Gandhinagar News: સેક્ટર-23માં રહેતા નિવૃત્ત નાયબ સચિવના પરિવાર સાથે સંકળાયેલા હાઈપ્રોફાઈલ ઠગાઈ (Gandhinagar Fraud Case) પ્રકરણમાં ફરી એકવાર તપાસ તેજ બની છે. નકલી સરકારી ટેન્ડર અને વર્ક ઓર્ડરના નામે કરોડો રૂપિયાની ઠગાઈ (Gandhinagar Fraud Case)ના આક્ષેપો ધરાવતા આ કેસમાં ઇન્ફોસિટી પોલીસે મુખ્ય આરોપી નિરવ દવે, તેના પિતા મહેન્દ્ર દવે, પત્ની મીરાં દવે અને પુત્ર યજત સહિત પરિવારના સભ્યો સામે કાર્યવાહી કરી હતી.

લાંબી તપાસ બાદ પોલીસે કોર્ટમાં ચાર્જશીટ પણ રજૂ કરી હતી. જોકે, રોકાણકારો પાસેથી મેળવવામાં આવેલા કરોડો રૂપિયા આખરે ક્યાં ગયા તે અંગે પોલીસને પૂરતી કડી મળી ન હતી. નાણાંની ભાળ ન મળતા ભોગ બનનારોએ ગાંધીનગર કોર્ટનો સંપર્ક કર્યો હતો. ત્યારબાદ કોર્ટે સમગ્ર કેસની ફરીથી ઊંડાણપૂર્વક અને તટસ્થ તપાસ કરવાનો આદેશ આપ્યો છે. કોર્ટના આદેશ બાદ ઇન્ફોસિટી પોલીસે હવે કેસની ફેરતપાસ શરૂ કરી છે.

નકલી સરકારી ટેન્ડરના નામે કરોડોની ઠગાઈના આક્ષેપ

પોલીસના ચોપડે હાલ આ કથિત કૌભાંડની રકમ ₹33 કરોડથી વધુ હોવાનું સામે આવ્યું છે. જોકે, તપાસમાં હજુ વધુ લોકો ભોગ બન્યા હોવાની માહિતી સામે આવી રહી છે. કેટલાક નામાંકિત બિલ્ડરો અને ડોક્ટરો પણ આ કથિત ઠગાઈ (Gandhinagar Fraud Case)ની ઝાળમાં ફસાયા હોવાની માહિતી મળી રહી છે. જો આ દાવાઓ અને ફરિયાદોની તપાસમાં પુષ્ટિ થાય તો સમગ્ર કૌભાંડનો આંકડો ₹80 કરોડ સુધી પહોંચી શકે છે. આથી હવે પોલીસ માટે માત્ર આરોપીઓની ભૂમિકા જ નહીં, પરંતુ સમગ્ર નાણાકીય નેટવર્કની તપાસ પણ મહત્વની બની છે.

2004થી કથિત રીતે ગૂંથાઈ રહી હતી કૌભાંડની જાળ

મળતી વિગતો પ્રમાણે આ કથિત ઠગાઈ (Gandhinagar Fraud Case)નું નેટવર્ક વર્ષ 2004થી ઊભું કરવામાં આવ્યું હોવાનો આક્ષેપ છે. આરોપ મુજબ, નિરવ દવે, તેની પત્ની મીરાં, પુત્ર યજત અને નિવૃત્ત નાયબ સચિવ પિતા મહેન્દ્ર દવે દ્વારા સાથે મળીને સરકારી પ્રોજેક્ટ્સ સાથે જોડાયેલા હોવાનું દર્શાવતા નકલી દસ્તાવેજો અને વર્ક ઓર્ડર તૈયાર કરવામાં આવતા હતા. રોકાણકારોને આ પ્રોજેક્ટ્સ વાસ્તવિક હોવાનું જણાવી તેમની પાસેથી નાણાં લેવામાં આવતા હોવાના આક્ષેપો છે.

