટર અને SDM સમક્ષ રૂબરૂ હાજર થઈ આવેદનપત્ર આપવામાં આવ્યું હતું. રહીશોએ અશાંત ધારા હેઠળના નિયમોનું કડક પાલન થાય, મિલકતના વ્યવહારોની તપાસ કરવામાં આવે અને નિયમવિરુદ્ધ પ્રવૃત્તિ જણાય તો કાયદેસરની કાર્યવાહી કરવામાં આવે તેવી માંગ કરી છે. હવે સ્થાનિકોની રજૂઆત બાદ જિલ્લા તંત્ર અને સંબંધિત અધિકારીઓ દ્વારા આ મામલે શું તપાસ અને કાર્યવાહી કરવામાં આવે છે તેના પર સૌની નજર છે.

આ પણ વાંચો:ભાવનગરમાં અશાંત ધારા મુદ્દે હિન્દુ સંગઠનોનું શક્તિ પ્રદર્શન, કલેક્ટરને આવેદનપત્ર આપી કડક કાર્યવાહી માગી

આ પણ વાંચો:ખાનપુરના ‘બાગબાન’ પ્રોજેક્ટ પર હાઈકોર્ટની રોક, અશાંત ધારામાં ગેરરીતિનો આક્ષેપ

આ પણ વાંચો:અશાંત ધારાનો અલમ નહી તો ચૂંટણીનો બહિષ્કાર -મહેસાણા ખાતે લાગ્યા બેનરો