Momos ને સુપર ક્રિસ્પી બનાવવા માટે અપનાવો આ ટ્રિક અપનાવો !

Instant Snack: મોમોઝ (Momos) એક એવો નાસ્તો છે જે બાળકોથી લઈને મોટેરાંઓ સુધી દરેકને પસંદ હોય છે. સામાન્ય રીતે આપણે સ્ટીમ અથવા ફ્રાઈડ મોમોઝ ખાતા હોઈએ છીએ, પરંતુ આજકાલ ‘કુરકુરે મોમોઝ’ નો ક્રેઝ ખૂબ જ વધ્યો છે. ઉપરથી એકદમ કડક (ક્રિસ્પી) અને અંદરથી સોફ્ટ એવા આ મોમોઝ ખાવાની મજા જ કંઈક અલગ હોય છે. આજે અમે તમારા માટે લાવ્યા છીએ હોટલ જેવા જ કુરકુરે મોમોઝ ઘરે બનાવવાની એકદમ પરફેક્ટ રીત.

જરૂરી સામગ્રી (Ingredients):

મોમોઝના પડ માટે: 1 કપ મેંદો, સ્વાદ મુજબ મીઠું અને પાણી.

સ્ટફિંગ (પુરણ) માટે: ઝીણી સમારેલી કોબીજ, ગાજર, ડુંગળી, આદુ-લસણની પેસ્ટ, કાળા મરીનો પાવડર અને સોયા સોસ.

કોટિંગ (ઉપરના પડ) માટે: 1/2 કપ મેંદો, 1/4 કપ કોર્ન ફ્લોર (મકાઈનો લોટ), લાલ મરચું, હળદર અને મીઠું.

ક્રિસ્પી બનાવવા માટે: 1 કપ કોર્ન ફ્લેક્સ (મકાઈના પૌંઆ) – જેને હાથેથી થોડા કરકરા કરી લેવા.

તળવા માટે: તેલ.

બનાવવાની સ્ટેપ-બાય-સ્ટેપ રીત (Preparation Steps):

સૌ પ્રથમ એક વાસણમાં મેંદો અને મીઠું મિક્સ કરી, જરૂર મુજબ પાણી નાખીને કઠણ લોટ બાંધી લો. આ લોટને 15 થી 20 મિનિટ સુધી ઢાંકીને રહેવા દો.

એક પેનમાં થોડું તેલ ગરમ કરો. તેમાં આદુ-લસણની પેસ્ટ, ડુંગળી અને બધી સમારેલી શાકભાજી નાખીને 2-3 મિનિટ સાંતળો. હવે તેમાં મીઠું, મરી પાવડર અને સોયા સોસ ઉમેરો. શાકભાજીને બહુ ચઢવા દેવા નહીં, તેને થોડા ક્રંચી રાખવા.

લોટના નાના લૂઆ કરી તેની પાતળી પૂરી વણી લો. વચ્ચે એક ચમચી સ્ટફિંગ મૂકીને મોમોઝનો મનગમતો આકાર આપો. તમે તેને સ્ટીમરમાં 5 મિનિટ સ્ટીમ પણ કરી શકો છો અથવા ડાયરેક્ટ પણ આગળની પ્રોસેસ કરી શકો છો.

એક બાઉલમાં મેંદો, કોર્ન ફ્લોર, લાલ મરચું અને પાણી નાખીને મધ્યમ ઘટ્ટ ખીરું તૈયાર કરો. આ ખીરામાં ગાંઠો ન રહે તેનું ધ્યાન રાખવું.

હવે તૈયાર કરેલા મોમોઝ (Momos) ને પહેલા મેંદાના ખીરામાં ડુબાડો અને ત્યારબાદ તેને કરકરા કરેલા કોર્ન ફ્લેક્સમાં બરાબર રગડો, જેથી ચારેબાજુ કોર્ન ફ્લેક્સ ચોંટી જાય.

એક કડાઈમાં તેલ ગરમ કરો. તેલ બરાબર ગરમ થાય એટલે મધ્યમ આંચ પર મોમોઝને (Momos) ગોલ્ડન બ્રાઉન અને એકદમ કુરકુરે થાય ત્યાં સુધી તળી લો.