રાણકી વાવથી શિવરાજપુર બીચ સુધીના પ્રોજેક્ટ્સના નકલી દસ્તાવેજો

કથિત કૌભાંડમાં ગુજરાતના જાણીતા સરકારી અને પ્રવાસન સંબંધિત પ્રોજેક્ટ્સના નામનો ઉપયોગ કરવામાં આવ્યો હોવાનું સામે આવ્યું છે.

આમાં મુખ્યત્વે: પાટણની રાણકી વાવમાં ઇલેક્ટ્રિક લાઇટિંગ પ્રોજેક્ટ, દ્વારકાના શિવરાજપુર બીચ ડેવલપમેન્ટ, અમરેલીના રાજમહેલ કિલ્લાના રિનોવેશન અને વડનગરના શર્મિષ્ઠા તળાવના મેન્ટેનન્સ જેવા કામોના નકલી વર્ક ઓર્ડર, લેટરપેડ અને અન્ય દસ્તાવેજો તૈયાર કરવામાં આવ્યા હોવાના આક્ષેપો છે. આ દસ્તાવેજોના આધારે રોકાણકારોને સરકારી પ્રોજેક્ટમાં રોકાણ કરવાની તક હોવાનું દર્શાવવામાં આવતું હોવાની તપાસમાં વિગતો સામે આવી હતી.

Gandhinagar Fraud Case: પુત્ર યજત પર ડિજિટલ એડિટિંગથી દસ્તાવેજોમાં છેડછાડનો આરોપ

આ કેસમાં નિરવ દવેના પુત્ર યજતની ભૂમિકા પણ તપાસ હેઠળ રહી છે. આરોપ મુજબ, યજત ડિજિટલ એડિટિંગની મદદથી અસલી સરકારી પત્રો અને દસ્તાવેજોમાં ફેરફાર કરીને નકલી દસ્તાવેજો તૈયાર કરતો હતો. બીજી તરફ, પરિવારના વડા મહેન્દ્ર દવે નિવૃત્ત નાયબ સચિવ રહી ચૂક્યા હોવાથી રોકાણકારો પર તેની અસર પડતી હોવાનો પણ આક્ષેપ કરવામાં આવ્યો છે. સરકારી પદ પર રહી ચૂકેલી વ્યક્તિ પરિવાર સાથે સંકળાયેલી હોવાથી પ્રોજેક્ટ્સ સાચા હોવાનો વિશ્વાસ રોકાણકારોમાં ઊભો થતો હોવાનો તપાસમાં દાવો કરવામાં આવ્યો છે.

અમદાવાદના વેપારી સહિત 17 લોકો ભોગ બન્યા

આ કથિત ઠગાઈ (Gandhinagar Fraud Case)માં અમદાવાદના વેપારી ભાવિકભાઈ પટેલે ₹20.70 કરોડ, જ્યારે ઇન્ફોસિટીમાં ગેસ એજન્સી ધરાવતા દર્શનભાઈ રામીએ ₹1.12 કરોડ ગુમાવ્યા હોવાની વિગતો સામે આવી છે. આ ઉપરાંત નિરવ દવેની ઓફિસમાં કામ કરતા એક કર્મચારીએ પણ ₹24 લાખ ગુમાવ્યા હોવાનું જણાવાયું છે. આ સિવાય અન્ય વેપારીઓ સહિત કુલ આશરે 17 લોકો આ કથિત ઠગાઈ (Gandhinagar Fraud Case)નો ભોગ બન્યા હોવાની માહિતી છે.

