Deesa Gold Medalist Drugs Case: બનાસકાંઠા જિલ્લાના ડીસા શહેરમાંથી શૈક્ષણિક જગતને સ્તબ્ધ કરી દેતો અને લાલબત્તી સમાન એક કિસ્સો પ્રકાશમાં આવ્યો છે. ડીસામાં નશાના કાળા કારોબારનો પર્દાફાશ કરતા બનાસકાંઠા સ્પેશિયલ ઓપરેશન ગ્રુપની (SOG) ટીમે લાખો રૂપિયાની કિંમતના પ્રતિબંધિત મેફેડ્રોન (MD) ડ્રગ્સના જથ્થા સાથે બે શખ્સોની ધરપકડ કરી છે. આ સમગ્ર ઘટનામાં સૌથી ચોંકાવનારી અને ચિંતાજનક બાબત એ છે કે, ઝડપાયેલા આરોપીઓ પૈકીનો મુખ્ય સૂત્રધાર સામાન્ય ગુનેગાર નથી, પરંતુ LLB અને M.Phil જેવી ઉચ્ચ ડિગ્રી ધરાવતો અને યુનિવર્સિટીનો ગોલ્ડ મેડાલિસ્ટ યુવાન નીકળ્યો છે!
Deesa : SOG પોલીસે વોચ ગોઠવીને દબોચ્યા
ઘટનાની વિગતવાર માહિતી અનુસાર, બનાસકાંઠા એસઓજી પોલીસની ટીમને પેટ્રોલિંગ દરમિયાન ડીસા હાઈવે પરથી ડ્રગ્સની મોટી હેરાફેરી થવાની એક ચોક્કસ અને ગુપ્ત બાતમી મળી હતી. આ બાતમીના આધારે એક્શનમાં આવેલી પોલીસે તાત્કાલિક ડીસાના કંસારી ટોલનાકા નજીક કડક નાકાબંધી કરી દીધી હતી અને વોચ ગોઠવી હતી. આ દરમિયાન ત્યાંથી શંકાસ્પદ હાલતમાં પસાર થઈ રહેલા બે શખ્સોને પોલીસે અટકાવ્યા હતા. પોલીસ ટીમે જ્યારે તેમની તલાશી લીધી, ત્યારે તેમની પાસેથી ૧૬ ગ્રામ જેટલો પ્રતિબંધિત મેફેડ્રોન ડ્રગ્સનો જથ્થો મળી આવતા પોલીસ પણ ચોંકી ઉઠી હતી.
યુનિવર્સિટીનો ગોલ્ડ મેડાલિસ્ટ નીકળ્યો મુખ્ય પેડલર!
પોલીસે જ્યારે પકડાયેલા બંને શખ્સોને કસ્ટડીમાં લઈને કાયદાનું ભાન કરાવ્યું અને તેમની આકરી પૂછપરછ શરૂ કરી, ત્યારે તેમના હાઈ-પ્રોફાઈલ શૈક્ષણિક બેકગ્રાઉન્ડ વિશે જાણીને ખુદ પોલીસ અધિકારીઓ પણ દંગ રહી ગયા હતા. ડ્રગ્સના આ કાળા નેટવર્કનો મુખ્ય માસ્ટરમાઇન્ડ ડીસાનો જોગેશ મહેશકુમાર ઠાકોર છે. જોગેશ કાયદાનો અભ્યાસ કરી ચૂક્યો છે (LLB) અને તેની પાસે M.Phil જેવી ઉચ્ચ શૈક્ષણિક ડિગ્રી છે. એટલું જ નહીં, તે ભણવામાં એટલો તેજસ્વી હતો કે યુનિવર્સિટી લેવલે ગોલ્ડ મેડલ પણ મેળવી ચૂક્યો છે. આ ભણેલો-ગણેલો ગોલ્ડ મેડાલિસ્ટ પોતાની સાથે સાગરીત તરીકે ડીસાના આસેડા ગામના સાહિલ પ્રવીણભાઈ સોલંકીને રાખીને સ્થાનિક સ્તરે ડ્રગ્સ સપ્લાય કરવાનું મોટું નેટવર્ક ચલાવી રહ્યો હતો.
રૂપિયા 5.78 લાખનો મુદ્દામાલ જપ્ત
એસઓજી પોલીસે બંને આરોપીઓની ધરપકડ કરીને તેમની પાસેથી 16 ગ્રામ કિંમતી એમડી ડ્રગ્સ, સ્માર્ટફોન અને અન્ય સામગ્રી મળીને કુલ રૂપિયા 5.78 લાખનો મુદ્દામાલ જપ્ત કર્યો છે. પોલીસે બંને સામે નાર્કોટિક્સ એક્ટ (NDPS) હેઠળ ગુનો નોંધીને જેલના સળિયા પાછળ ધકેલી દીધા છે. ઉચ્ચ અભ્યાસ કરેલા આ યુવાનો ડ્રગ્સનો આ જથ્થો ક્યાંથી લાવ્યા હતા અને ડીસા કે બનાસકાંઠાના કયા સ્થાનિક વિદ્યાર્થીઓ, કોલેજિયન યુવાનો કે અન્ય પેડલર્સને સપ્લાય કરવાના હતા, તે દિશામાં પોલીસે ઊંડાણપૂર્વકની તપાસ શરૂ કરી છે. આ ઘટના બાદ વાલીઓમાં પણ પોતાના સંતાનોના સંગતને લઈને ચિંતાનો માહોલ જોવા મળી રહ્યો છે.
