Ahmedabad News: ગુજરાતમાં સતત વૃક્ષો કાપવામાં આવી રહ્યા છે. અને ચારે બાજુ સિમેન્ટ કોંક્રીટના જંગલો ઉગી રહ્યા છે. રિયલ એસ્ટેટનો બિઝનેસ દરેક જગ્યાએ જોવા મળી રહ્યો છે. આવી સ્થિતિમાં આપણને ઓક્સિજન પૂરો પાડતા વૃક્ષો સતત કપાઈ રહ્યા છે. હવે ગુજરાત હાઈકોર્ટે પણ આ બાબતને ગંભીરતાથી લીધી છે. આ મામલે ગુજરાત હાઈકોર્ટે મહત્વનો નિર્ણય આપ્યો છે.
હાલમાં ગુજરાતમાં દરેક જગ્યાએ રિયલ એસ્ટેટનું કામ ચાલી રહ્યું છે. આ ઉપરાંત ઉદ્યોગપતિઓ ઔદ્યોગિક એકમો માટે જમીન પણ સંપાદન કરી રહ્યા છે. ત્યારે વિકાસની આ દોડમાં વૃક્ષોનો નાશ થઈ રહ્યો છે. ગુજરાત હાઈકોર્ટે આ બાબતને ગંભીરતાથી લીધી છે. સમગ્ર મામલે ગુજરાત હાઈકોર્ટે મહત્વનો નિર્ણય સંભળાવ્યો છે. ગુજરાતમાં જમીન સંપાદનની કામગીરીમાં કપાયેલા કે કાપવામાં આવનાર દરેક વૃક્ષ માટે અલગથી વળતર ચૂકવવું પડશે.
ગુજરાત હાઈકોર્ટે મંગળવારે વલસાડમાં એક્સપ્રેસ વે માટે જમીન સંપાદન ઝુંબેશને લગતા કેસમાં આ ચુકાદો આપ્યો હતો. વલસાડમાં એક્સપ્રેસ વે માટે જમીન સંપાદનથી અસરગ્રસ્ત 1300 ખેડૂતોમાંથી 820 ખેડૂતોએ હાઈકોર્ટમાં અપીલ કરી હતી. ખેડૂતોના વકીલ આનંદ યાજ્ઞિકે જણાવ્યું હતું કે સરકારના જમીન સંપાદન અધિકારીએ 2021માં જમીન સંપાદનનું વળતર ચૂકવી દીધું હતું પરંતુ વૃક્ષોના સંપાદનના નાણાં ચૂકવવામાં આવ્યા નથી. એટલું જ નહીં જમીન સંપાદનનું વળતર આપ્યાના બે વર્ષ બાદ અચાનક જમીન સંપાદન અધિકારીએ વૃક્ષોના સંપાદનના નાણાં ચૂકવવાના બદલે અડધા પંચનામા મુજબ વળતર વસૂલ્યું હતું.
આ સંદર્ભમાં, મુખ્ય ન્યાયાધીશ સુનીતા અગ્રવાલની ડિવિઝન બેન્ચે ચુકાદો આપ્યો હતો કે રાજ્યભરમાં જમીન સંપાદનની પ્રક્રિયામાં વળતર આપ્યા પછી જમીન સંપાદન અધિકારી વસૂલાત કરી શકતા નથી. એટલું જ નહીં, વૃક્ષોની અલગથી ગણતરી કરવાની રહેશે અને સંપાદન માટે કરાયેલા પંચનામા મુજબ વળતર આપવું પડશે. યાજ્ઞિકે દલીલ કરી હતી કે નાયબ કલેક્ટર અને જમીન સંપાદન અધિકારીઓએ વન વિભાગના આકારણી અહેવાલના આધારે બે પંચનામા તૈયાર કર્યા હતા.
વૃક્ષોની સંખ્યા અને ઉંમરના આધારે વળતર આપવું પડશે. પરંતુ વન અધિકારીએ વૃક્ષોની ગણતરી ખોટી કરી હતી. જમીન સંપાદનના પંચનામા મુજબ ખેડૂતોને વળતર આપવામાં આવ્યું હતું. જ્યારે ખેડૂતોએ વૃક્ષોના સંપાદન માટે અરજી કરી ત્યારે સંપાદન અધિકારીએ વધુ વળતર ચુકવ્યું હોવાનું જણાવી ખેડૂતો પાસેથી રકમ વસૂલ કરી હતી.
ખંડપીઠે કહ્યું કે તમારા વન અધિકારી દ્વારા વૃક્ષોની ગણતરી ખોટી હોવાનું બહાનું કરીને તમે વૃક્ષોનું વળતર આપી રહ્યા નથી. ખેડૂતોને પૈસા આપવાને બદલે તમે તેમની પાસેથી વસૂલ કરી રહ્યા છો કારણ કે તમારા અધિકારીઓએ વૃક્ષોની સંખ્યા અને ઉંમરનું ખોટું મૂલ્યાંકન કર્યું છે? વૃક્ષોને અલગથી સંપાદિત કરવા પડશે.
હાઈકોર્ટે પોતાના નિર્ણયમાં સ્પષ્ટ કર્યું હતું કે એક્સપ્રેસ વે માટે ખેડૂતોની જમીન સંપાદિત કરીને પંચનામા અને વળતર જાહેર કર્યા પછી તે પોતાની રીતે સુધારો કરી શકે નહીં. હાઈકોર્ટે ખેડૂતોને આપેલી રિકવરી નોટિસ રદ કરી અને તેમણે વૃક્ષોના પંચનામા પ્રમાણે ગણતરી કરીને વળતર ચૂકવવું પડશે.
આ પણ વાંચો:ગુજરાતમાં મેઘરાજા મન મૂકી વરસ્યા, ખેડૂતોમાં ખુશીની લહેર
આ પણ વાંચો: અમદાવાદમાં આવ્યો વાતાવરણમાં પલટો, રાજ્યમાં વરસાદની લહેર
આ પણ વાંચો: GSSSB દ્વારા નવી ભરતી, જાણો ક્યારે યુવાનો અરજી કરી શકશે…
