Maldives Underwater Accident: સમુદ્રની અસીમ સુંદરતા અને તેના રહસ્યો હંમેશા માનવીને આકર્ષતા રહ્યા છે, પરંતુ ક્યારેક આ જ આકર્ષણ જીવલેણ સાબિત થાય છે. માલદીવ્સના (Maldives) પ્રખ્યાત ટુરિસ્ટ સ્પોટ વાવુ એટોલ ખાતે તાજેતરમાં એક એવી ઘટના બની જેણે સમગ્ર વિશ્વને હચમચાવી દીધું છે. સહેલાણીઓ માટે સ્વર્ગ ગણાતા આ ટાપુ પર, સમુદ્રના પેટાળને નજીકથી જાણવા નીકળેલા 5 અનુભવી ડાઇવર્સ એક ઊંડી પાણીની ગુફામાં ગયા પછી ક્યારેય પાછા ન ફર્યા. સ્થાનિક તંત્રએ આ ઘટનાને માલદીવ્સના ઇતિહાસની સૌથી ગંભીર અને ભયાનક ડાઇવિંગ દુર્ઘટના ગણાવી છે.
ટોચના સાયન્ટિસ્ટ્સ અને પ્રોફેસર્સ જ બન્યા શિકાર
આ કોઈ સામાન્ય પ્રવાસીઓ નહોતા, પરંતુ સમુદ્રના વિજ્ઞાનને ખૂબ સારી રીતે સમજનારા નિષ્ણાતો હતા. ઇટાલીના આ ગ્રૂપમાં સામેલ 5 લોકોમાંથી 4 લોકો યુનિવર્સિટી ઑફ જેનોઆ સાથે સંકળાયેલા હતા અને ‘Duke of York’ નામની લક્ઝરી યોટ દ્વારા આ અભિયાન પર નીકળ્યા હતા.
મૃતકોમાં ઇટાલીના જાણીતા મરીન બાયોલોજિસ્ટ અને પ્રોફેસર મોનિકા મોન્ટેફાલ્કોન સામેલ હતા, જેઓ માલદીવ્સમાં (Maldives) એક આઇલૅન્ડ મોનિટરિંગ કેમ્પેઈનના સાયન્ટિફિક ડાયરેક્ટર તરીકે ફરજ બજાવી રહ્યા હતા. તેમની સાથે તેમની દીકરી જ્યોર્જિયા સોમ્માકલ જે બાયોમેડિકલ એન્જિનિયર હતી, 31 વર્ષીય મરીન બાયોલોજિસ્ટ મ્યુરિયલ ઓડેનિનો, 31 વર્ષીય સર્ટિફાઇડ સ્કૂબા ડાઇવિંગ ઇન્સ્ટ્રક્ટર ફેડેરિકો ગુઆલ્તિયેરી અને 44 વર્ષીય બોટ ઓપરેશન મેનેજર જિયાનલુકા બેનેડેત્તી સામેલ હતા. બેનેડેત્તી તો બૅન્કિંગ અને ફાઇનાન્સની કરિયર છોડીને ડાઇવિંગના શોખ માટે 2017થી માલદીવ્સમાં સ્થાયી થયા હતા.
રહસ્યમય ગુફા અને રેસ્ક્યુ ઓપરેશનનો પડકાર
આ અકસ્માત વાવુ એટોલમાં દરિયાની સપાટીથી 50 મીટર (આશરે 164 ફૂટ) ની ઊંડાઈએ આવેલી એક જટિલ ગુફામાં થયો હતો. નિષ્ણાતોના જણાવ્યા મુજબ, આ અંડરવોટર કેવમાં 3 મોટી ચેમ્બર છે, જે સાંકડા માર્ગોથી એકબીજા સાથે જોડાયેલી છે.
રેસ્ક્યુ ટીમે અત્યાર સુધીમાં માત્ર જિયાનલુકા બેનેડેત્તીનો જ મૃતદેહ ગુફાના પ્રવેશદ્વાર પાસેથી રિકવર કર્યો છે, જ્યારે બાકીના 4 ડાઇવર્સ હજુ પણ ગુફાની અંદર હોવાની આશંકા છે. માલદીવની (Maldives) સરકારના પ્રવક્તા મોહમ્મદ હુસૈન શરીફે જણાવ્યું હતું કે ખરાબ હવામાન અને જોરદાર પવનના કારણે શુક્રવારનું સર્ચ ઓપરેશન અટકાવવું પડ્યું હતું. જોકે, સ્થાનિક ડાઇવર્સે શનિવારના ઓપરેશન માટે એક પ્રારંભિક નકશો તૈયાર કરી લીધો છે અને ઇટાલીથી પણ 2 ડાઇવિંગ એક્સપર્ટ્સ આ ટીમની મદદે આવી રહ્યા છે.
મોત પાછળના 4 સંભવિત કારણો: એક્સપર્ટ્સનું શું કહેવું છે?
તપાસકર્તાઓ અને ડાઇવિંગ નિષ્ણાતો આ અકસ્માત પાછળ નીચે મુજબની થિયરીઓ પર કામ કરી રહ્યા છે:
સમુદ્રમાં વાવાઝોડા જેવા હવામાનને કારણે ગુફાની અંદરની રેતી અને કાંપ એટલી હદે ઉડ્યા હોઈ શકે કે ગુફાની અંદર જોવાનું સાવ બંધ થઈ ગયું હોય. આના કારણે ડાઇવર્સ બહાર નીકળવાનો રસ્તો ભૂલી ગયા હોવાની પૂરેપૂરી આશંકા છે.
એવું પણ બની શકે કે સાંકડી ગુફામાં કોઈ એક ડાઇવર ફસાઈ ગયો હોય અને તેને બચાવવાના ચક્કરમાં અન્ય સાથીઓનો ઓક્સિજન ખતમ થઈ ગયો હોય અથવા ગભરાટને કારણે અકસ્માત સર્જાયો હોય.
ડાઇવિંગ નિષ્ણાતો શંકા સેવી રહ્યા છે કે વધુ પડતા દબાણ હેઠળ સિલિન્ડરમાં રહેલો ગેસ ઝેરી (Maldives) બની ગયો હોઈ શકે છે. આ સ્થિતિ ત્યારે સર્જાય છે જ્યારે ડાઇવિંગ ટેન્કનું ગેસ મિશ્રણ નક્કી કરેલી ઊંડાઈ માટે યોગ્ય ન હોય.
પ્રોફેસર મોનિકાના પતિ (Maldives) કાર્લોએ જણાવ્યું કે તેમની પત્ની પાસે તેનો GoPro કેમેરો હતો, જે તે અભિયાન દરમિયાન સાથે રાખતી હતી. આ કેમેરો એ તમામ રહસ્યો પરથી પડદો ઉઠાવી શકે છે કે ગુફાની અંદર આખરે શું બન્યું હતું.
આ પણ વાંચો :ઇરાન અને અમેરિકા વચ્ચે યુદ્ધની સ્થિતિ, નેતન્યાહુ અને ટ્રમ્પને ખતમ કરવા ઇરાની હેકર્સ સક્રિય
આ પણ વાંચો :અમેરિકા ઈરાનમાંથી 440 કિલો યુરેનિયમ જપ્ત કરશે! જાણો ટ્રમ્પનો સિક્રેટ ગ્રાઉન્ડ ઓપરેશન પ્લાન
આ પણ વાંચો :આર્મી ચીફની પાકિસ્તાનને ખુલ્લી ચેતવણી, આતંકવાદ બંધ કરો નહિતર ઇતિહાસ બની જશો
