Ahemdabad News: ખેડૂત આંદોલન વચ્ચે હવે આક્ષેપ અને પ્રત્યાઆક્ષેપનો નવો વિવાદ સામે આવ્યો છે. હકાભા ગઢવીએ ખેડૂત આગેવાન નિલેશ એરવાડિયા સામે ગંભીર આરોપો લગાવતા દાવો કર્યો છે કે આંદોલન દરમિયાન ખેડૂતો સાથે વિશ્વાસઘાત કરવાનો પ્રયાસ થયો હતો. જોકે, નિલેશ એરવાડિયાએ આ તમામ આક્ષેપોને પાયાવિહોણા ગણાવી ફગાવી દીધા છે.
Farmer Protest: નિલેશ એરવાડિયાએ આંદોલન કરતા ખેડૂતો સાથે વિશ્વાસઘાત કર્યો છે- હકાભા ગઢવી
હકાભા ગઢવી (Hakabha Gadhvi)એ મીડિયા સમક્ષ દાવો કર્યો કે શરૂઆતમાં તેઓ આ મુદ્દે મૌન રહ્યા હતા, કારણ કે તેમને લાગતું હતું કે જો તેઓ બોલશે તો ખેડૂત આંદોલનને નુકસાન થઈ શકે. તેમના કહેવા મુજબ, જ્યારે તેમણે સરકાર સાથે ચર્ચા કરવા જવાની વાત કરી ત્યારે નિલેશ એરવાડિયાએ કથિત રીતે કહ્યું હતું કે સરકાર પાસેથી મોટી રકમ લેવાની વાત થઈ શકે છે અને તેમાં તેમને પણ હિસ્સો આપવામાં આવશે. હકાભા ગઢવીએ આ વાતથી તેઓ આશ્ચર્યચકિત થઈ ગયા હોવાનું જણાવ્યું અને ત્યારબાદ પોતે આંદોલનથી દૂર રહેવાનું નક્કી કર્યું હોવાનું કહ્યું.
તેમણે વધુમાં જણાવ્યું કે ખેડૂતોના હિતમાં સત્ય બહાર લાવવું જરૂરી હતું અને તેથી જ તેમણે આ મુદ્દે ખુલાસો કર્યો છે. તેમના જણાવ્યા મુજબ, આક્ષેપો જાહેર કર્યા બાદ તેમને માનસિક રીતે હળવાશ અનુભવાઈ રહી છે.
નિલેશ એરવાડિયાએ હકાભા ગઢવીના તમામ આરોપો ફગાવ્યા
બીજી તરફ ખેડૂત આગેવાન નિલેશ એરવાડિયાએ હકાભા ગઢવીના તમામ આરોપોને સખત શબ્દોમાં નકારી કાઢ્યા છે. તેમણે જણાવ્યું કે છેલ્લા કેટલાક દિવસોથી ખેડૂત આંદોલનને નબળું પાડવાના પ્રયાસો થઈ રહ્યા છે. તેમના દાવા મુજબ, આંદોલન સાથે જોડાયેલા લોકોને વિવિધ પ્રકારની લાલચ આપવામાં આવી રહી છે તેમજ ધમકીઓ પણ મળી રહી છે.
એરવાડિયાએ વધુમાં જણાવ્યું કે હકાભા ગઢવી દ્વારા કરવામાં આવેલા આક્ષેપો સંપૂર્ણપણે ખોટા અને પાયાવિહોણા છે. તેમના મત મુજબ, તેમની વિશ્વસનીયતાને નુકસાન પહોંચાડવા માટે આ પ્રકારના નિવેદનો કરવામાં આવી રહ્યા છે. હાલ આ સમગ્ર મામલે બંને પક્ષોએ એકબીજા સામે ગંભીર આક્ષેપો કર્યા છે.
જોકે, મોરબી જિલ્લાના જેતપર ખાતે ચાલી રહેલા આંદોલનને લઈને વિવાદો વચ્ચે પણ જનસમર્થન યથાવત હોવાનું આંદોલનકારીઓએ દાવો કર્યો છે. આંદોલન સ્થળે મોટી સંખ્યામાં લોકો ઉમટી પડ્યા હોવાનું જણાવવામાં આવ્યું છે. આયોજકોના જણાવ્યા અનુસાર વિવિધ જિલ્લાઓમાંથી લોકો આંદોલનને સમર્થન આપવા માટે પહોંચી રહ્યા છે.
આ પણ વાંચો:ખેડૂત આંદોલન પર સરકાર એક્શનમાં! સતત બેઠકો વચ્ચે મોટી જાહેરાતની શક્યતા
