અમદાવાદમાં અમદાવાદ મ્યુનિસિપલ કોર્પોરેશન (AMC) દ્વારા કુલ 451 શાળાઓનું સંચાલન કરવામાં આવે છે. જેમાં લગભગ 1.70 લાખ જેટલા વિદ્યાર્થીઓ અભ્યાસ કરે છે. આ વર્ષે ઠંડીનું જોર વધુ રહેતા વાલીઓ દ્વારા રજૂઆત કરવામાં આવી હતી કે, શાળાના સમયમાં ફેરફાર કરવામાં આવે.
નગર પ્રાથમિક શિક્ષણ સમિતિ દ્વારા વાલીઓની રજૂઆતને ધ્યાનમાં રાખીને AMC સંચાલિત શાળાઓની સવારની પાળી અને બપોરની પાળીના સમયમાં ફેરફાર કરવામાં આવ્યો છે. જેમાં સવારની પાળીનો સમય 7:55 થી 12:30 અને બપોરની પાળીનો સમય 12:35 થી 5:10 સુધી રાખવામાં આવ્યો છે. નગર પ્રાથમિક શિક્ષણ સમિતિ દ્વારા કલાકોને ધ્યાનમાં રાખીને જ શાળાનો સમય નક્કી કરવામાં આવ્યો છે, જે આગામી 15 જાન્યુઆરી સુધી માન્ય રહેશે.
શાળાના સમયમાં ફેરફાર કરવાથી વિદ્યાર્થીના અભ્યાસ પર અસર ન થાય તે પ્રકારે શાળાના સમયમાં ફેરફાર કરવામાં આવ્યો છે. આ ઉપરાંત રાઇટ ટુ એજ્યુકેશન એક્ટ હેઠળ વિવિધ ધોરણમાં વાર્ષિક સત્રના કલાકો નક્કી કરવામાં આવ્યા છે.
