અમદાવાદ,
રાજ્યમાં ઠંડીનો ચમકારો લોકો અનુભવી રહ્યા છે. જમ્મુ-કાશ્મીર અને હિમાચલ પ્રદેશમાં છેલ્લા કેટલાક દિવસથી થઈ રહેલી હિમવર્ષાના કારણે સમગ્ર ઉત્તરભારતમાં હાડ થીજાવી દે તેવી ઠંડી પડી રહી છે અને તેની અસરના પગલે ગુજરાતના વિવિધ શહેરોના તાપમાનમાં પણ સતત ઘટાડો નોંધાયો છે.
ગુજરાતમાં ઠંડીનું જોર યથાવત્ જોવા મળી રહ્યું છે. ત્યારે અમદાવાદમાં પણ વહેલી સવારથી ઠંડીના પ્રમાણમાં વધારો જોવા મળી રહ્યો છે. મહત્વનું છે કે ડીસા, નલિયા સહિત શહેરમાં તાપમાનનો પારો ગગડ્યો હતો.
જેને લઇને ત્યાં ઠંડીનું પ્રમાણ ખૂબ જ વધુ જોવા મળી રહ્યું છે. જો અમદાવાદની વાત કરીએ તો અમદાવાદમાં પણ આગામી દિવસમાં 2 થી 3 ડિગ્રી સુધી તાપમાન ઘટશે. જેથી ઠંડીનો ચમકારો વધુ જોવા મળશે.
રાજ્યના અનેક શહેરોમાં ઠંડીનો ચમકારો જોવા મળી રહ્યો છે. ત્યારે નલિયા ૧૨ ડિગ્રી સાથે રાજ્યનું સૌથી ઠંડુ શહેર બન્યું છે. જ્યારે અમદાવાદનું તાપમાન પણ ૧૪ ડિગ્રી આસપાસ નોંધાયું હતું. ત્યારે આગામી 24 કલાક દરમિયાન રાજ્યમાં ઠંડીનો પારો વધશે તેવી હવામાન ખાતાએ આગાહી કરી છે.
વધી રહેલી ઠંડીથી બચવા લોકોએ સવારથી જ ગરમ વસ્ત્રોનો અને તાપણાનો સહારો લીધો હતો. તેમજ સવારથી ગુલાબી ઠંડીમાં વિવિધ ગાર્ડનમાં જઈને કસરત કરતાં જોવા મળ્યા છે. ઉપરાંત, વહેલી સવારથી ફૂંકાતા ઠંડા પવન અને રાજ્યના કેટલાક વિસ્તારોમાં રહેલા ગાઢ ઘુમ્મસના કારણે વાહનચાલકોએ હાલાકી ભોગવવી પડી હતી.
