IPL 2022 અત્યાર સુધી 5 વખતની ચેમ્પિયન મુંબઈ ઈન્ડિયન્સ માટે દુઃસ્વપ્ન જેવું સાબિત થયું છે. ટીમને અત્યાર સુધી એક પણ જીત મળી નથી. ટીમને અત્યાર સુધીની પાંચેય મેચોમાં હારનો સામનો કરવો પડ્યો છે. એક દિવસ પહેલા પંજાબ કિંગ્સ સામેની મેચમાં પણ મુંબઈ નિષ્ફળ રહ્યું હતું. પરંતુ રોહિત શર્માની આગેવાની હેઠળની આ ટીમ માટે સારી વાત એ છે કે યુવા ખેલાડીઓ સારું પ્રદર્શન કરી રહ્યા છે. પંજાબ કિંગ્સ સામેની મેચમાં બેબી એબીના નામથી પ્રખ્યાત 18 વર્ષના ડેવાલ્ડ બ્રેવિસે શાનદાર બેટિંગ કરી હતી. તેણે પંજાબ કિંગ્સના લેગ સ્પિનર રાહુલ ચાહરના બોલ પર સતત 4 સિક્સર ફટકારી હતી. આ મેચમાં બ્રેવિસે માત્ર 25 બોલમાં 49 રન ફટકાર્યા હતા. જોકે મુંબઈની ટીમ આ મેચ હારી ગઈ હતી. આ હોવા છતાં, ડેવાલ્ડનું મોટું સ્વપ્ન સાકાર થયું.
ડેવાલ્ડ બ્રેવિસને પંજાબ કિંગ્સ સામે 196ના સ્ટ્રાઈક રેટથી 49 રન બનાવવા બદલ તેના આઈડલ સચિન તેંડુલકર તરફથી વિશેષ એવોર્ડ મળ્યો હતો. સચિને આ ઇનિંગ માટે તેને મુંબઈ ઈન્ડિયન્સ માટે પ્લેયર ઓફ ધ મેચ પસંદ કર્યો અને ડ્રેસિંગ રૂમમાં આ 18 વર્ષના બેટ્સમેન પર બેજ લગાવ્યો. મુંબઈ ઈન્ડિયન્સે દક્ષિણ આફ્રિકાના યુવા બેટ્સમેન ડેવાલ્ડ બ્રેવિસને મેગા ઓક્શનમાં 3 કરોડ રૂપિયામાં ખરીદ્યો. બ્રેવિસે પંજાબ કિંગ્સના સ્પિનર રાહુલ ચાહરની એક ઓવરમાં 4 સિક્સ અને 1 ફોર ફટકારી હતી. તે એક રનથી અડધી સદી ચૂકી ગયો હતો. પરંતુ મુંબઈને જીતની ઉંબરે લઈ જનાર આ બેટ્સમેને દિગ્ગજોને પોતાની ઈનિંગ્સના ચાહક બનાવી દીધા હતા.
IPL 2022માં બ્રેવિસનું જોરદાર પ્રદર્શન
બેબી એબી તરીકે પ્રખ્યાત બ્રેવિસ IPL 2022માં અત્યાર સુધીમાં 3 મેચ રમી ચૂક્યો છે. આમાં તેણે કુલ 86 રન બનાવ્યા છે. કોલકાતા નાઈટ રાઈડર્સ સામેની મેચમાં બ્રેવિસે આઈપીએલની શરૂઆત કરી હતી. આ મેચમાં પણ તેણે માત્ર 19 બોલમાં 2 ચોગ્ગા અને 2 છગ્ગાની મદદથી 29 રન બનાવ્યા અને પોતાની પ્રતિભાથી બધાને પ્રભાવિત કર્યા. આ 18 વર્ષીય બેટ્સમેને અત્યાર સુધી રમાયેલી 12 T20માં 293 રન બનાવ્યા છે. તેણે આ ફોર્મેટમાં 16 સિક્સર ફટકારી છે.
બ્રેવિસ અંડર-19 વર્લ્ડ કપનો ટોપ સ્કોરર હતો
બ્રેવિસ આ વર્ષના અંડર-19 વર્લ્ડ કપ દરમિયાન ચર્ચામાં આવ્યો હતો. તેણે ટૂર્નામેન્ટની 6 મેચમાં કુલ 506 રન બનાવ્યા. તેણે 2 સદી અને 3 અડધી સદી ફટકારી હતી અને તે ટૂર્નામેન્ટનો ટોપ સ્કોરર હતો. આ પ્રદર્શન જોઈને બ્રેવિસને મુંબઈ ઈન્ડિયન્સે ભારે કિંમતે ખરીદ્યો હતો અને અત્યાર સુધી તે ટીમની અપેક્ષાઓ પર ખરો ઉતર્યો છે.
આ પણ વાંચો: શોપિયાંમાં એન્કાઉન્ટર, 2-3 આતંકવાદીઓ છુપાયા હોવાના અહેવાલ
આ પણ વાંચો: એવું તો શું થયું કે લીંબુના ભાવ અચાનક આસમાને પહોંચ્યાં, આ રહ્યું કારણ
આ પણ વાંચો: માતા બની ક્રુર, પોતાની જ 9 મહિનાની બાળકીને માર્યો ઢોરમાર
