Not Set/ “ઈલેક્શન ઇમ્પેકટ” : ૨ મહિના બાદ પેટ્રોલના ભાવમાં થયો આટલા રૂપિયાનો વધારો

નવી દિલ્હી,

પાંચ રાજ્યોમાં યોજાયેલી વિધાનસભાની ચૂંટણી સમાપ્ત થયા બાદ હવે વધુ એકવાર પેટ્રોલના ભાવમાં વધારો કરવામાં આવ્યો છે. ઓઈલ કંપનીઓ દ્વારા ૧ લીટર પેટ્રોલમાં ૯ પૈસાનો વધારો ઝીંકાયો છે. આ સાથે જ રાજધાની દિલ્હીમાં એક લીટર પેટ્રોલ ૭૧.૨૯ રૂપિયા થયું છે.

જોવામાં આવે તો, પેટ્રોલના ભાવમાં કરાયેલો આ વધારો ૨ મહિના બાદ કરાયો છે. આ પહેલા ૧૮ ઓક્ટોબરના રોજ ભાવવધારો કરવામાં આવ્યો હતો. જો કે ડીઝલના ભાવમાં કોઈ વધારો કરાયો નથી.

અત્રે ઉલ્લેખનીય છે કે, મધ્યપ્રદેશ, રાજસ્થાન, છત્તીસગઢ, મિઝોરમ અને તેલંગાણામાં યોજાનારી વિધાનસભાની ચૂંટણીને લઈ છેલ્લા ૨ મહિના સુધી પેટ્રોલના ભાવમાં કોઈ વધારો કરવામાં આવ્યો ન હતો.

બીજી બાજુ ભારત એ પોતાની મોટા ભાગની જરૂરીયાતનું પેટ્રોલ અને ડીઝલ બહારના દેશોમાંથી આયાત કરે છે, ત્યારે આંતરરાષ્ટ્રીય માર્કેટમાં ક્રુડ ઓઈલના ભાવમાં થતો વધારો તેમજ અમેરિકી ડોલર સામે રૂપિયામાં થયેલો ઘટાડો પણ આ ભાવવધારા માટે જવાબદાર ગણવામાં આવે છે.