કોકા-કોલા ભારતમાં 1996ના ક્રિકેટ વર્લ્ડ કપમાં પણ ઓફિશિયલ પાર્ટનર હતી, તે આગામી ક્રિકેટ વર્લ્ડ કપ માટે ઇન્ટરનેશનલ ક્રિકેટ કાઉન્સિલ (ICC) નું સત્તાવાર સોફ્ટ ડ્રિંક પાર્ટનર હશે.
આ વર્ષે ભારતમાં યોજાનારા ક્રિકેટ વર્લ્ડ કપ માટે માત્ર ટીમો જ નહીં પરંતુ વિશ્વભરની લોકપ્રિય બ્રાન્ડ્સ પણ તૈયારી કરી રહી છે. દરમિયાન, ક્રિકેટના ચાહકો માટે, સત્તાવાર ઠંડા પીણાના ભાગીદારનો ઘટસ્ફોટ થયો છે. વિશ્વની અગ્રણી કોલા કંપની કોકા-કોલાને ક્રિકેટ વર્લ્ડ કપની ઓફિશિયલ પાર્ટનર બનાવવામાં આવી છે. તમને જણાવી દઈએ કે આ વર્ષે 5 ઓક્ટોબરથી ભારતમાં ક્રિકેટનો મહાકુંભ એટલે કે વિશ્વ કપ શરૂ થઈ રહ્યો છે. પ્રથમ મેચ ઈંગ્લેન્ડ અને ન્યુઝીલેન્ડ વચ્ચે અમદાવાદમાં રમાશે.
1996 પછી ફરીથી સત્તાવાર ભાગીદાર
સોફ્ટ ડ્રિંક્સ કંપની કોકા-કોલા (Coca-cola)એ શુક્રવારે જણાવ્યું હતું કે તે આગામી ક્રિકેટ વર્લ્ડ કપ માટે ઇન્ટરનેશનલ ક્રિકેટ કાઉન્સિલ (ICC)ની સત્તાવાર સોફ્ટ ડ્રિંક પાર્ટનર હશે. તમને જણાવી દઈએ કે કોકા-કોલા ભારતમાં 1996ના ક્રિકેટ વર્લ્ડ કપમાં પણ ઓફિશિયલ પાર્ટનર હતી. આ વર્ષે ઓક્ટોબર-નવેમ્બરમાં યોજાનાર ODI ક્રિકેટ વર્લ્ડ કપ માટે કોકા-કોલા અને ICC ફરી એકવાર એકસાથે આવી રહ્યાં છે. “આ ભાગીદારીના ભાગરૂપે, કોકા-કોલા આઈસીસીનું વિશિષ્ટ સોફ્ટ ડ્રિંક પાર્ટનર બની ગયું છે,” એક સંયુક્ત નિવેદનમાં જણાવવામાં આવ્યું છે.
મેદાન પર ફક્ત આ બ્રાન્ડ જ જોવા મળશે
કોકા-કોલાના ઓફિશિયલ પાર્ટનર બનવાનો અર્થ એ છે કે મેચ દરમિયાન સ્ટેડિયમમાં આ જ બ્રાન્ડ જોવા મળશે. ડ્રિંક બ્રેકની સાથે અન્ય સ્થળોએ ગ્રાહકોને આ કંપનીના માત્ર કોલ્ડ ડ્રિંક્સ જ ઉપલબ્ધ થશે. ભારતના વાઇસ પ્રેસિડેન્ટ (માર્કેટિંગ) અર્નબ રોયે કહ્યું, “આઈસીસી ક્રિકેટ વર્લ્ડ કપ એ દેશની સૌથી મોટી ક્રિકેટ ઈવેન્ટ છે. ICC સાથેની ભાગીદારી અમને અમારા ગ્રાહકો, ઉપભોક્તા, બ્રાન્ડ અને ક્રિકેટને એકસાથે લાવવાની એક મોટી તક પૂરી પાડે છે.” ICCના ચીફ કોમર્શિયલ ઓફિસર અનુરાગ દહિયાએ જણાવ્યું હતું કે, “અમે કોકા-કોલા સાથેની અમારી ભાગીદારીથી રોમાંચિત છીએ.” આ વર્લ્ડ કપની પ્રથમ મેચ ઈંગ્લેન્ડ અને ન્યુઝીલેન્ડ વચ્ચે 5 ઓક્ટોબરના રોજ અમદાવાદમાં રમાશે.
પેપ્સીએ અભિયાન ચલાવ્યું હતું નથિંગ ઓફિશિયલ
આ વાત છે 1996ના વર્લ્ડકપની. ત્યારે પણ કોકા કોલાને સત્તાવાર ભાગીદાર બનાવવામાં આવ્યું હતું. તે સમયે પેપ્સીએ તેની વિરૂદ્ધ અલગથી અભિયાન શરૂ કર્યું હતું. પેપ્સીએ નથિંગ ઓફિશિયલ અબાઉટ ઇટ નામની એક અલગ ઝુંબેશ ચલાવી હતી જેમાં તેના વિશ્વ કપના ઘણા ખેલાડીઓ અને કોકા-કોલાની મજાક ઉડાડવામાં આવી હતી. એવું માનવામાં આવે છે કે 1996નું યુદ્ધ ફરી એકવાર 2023માં પ્રચાર યુદ્ધના રૂપમાં જોવા મળી શકે છે.
