દુબઈ ઈન્ટરનેશનલ ક્રિકેટ સ્ટેડિયમમાં રમાઈ રહેલા 2022 એશિયા કપની પ્રથમ મેચમાં અફઘાનિસ્તાને શ્રીલંકાને માત્ર 105 રનમાં આઉટ કરી દીધું. અફઘાનિસ્તાનના બોલરોએ શરૂઆતથી જ શ્રીલંકાના બેટ્સમેનો પર પ્રભુત્વ જમાવ્યું હતું. અફઘાનિસ્તાને હવે જીતવા માટે 120 બોલમાં 106 રન બનાવવાના છે. અફઘાનિસ્તાન તરફથી ફઝલહક ફારૂકીએ શાનદાર બોલિંગ કરી હતી. તેના પહેલા સ્પેલમાં તેણે મેડન સાથે બે ઓવરમાં બે વિકેટ ઝડપી હતી. આ પછી તેને બીજા સ્પેલમાં પણ વિકેટ મળી હતી. આ રીતે તેણે કુલ ત્રણ વિકેટ ઝડપી હતી. આ સાથે જ તેના પાર્ટનર નવી ઉલ હકને પણ સફળતા મળી, કેપ્ટન મોહમ્મદ નબીએ તેની ચાર ઓવરમાં 14 રન આપીને બે વિકેટ લીધી હતી. આ સિવાય મિસ્ટ્રી સ્પિનર મુજીબ ઉર રહેમાને પણ બે વિકેટ ઝડપી હતી. આ સાથે જ શ્રીલંકા તરફથી ભાનુકા રાજપક્ષેએ સૌથી વધુ 38 રન બનાવ્યા હતા
ટોસ હારીને બેટિંગ કરવા ઉતરેલી શ્રીલંકાની ટીમની શરૂઆત ખૂબ જ ખરાબ રહી હતી. ઓપનર પથુમ નિસાંકા 03 અને કુસલ મેન્ડિસ 02 રને આઉટ થયા હતા. આ પછી ત્રીજા નંબરે બેટિંગ કરવા આવેલા ચરિથ અસલંકા ખાતું ખોલાવ્યા વિના જ પેવેલિયન પરત ફર્યા હતા. માત્ર 5 રનમાં ત્રણ વિકેટ ગુમાવ્યા બાદ દાનુષ્કા ગુણાથિલાકા અને ભાનુકા રાજપક્ષે 44 રનની ભાગીદારી કરી હતી. બંને સરળતાથી રન બનાવી રહ્યા હતા. દરમિયાન, ગુણાથિલાકા 17 રન પર સ્વિચ હિટ પર સિક્સ મારવાના પ્રયાસમાં કેચ આઉટ થયો હતો. આ પછી ફરીથી શ્રીલંકાના બેટ્સમેનો નિયમિત અંતરે વિકેટ ગુમાવતા રહ્યા.
આ દરમિયાન વનિન્દુ હસરંગા 02 અને કેપ્ટન દાસુન શનાકા શૂન્ય પર આઉટ થયા હતા. આ પછી રાજપક્ષે પણ પેવેલિયન પરત ફર્યો હતો. તેણે 29 બોલમાં 5 ચોગ્ગા અને એક છગ્ગાની મદદથી 38 રન બનાવ્યા હતા. આ સમયે એવું લાગી રહ્યું હતું કે શ્રીલંકાની ટીમ 100 રનના સ્કોર સુધી પણ નહીં પહોંચે. પરંતુ ચમિકા કરુણારત્નેએ 38 બોલમાં 31 રનની ઇનિંગ રમીને સ્કોર 100ની પાર પહોંચાડ્યો હતો. તેણે ત્રણ ફોર અને એક સિક્સર ફટકારી હતી. તે જ સમયે મહેશ દિક્ષાના 00 અને મતિશા પથિરાના 05 રન બનાવી આઉટ થયા હતા.
