Gujarat First Rocket Launch Dholera: 14મી માર્ચ 2026નો દિવસ ગુજરાત માટે ગૌરવશાળી સાબિત થયો છે. અમદાવાદ સ્થિત સ્પેસ સ્ટાર્ટઅપ ‘ઓમસ્પેસ રોકેટ એન્ડ એક્સપ્લોરેશન’ (OSRE) દ્વારા ધોલેરાના બાવળીયારી ખાતેથી ગુજરાતના સર્વપ્રથમ સાઉન્ડિંગ રોકેટનું સફળતાપૂર્વક લોન્ચિંગ કરવામાં આવ્યું છે. વિજ્ઞાન અને પ્રૌદ્યોગિકી મંત્રી અર્જુન મોઢવાડિયાએ આ ઐતિહાસિક ક્ષણના સાક્ષી બની યુવા વૈજ્ઞાનિકોની ટીમને બિરદાવી હતી.
Dholera બન્યું ગુજરાતનું ‘શ્રીહરિકોટા’
બપોરે બરાબર 01:00 વાગ્યે જ્યારે રોકેટે ધોલેરાના આકાશમાં સફળતાપૂર્વક ઉડાન ભરી, ત્યારે સમગ્ર વિસ્તાર ‘ભારત માતા કી જય’ના નાદથી ગુંજી ઉઠ્યો હતો. આ સિંગલ-સ્ટેજ રોકેટે આશરે 3 કિલોમીટરની ઊંચાઈ પ્રાપ્ત કરીને પોતાનું પરીક્ષણ સફળતાપૂર્વક પૂર્ણ કર્યું હતું. આ રોકેટની સાથે એક મીની સેટેલાઈટ પણ અવકાશમાં મોકલવામાં આવ્યો હતો, જે ખાસ કરીને હવામાન સંબંધિત ડેટા એકત્રિત કરવાનું મહત્વનું કામ કરશે. સંપૂર્ણપણે સ્વદેશી ટેકનોલોજી પર આધારિત આ રોકેટમાં વપરાયેલ એરફ્રેમ અને કાર્બન ફાઈબર મટીરિયલ ‘મેક ઇન ઇન્ડિયા’ અભિયાન હેઠળ અમદાવાદની લેબમાં જ તૈયાર કરવામાં આવ્યું છે.
મંત્રી અર્જુન મોઢવાડિયાનું મોટું નિવેદન
લોન્ચિંગ સમયે ઉપસ્થિત મંત્રી અર્જુન મોઢવાડિયાએ જણાવ્યું હતું કે, “ગુજરાત સ્પેસટેક પોલિસી (2025-2030) ને કારણે આજે ખાનગી ક્ષેત્રના યુવા વૈજ્ઞાનિકો માટે નવી તકો ખુલી છે. આ લોન્ચિંગ સ્પેસ સેક્ટરમાં ગુજરાતની આત્મનિર્ભરતા તરફનું એક મક્કમ ડગલું છે.”
શું છે ‘ઓમસ્પેસ’નો આગામી પ્લાન?
ઓમસ્પેસના CEO ડો. રવિન્દ્ર રાજે જણાવ્યું કે આ સફળતા બાદ હવે તેઓ ભારતના પ્રથમ સંપૂર્ણ સ્વદેશી રિયુઝેબલ (ફરી વાપરી શકાય તેવા) લોન્ચ વ્હીકલ ‘ઇન્ફિનિટી વન’ (Infinity One) પર કામ શરૂ કરશે. આ મિશનને ઈસરો (ISRO) ની સંસ્થા IN-SPACe દ્વારા અધિકૃતતા આપવામાં આવી હતી.
ટેકનિકલ સપોર્ટ અને સુરક્ષા
આ લોન્ચિંગ માટે એરપોર્ટ ઓથોરિટી ઓફ ઇન્ડિયા (AAI), ઇન્ડિયન કોસ્ટ ગાર્ડ અને DGCA દ્વારા ખાસ ટેકનિકલ સહયોગ અને સુરક્ષા મંજૂરીઓ આપવામાં આવી હતી. આ પ્રસંગે ધારાસભ્ય કાળુભાઈ ડાભી અને વિજ્ઞાન વિભાગના ઉચ્ચ અધિકારીઓ પણ હાજર રહ્યા હતા.
આ પણ વાંચોઃ અમદાવાદ-ધોલેરા એક્સપ્રેસ હાઈવે પર ખાડાઓનું સામ્રાજ્ય, કોન્ટ્રાક્ટરની કામગીરી શંકાના દાયરામાં!
