સરકારે બજેટની રજૂઆતના એક દિવસ પહેલા જાન્યુઆરી 2022 માટે જીએસટી કલેક્શનના આંકડા જાહેર કર્યા છે. જાન્યુઆરી 2022 માટે કુલ GST આવક 1,38,394 કરોડ રૂપિયા હતી. નોંધપાત્ર રીતે, આ ચોથી વખત છે જ્યારે GST કલેક્શન રૂ. 1.30 લાખ કરોડને વટાવી ગયું છે.
જાન્યુઆરી 2022 ના મહિનાની આવક અગાઉના વર્ષના સમાન મહિનાની GST આવક કરતાં 15 ટકા વધુ છે અને જાન્યુઆરી 2020 માં GST આવક કરતાં 25 ટકા વધુ છે. જાન્યુઆરી 2022ના મહિના માટે GSTની કુલ આવક રૂ. 1,38,394 કરોડ છે, જેમાં CGST રૂ. 24,674 કરોડ, SGST રૂ. 32,016 કરોડ, IGST રૂ. 72,030 કરોડ (આયાત પર એકત્રિત કરાયેલ રૂ. 35,181 કરોડ સહિત) છે. એપ્રિલ 2021માં સૌથી વધુ માસિક GST કલેક્શન રૂ. 1,39,708 કરોડ હતું. સરકાર દ્વારા જણાવવામાં આવ્યું હતું કે 30 જાન્યુઆરી, 2022 સુધી ફાઇલ કરવામાં આવેલા GSTR-3B રિટર્નની કુલ સંખ્યા 1.05 કરોડ છે, જેમાં 36 લાખ ત્રિમાસિક રિટર્નનો સમાવેશ થાય છે.
ઉલ્લેખનીય છે કે, સોમવારે કેન્દ્રીય નાણા મંત્રી નિર્મલા સીતારમણે ગૃહમાં દેશનો આર્થિક સર્વે રિપોર્ટ રજૂ કર્યો હતો. જેના જવાબમાં રાહુલ ગાંધીએ કેન્દ્ર સરકાર પર નિશાન સાધ્યું હતું. રાહુલે કહ્યું કે, દેશના લોકો ટેક્સ કલેક્શનના બોજથી પરેશાન છે, જ્યારે મોદી સરકાર માટે આ ટેક્સ મેળવવો એ મોટી ઉપલબ્ધિ છે. તેમણે કહ્યું કે આ માત્ર મતભેદ છે, તેઓ માત્ર પોતાનો ખજાનો જુએ છે, જનતાની પીડા નહીં.
