Mahesana News: મહેસાણા જિલ્લાના કડીમાં નિવૃત્ત શિક્ષક સાથે સાયબર ફ્રોડ (Cyber Fraud)ની ઘટના સામે આવી છે. કડીની અયોધ્યાનગર સોસાયટીમાં રહેતા 63 વર્ષીય દશરથભાઈ ગાંડાલાલ પટેલના SBI બેંક ખાતામાંથી OTP આપ્યા વગર કુલ 1,85,510 રૂપિયા ઉપડી ગયા હોવાની ફરિયાદ કડી પોલીસ મથકે નોંધાઈ છે.
Cyber Fraud : નિવૃત્ત શિક્ષકના ખાતામાંથી તબક્કાવાર રૂપિયા ઉપડ્યા
ફરિયાદ મુજબ દશરથભાઈ પટેલનું ખાતું કડીના પટેલ ભુવન ખાતે આવેલી સ્ટેટ બેંક ઓફ ઈન્ડિયા (SBI Account Fraud)માં છે અને આ ખાતામાં તેમનું પેન્શન જમા થાય છે. 9 સપ્ટેમ્બરે રાત્રે આશરે 9 વાગ્યે તેમના મોબાઈલ પર બેંકમાંથી 30,000 ઉપડી ગયાનો મેસેજ આવ્યો હતો. મેસેજ મળતાં જ તેમણે YONO SBI એપમાં ખાતાની તપાસ કરી હતી. તપાસ કરતાં ખાતામાં માત્ર 5 રુપિયા બેલેન્સ હોવાનું જોવા મળ્યું હતું.
7 અને 8 સપ્ટેમ્બરે લાખો રૂપિયા ઉપડી ગયા
વધુ તપાસ કરતાં જાણવા મળ્યું કે 7 અને 8 સપ્ટેમ્બર દરમિયાન તેમના ખાતામાંથી અલગ-અલગ ટ્રાન્ઝેક્શન દ્વારા તબક્કાવાર રકમ ઉપાડવામાં આવી હતી. તમામ ટ્રાન્ઝેક્શન મળીને કુલ 1,85,510 રૂપિયા ખાતામાંથી ઉપડી ગયા હતા. ફરિયાદમાં દશરથભાઈએ જણાવ્યું છે કે તેમણે કોઈ અજાણ્યા વ્યક્તિને OTP આપ્યો નહોતો, તેમ છતાં તેમના ખાતામાંથી લાખો રૂપિયા ઉપડી ગયા હતા. ઘટનાની જાણ થતાં તેમણે પોતાના પુત્ર નિતીનને માહિતી આપી હતી. ત્યારબાદ સાયબર ક્રાઈમ હેલ્પલાઈન નંબર 1930 પર સંપર્ક કરવામાં આવ્યો હતો.
પછી બેંકમાં જઈને મેનેજરને અરજી આપવામાં આવી અને ખાતાનું બેંક સ્ટેટમેન્ટ પણ મેળવવામાં આવ્યું હતું.
કડી પોલીસમાં ફરિયાદ નોંધાઈ
ખાતામાંથી ગાયબ થયેલી રકમ પરત ન મળતાં આખરે દશરથભાઈએ કડી પોલીસ (Kadi Police) મથકે અજાણ્યા શખસ સામે ફરિયાદ નોંધાવી હતી. ફરિયાદના આધારે પોલીસે ગુનો નોંધી વધુ તપાસ હાથ ધરી છે. હાલ પોલીસ દ્વારા ખાતામાંથી થયેલા ટ્રાન્ઝેક્શન, ટ્રાન્ઝેક્શન આઈડી અને અન્ય વિગતોના આધારે તપાસ કરવામાં આવી રહી છે. પૈસા કેવી રીતે ઉપાડવામાં આવ્યા અને કોણે ઉપાડ્યા તે તપાસ બાદ જ સ્પષ્ટ થશે.
OTP વગર પણ સાયબર ફ્રોડ શક્ય?
આ ઘટનામાં ફરિયાદી તરફથી OTP શેર ન કર્યો હોવાનો દાવો કરવામાં આવ્યો છે. જોકે, માત્ર OTP ન આવ્યો હોવાના આધારે ફ્રોડ કેવી રીતે થયો તે નક્કી કરી શકાય નહીં. બેંકિંગ એપ, કાર્ડ, UPI, ક્રેડેન્શિયલ્સ અથવા અન્ય કોઈ માધ્યમ સાથે ચેડાં થયા કે કેમ તે પોલીસ અને બેંકની તપાસ બાદ સ્પષ્ટ થઈ શકે છે.
આ પણ વાંચો: એક APK અને આખો ફોન જોખમમાં! MHAની ચેતવણી, પોર્ન એપના નામે સાયબર ફ્રોડથી બચો
આ પણ વાંચો: ચાંગોદરમાં સાયબર ફ્રોડ: બોસ બની એકાઉન્ટન્ટ પાસે ₹3 કરોડ ટ્રાન્સફર કરાવ્યા, 1 મિનિટમાં ભાંડો ફૂટ્યો
આ પણ વાંચો: ₹1071 કરોડના સાયબર ફ્રોડનો પર્દાફાશ: ચાઈલ્ડ પોર્નોગ્રાફીના નામે ડિજિટલ એરેસ્ટ, 25 વર્ષના આરોપીની ધરપકડ
