Janmashtami Festival Celebration 2024: જન્માષ્ટમી મહામહોત્સવ પર અમદાવાદના ઇસ્કોન મંદિરમાં ઔપચારિક ઉજવણી કરવામાં આવશે. આ દિવસે ભગવાનના ગર્ભગૃહને દેશ-વિદેશના વિવિધ પુષ્પોથી શણગારવામાં આવશે. થાઈલેન્ડના 5 વિવિધ રંગના ઓર્કિડ ફૂલોના 900 કિલો ફૂલો, દક્ષિણ આફ્રિકાના 3 વિવિધ પ્રકારના એન્થુરિયમ ફૂલો, કાર્નેશન, ડચ રોઝ, જીપ્સી, સાવંતી, ટ્યુબરોઝ, ડેઝી વગેરેનો ઉપયોગ કરવામાં આવશે. આ ફૂલો દ્વારા ભગવાનના ગર્ભગૃહમાં મોર, ગરુડ, શંખ, કમળ, ધનુષ્ય વગેરે બનાવવામાં આવશે.

આ વર્ષે જન્માષ્ટમી મહામહોત્સવ દરમિયાન ભક્તોને સરળતાથી દર્શન કરી શકાય તે માટે મંદિરમાં સુવિધાજનક વ્યવસ્થા કરવામાં આવી છે. આ સાથે મંદિર પરિસરમાં ડિજિટલ સ્ક્રીન દ્વારા દર્શનની વ્યવસ્થા કરવામાં આવી છે. ભાવિક ભક્તો માટે, મંદિર પ્રશાસને મંદિરના ફેસબુક અને યુટ્યુબ પેજ પર લાઈવ દર્શનની વ્યવસ્થા કરી છે, જેથી ભક્તો ઘરે બેઠા ભગવાનના દર્શન, આરતી અને મહાભિષેક જોઈ શકે. મંદિર પરિસરમાં ભીડભાડ ન રહે તેનું સંપૂર્ણ ધ્યાન રાખવામાં આવશે. મુલાકાતીઓ માટે પાર્કિંગની પણ પૂરતી વ્યવસ્થા કરવામાં આવી છે.

જન્માષ્ટમીના દિવસે સવારે 4:30 કલાકે ભગવાનની મંગળા આરતી થશે અને ત્યારબાદ સવારે 07:30 કલાકે ભગવાનને વૃંદાવનથી લાવવામાં આવેલા વિશિષ્ટ વસ્ત્રો અને ઝવેરાતથી શણગારવામાં આવશે અને શ્રૃંગાર દર્શનને ખુલ્લો મુકવામાં આવશે. ત્યારબાદ ઇસ્કોન મંદિરમાં વરિષ્ઠ ભક્તો દ્વારા કૃષ્ણ કથાનું પઠન કરવામાં આવશે, ત્યારબાદ સવારે 09 થી 01 વાગ્યા સુધી ભક્તો દ્વારા અખંડ હરે કૃષ્ણ મહામંત્રનો જાપ કરવામાં આવશે.

સાંસ્કૃતિક કાર્યક્રમો યોજાશે

સમગ્ર મંદિર પરિસરને રંગબેરંગી રોશનીથી શણગારવામાં આવ્યું છે. સાંજે મંદિરની પાછળના બગીચામાં ઈસ્કોન મંદિરની ભક્ત પ્રહલાદ સ્કૂલના વિદ્યાર્થીઓ દ્વારા સાંસ્કૃતિક કાર્યક્રમનું પણ આયોજન કરવામાં આવશે. ભગવાન વૃંદાવનની મુખ્ય હરિયાળીને 3D કટ-આઉટ દ્વારા દર્શાવવામાં આવશે, ત્યાં 11:30 વાગ્યે પંચામૃત, કેસર, ગંગાજળ અને વિવિધ ફળોના રસ સાથે ભગવાનનો મહાભિષેક થશે અને ત્યારબાદ 12:30 વાગ્યે મહા આરતી થશે. આ દિવસે ભગવાનને મેક્સિકન, ઈટાલિયન, થાઈ, ચાઈનીઝ અને ઈન્ડિયન જેવી 600 થી વધુ વિવિધ વાનગીઓ અર્પણ કરવામાં આવશે. ભક્તો સમગ્ર કાર્યક્રમને ઈસ્કોન મંદિરના ફેસબુક અને યુટ્યુબ પેજ પર ઓનલાઈન જોઈ શકશે. જન્માષ્ટમીના દિવસે તમામ યાત્રિકોને પ્રસાદનું વિતરણ કરવામાં આવશે.

જન્માષ્ટમી એટલે કે નંદોત્સવના બીજા દિવસે મંદિર પ્રશાસને 10,000 લોકો માટે ભંડારા અને પ્રસાદનું આયોજન કર્યું છે. આ સાથે ઈસ્કોનના સ્થાપક આચાર્ય શ્રી શ્રીમદ એ.સી. ભક્તિવેદાંત સ્વામી પ્રભુપાદજીની 127મી જન્મજયંતિ પણ ઉજવાશે અને બપોરે 12 કલાકે તમામ ભક્તો માટે પ્રસાદ ભોજનની વ્યવસ્થા કરવામાં આવી છે.

આ પણ વાંચો:દ્વારકાધીશ મંદિરમાં કૃષ્ણ ભક્તોને લઈ મહત્વના સમાચાર, જાણો જન્માષ્ટમીને લઈ મહત્વનું અપડેટ

આ પણ વાંચો:જન્માષ્ટમી પર બનાવો સ્વાદિષ્ટ વાનગી ગોપાલકલા

આ પણ વાંચો:દુલ્હનની જેમ શણગારવામાં આવ્યું મથુરા-વૃંદાવન, જન્માષ્ટમી પર્વની શરૂ થઈ ઉજવણી