Godhra human Smuggling: ગોધરાના બામરોલી રોડ પર આવેલી દીપ મેટરનિટી એન્ડ ચિલ્ડ્રન હોમ હોસ્પિટલમાં નવજાત બાળકીની ટ્રાફિકિંગનો એક ચોંકાવનારી ઘટના સામે આવી છે. ગોધરા શહેર વિભાગીય પોલીસ સ્ટેશનમાં હોસ્પિટલ સ્ટાફ, બાળકીને જન્મ આપનાર અજાણી મહિલા અને બાળકીને ગેરકાયદેસર રીતે ખરીદનાર દંપતી સહિત આઠ લોકો સામે ફરિયાદ દાખલ કરવામાં આવી છે.
પ્રાપ્ત માહિતી અનુસાર, ગેરકાયદેસર રીતે દત્તક લીધેલી બાળકી બીમાર પડતાં સમગ્ર કૌભાંડ સામે આવ્યું હતું. બાળકીને ગોધરા, ત્યારબાદ વડોદરા શહેર અને ગ્રામ્ય વિસ્તારની વિવિધ હોસ્પિટલોમાં સારવાર માટે લઈ જવામાં આવી હતી. આ સમય દરમિયાન, એક ખાનગી હોસ્પિટલના ડૉક્ટરને બાળકીના દસ્તાવેજો અને દંપતીના વર્તન પર શંકા ગઈ અને તેણે પોલીસને જાણ કરી.
પોલીસ તપાસમાં બહાર આવ્યું કે આ એક સુનિયોજિત કાવતરું હતું. દીપ મેટરનિટી હોસ્પિટલમાં એક અજાણી મહિલાએ બાળકીને જન્મ આપ્યો. જન્મ આપ્યા પછી, માતાએ બાળકીને ત્યજી દીધી. ત્યારબાદ, આર્થિક લાભ મેળવવા માટે, હોસ્પિટલના કર્મચારીઓએ ગોધરા તાલુકાના એક ગામના નિઃસંતાન દંપતીને ગેરકાયદેસર રીતે બાળક વેચી દીધું.
શરૂઆતમાં વડોદરાના સાવલી પોલીસ સ્ટેશનમાં ફરિયાદ દાખલ કરવામાં આવી હતી. ગોધરામાં આ ઘટના બની હોવાથી, કેસ કલમ 01 થી ગોધરા સિટી એ ડિવિઝન પોલીસ સ્ટેશનમાં ટ્રાન્સફર કરવામાં આવ્યો હતો. ગોધરા પોલીસે માનવ ટ્રાફિકિંગ અને અન્ય સંબંધિત કલમો હેઠળ કેસ નોંધ્યો છે અને ઊંડાણપૂર્વક તપાસ શરૂ કરી છે.
પોલીસે દીપ મેટરનિટી હોસ્પિટલના જવાબદાર સંચાલકો અને સ્ટાફ, બાળકને જન્મ આપનાર અજાણી મહિલા અને બાળકની ગેરકાયદેસર ખરીદી, વેચાણ અને દત્તક લેવામાં સંડોવાયેલા કુલ આઠ લોકો સામે ફરિયાદ દાખલ કરી છે. પોલીસ હાલમાં તમામ આરોપીઓની પૂછપરછ કરી રહી છે અને આ કૌભાંડમાં અન્ય કોઈ સંડોવાયેલ છે કે કેમ તેની તપાસ કરી રહી છે. આ ઘટનાથી ગોધરા વિસ્તારમાં ખળભળાટ મચી ગયો છે.
આ પણ વાંચો:વડોદરાના બાજવામાં વરસાદથી માનવસર્જિત પૂર, નાગરિકોમાં રોષ
આ પણ વાંચો:વડોદરાના ઉંડેરામાં પાણી ભરાયું, નાગરિકો 5 દિવસથી હાલાકી વચ્ચે જીવન જીવવા મજબૂર બન્યા
આ પણ વાંચો:વડોદરા: શહેરમાં ફરી બની હિટ એન્ડ રનની ઘટના, યુવતીનું મોત
