Vadodara News : વડોદરા (Vadodara)ના નંદેસરી વસાહતમાં ગટરમાં લીલા રંગનું કેમિકલયુક્ત પાણી (Chemical Water)દેખાતા સ્થાનિકોમાં ચિંતા ફેલાઈ છે. ગટરમાં દેખાઈ રહેલા આ ઝેરી પાણીના કારણે ફરી એકવાર ઔદ્યોગિક પ્રદૂષણનો મુદ્દો ચર્ચામાં આવ્યો છે.
સ્થાનિકોના આક્ષેપ મુજબ, વરસાદ દરમિયાન કેટલીક કંપનીઓ તરફથી કેમિકલયુક્ત પાણી ગટરોમાં છોડવામાં આવે છે. જેના કારણે વસાહતના ગટર અને આસપાસના વિસ્તારમાં ઝેરી પાણી જોવા મળતું હોવાનો દાવો કરવામાં આવ્યો છે.
ગ્રામજનોનું કહેવું છે કે અગાઉ પણ કેમિકલયુક્ત પાણીના કારણે પશુઓના મોત થયાની ઘટના સામે આવી હતી. આવી સ્થિતિમાં ફરી ગટરમાં લીલા રંગનું પાણી દેખાતા લોકોમાં ભય અને રોષ જોવા મળી રહ્યો છે.
સ્થાનિકોએ કંપની સંચાલકોની કથિત બેદરકારી સામે આક્રોશ વ્યક્ત કરી ગુજરાત પ્રદૂષણ નિયંત્રણ બોર્ડ (GPCB) દ્વારા તાત્કાલિક તપાસ કરવામાં આવે તેવી માંગ કરી છે. ગટરમાં છોડવામાં આવતું પાણી ક્યાંથી આવે છે અને તેમાં કયા પ્રકારના કેમિકલ્સ છે તેની તપાસ કરવાની પણ માંગ ઉઠી છે.
હાલ આ પાણીના સેમ્પલની વૈજ્ઞાનિક તપાસ અને સત્તાવાર રિપોર્ટ બાદ જ પાણીમાં કયા પ્રદૂષક તત્વો છે તે સ્પષ્ટ થઈ શકશે. જો આક્ષેપો સાચા સાબિત થાય તો જવાબદાર સામે નિયમ મુજબ કાર્યવાહી કરવાની માંગ સ્થાનિકો કરી રહ્યા છે.
