Gujarat News:ગુજરાત સરકારના (Gujarat) ડિજિટલાઈઝેશન (Digitalization) અભિયાને મહેસૂલ વિભાગની સેવાઓને પારદર્શક, ઝડપી અને નાગરિક-કેન્દ્રિત બનાવી દીધી છે.મુખ્યમંત્રી ભૂપેન્દ્ર પટેલના નેતૃત્વમાં શરૂ કરાયેલા iORA પોર્ટલ અને અન્ય ડિજિટલ પ્લેટફોર્મ્સએ જમીન નોંધણીથી લઈને બિનખેતી (NA) પરવાનગી સુધીની પ્રક્રિયાઓને ઘરે બેઠા પૂર્ણ કરવાનું સરળ બનાવ્યું છે. આ પહેલથી ગુજરાત દેશમાં સુશાસનનું ઉદાહરણ બની રહ્યું છે.
2022થી લઈને 18 ડિસેમ્બર 2025 સુધીમાં iORA (Integrated Online Revenue Applications) પોર્ટલ પર વિવિધ 36 પ્રકારની મહેસૂલી સેવાઓને લગતી કુલ 17.9 લાખથી વધુ અરજીઓ પ્રોસેસ કરવામાં આવી છે. આ પોર્ટલ ફેસલેસ સર્વિસ પર આધારિત છે, જેના કારણે પારદર્શિતા વધી છે અને નિર્ણય પ્રક્રિયા ઝડપી બની છે.પોર્ટલના ફીડબેક સેન્ટરે 40,799 કોલના જવાબ આપીને નાગરિકોની સમસ્યાઓનું ત્વરિત નિરાકરણ કર્યું છે. આ સિસ્ટમથી અરજદારોને ઓફિસના ધક્કા ખાવા પડતા નથી અને ભ્રષ્ટાચારની શક્યતાઓ પણ ઘટી છે.
ગુજરાત (Gujarat) ગરવી 2.0 પોર્ટલ
મહેસૂલ વિભાગે ગરવી 2.0 પોર્ટલના રાજ્યવ્યાપી અમલીકરણ દ્વારા દસ્તાવેજ નોંધણી પ્રક્રિયાને સંપૂર્ણપણે ઓનલાઈન અને ફેસલેસ બનાવી દીધી છે. આનાથી નાગરિકો ઘરે બેઠા દસ્તાવેજો રજિસ્ટર કરાવી શકે છે, જે પહેલાં લાંબી કતારો અને કાગળની કાર્યવાહીમાં અટવાતું હતું.
જમીન સંપાદનની પ્રક્રિયાને વધુ ઝડપી બનાવવા માટે ગતિશક્તિ પોર્ટલ સાથે એકીકરણ કરવામાં આવ્યું છે. આના પરિણામે રાજ્યના જાહેર ક્ષેત્રના 60થી વધુ મહત્વના પ્રોજેક્ટ્સમાં જમીન સંપાદન સરળતાથી પૂર્ણ થયું છે. આ પહેલથી ઈન્ફ્રાસ્ટ્રક્ચર વિકાસને વેગ મળ્યો છે અને નાગરિકોને પણ ઝડપી લાભ મળી રહ્યો છે.
મુખ્યમંત્રી ભૂપેન્દ્ર પટેલે આ પહેલોને “નાગરિકોની સુવિધા માટેનું ડિજિટલ ક્રાંતિ” ગણાવી છે. ગુજરાતના (Gujarat) આ મોડેલને અન્ય રાજ્યો પણ અપનાવી રહ્યા છે, જે દેશમાં ઈ-ગવર્નન્સના ક્ષેત્રે ગુજરાતને અગ્રેસર બનાવે છે.આવી ડિજિટલ પહેલોથી ગુજરાતના નાગરિકોને વધુ સશક્ત બનાવવામાં આવી રહ્યા છે. તમે પણ iORA અથવા ગરવી પોર્ટલનો ઉપયોગ કરીને આ સુવિધાઓનો લાભ લઈ શકો છો.