પરિવાર જેલમાં ગયો, છતાં પૈસાનો પત્તો ન લાગ્યો

પોલીસ તપાસ દરમિયાન નિરવ દવે સહિત પરિવારના સભ્યો સામે કાર્યવાહી કરવામાં આવી હતી અને તેમને જેલમાં મોકલવામાં આવ્યા હતા. જોકે, કેસની તપાસ આગળ વધવા છતાં રોકાણકારો પાસેથી લેવામાં આવેલા કરોડો રૂપિયા ક્યાં ગયા તે અંગે પોલીસને સ્પષ્ટ કડી મળી શકી નહોતી. મુખ્ય આરોપીના પુત્ર યજતને બાદમાં જામીન મળ્યા હોવાનું પણ સામે આવ્યું છે. પરંતુ ભોગ બનનારાઓ માટે સૌથી મોટો સવાલ હજુ પણ એ જ રહ્યો કે તેમની પાસેથી લેવામાં આવેલા કરોડો રૂપિયા ક્યાં ગયા?

ભોગ બનનારની અરજી બાદ કોર્ટે આપ્યો ફેરતપાસનો આદેશ

નાણાંની ભાળ ન મળતાં ભોગ બનનાર દર્શનભાઈ રામીએ વકીલ મારફતે ગાંધીનગર કોર્ટમાં અરજી કરી હતી. તેમના જણાવ્યા અનુસાર, પોલીસ તપાસ બાદ પણ નાણાંની કોઈ ભાળ મળી ન હોવાથી તેમણે સમગ્ર કેસની ફરી તપાસ કરવાની માગ કરી હતી. કોર્ટે કેસની ગંભીરતાને ધ્યાનમાં લઈને ફરીથી તપાસ કરવાનો આદેશ આપ્યો છે. કોર્ટના આદેશ બાદ ગાંધીનગર જિલ્લા પોલીસ વડાએ પણ પરિણામલક્ષી તપાસ કરવા સૂચના આપી હોવાનું જણાવાયું છે.

હવે પોલીસનું ફોકસ ‘પૈસા ક્યાં ગયા?’ પર

ઇન્ફોસિટી પોલીસ ઇન્સ્પેક્ટર વિશાલ શાહના જણાવ્યા મુજબ, કોર્ટના આદેશને પગલે સમગ્ર કેસની ફેરતપાસ શરૂ કરવામાં આવી છે. હવે પોલીસનું મુખ્ય ધ્યાન કથિત ઠગાઈ (Gandhinagar Fraud Case)માંથી મેળવવામાં આવેલા નાણાંની હિલચાલ, આરોપીઓના નાણાકીય વ્યવહારો અને અન્ય સંભવિત લોકોની ભૂમિકા શોધવા પર રહેશે. ₹33 કરોડથી વધુની નોંધાયેલી કથિત ઠગાઈ (Gandhinagar Fraud Case)માં જો વધુ ફરિયાદો અને વ્યવહારો સામે આવે તો આંકડો ₹80 કરોડ સુધી પહોંચવાની શક્યતા વ્યક્ત કરવામાં આવી રહી છે. આથી આગામી તપાસમાં કથિત નાણાકીય નેટવર્ક, વધુ ભોગ બનનારાઓ અને આ સમગ્ર પ્રકરણ પાછળ સંભવિત અન્ય લોકોની ભૂમિકા અંગે મહત્વની વિગતો સામે આવે તેવી શક્યતા છે.

હવે સૌથી મોટો સવાલ એ છે કે કરોડોની આ કથિત ઠગાઈ (Gandhinagar Fraud Case)માં રોકાણકારોના નાણાં આખરે ક્યાં ગયા અને પોલીસ ફેરતપાસમાં તેનો તાળો મેળવી શકશે કે નહીં?

આ પણ વાચો:સુરતમાં ₹2,000 કરોડનું ITC કૌભાંડ? 5 ભંગાર વેપારીઓના નામે અબજોનું ટર્નઓવર, DGGI તપાસમાં

આ પણ વાચો:વિદેશ મોકલવાના નામે મોટું કૌભાંડ! નોકરી-સ્ટુડન્ટ વિઝાની લાલચ આપી ગુજરાતીઓ પાસેથી ₹94 લાખની છેતરપિંડી

આ પણ વાચો:સાબરકાંઠામાં BZ પોન્ઝી કૌભાંડમાં રોકાણકારોનો આક્રોશ, કોર્ટમાં હંગામો