વડોદરા,
વડોદરા શહેરના નવલખી મેદાન ખાતે પોતાના બોયફ્રેન્ડ સાથે બર્થ ડે મનાવવા ગયેલી યુવતી પર થયેલી ગેંગરેપની ઘટનામાં યુવતીના નિવેદન બાદ નવો વળાંક આવ્યો છે. આ યુવતી અને તેના પરિવારજનોએ પોલીસ પૂછરપછમાં જણાવ્યું હતુ કે, યુવતી સાથે ગેંગરેપ થયો જ નથી. જેના કારણે હવે આ ઘટનાએ આખો યુ ટર્ન લીધો છે.
આ યુવતીએ તેના નિવેદનમાં જણાવ્યું હતું કે, વડોદરા શહેરના નવલખી મેદાનમાં ગત સોમવારના રોજ બર્થ-ડે હોવાથી તેના મિત્ર (બોયફ્રેન્ડ) સાથે બેઠી હતી. ત્યારે તેના બોયફ્રેન્ડ યુવક પાસે ત્રણ શખ્સો ધસી આવ્યાં હતા. આ શખ્સોએ પોતે સિક્યુરિટીના માણસો હોવાનો રોફ ઝાડીને સોનાની ચેઈન, સોના-ચાંદીની વીટી અને 2 મોબાઇલ ફોન મળી કુલ રૂ. 16 હજારની લુંટ ચલાવી ફરાર થઇ ગયા હતા. યુવતીના આ નિવેદન બાદ હવે આ ઘટના અંગે રાવપુરા પોલીસે લૂંટનો ગુનો નોંધી વધુ તપાસ હાથ ધરી છે.
ગેંગરેપની ઘટનામાં આવ્યો યુ-ટર્ન , ‘યુવતીએ કહ્યું રેપ થયો જ નથી’
આ અંગે પ્રાપ્ત માહિતી મુજબ વડોદરા શહેરના જૂના પાદરા રોડ પર રહેતો એક યુવક ગત સોમવારના રોજ તેની મિત્ર (ગર્લફ્રેન્ડ) નો જન્મ દિવસ હોવાથી તેની સાથે નવલખી મેદાનમાં બેઠો હતો. આ દરમિયાન ત્રણ અજાણ્યા શખ્સો ત્યાં આવી પહોંચ્યા હતા. આ શખ્સોએ પોતે સિક્યુરીટીના માણસો હોવાનો રોફ ઝાડી યુવકને બીભત્સ ગાળો બોલીને તેની પાસેનો સેમસંગ અને એચપી કંપનીનો મોબાઇલ ફોન તેમજ 2 વીટી અને ચેઇન મળી કુલ રૂ. 16 હજારની મત્તાની લૂંટ કરી ફરાર થઇ ગયા હતા.
એટલું જ નહિ નવલખી મેદાનમાં બોયફ્રેન્ડ સાથે બેઠેલી યુવતી પાસે ધસી આવેલા ત્રણ શખ્સોએ તેની સાથે બળાત્કાર ગુજાર્યો હતો. બળાત્કારની ઘટના બાદ યુવતી તેના બોયફ્રેન્ડ સાથે રસ્તા પર આવી પહોંચ્યાં હતા. ત્યાં યુવકને તેનો એક મિત્ર મળતા તેના મોબાઇલ ફોનથી અન્ય મિત્રોને બોલાવી બનાવની જાણ કરી હતી. જેથી મિત્રએ પોલીસ ફરિયાદ ફરીયાદ કરવા અંગે જણાવ્યું હતુ. પરંતુ યુવતી અને તેનો બોયફ્રેન્ડ બનાવના દિવસે પોલીસ સ્ટેશને પહોંચ્યા ન હતા. ત્યારબાદ આ મામલો શહેરની ‘લક્ષ્ય ટ્રસ્ટ’ સંસ્થા પાસે પહોંચ્યો હતો. જેથી ‘લક્ષ્ય ટ્રસ્ટ’ દ્વારા યુવતી અને તેના બોયફ્રેન્ડને રાવપુરા પોલીસ મથકે લઇ જવામાં આવ્યા હતા.
આ ઘટનાની ગંભીરને ધ્યાનમાં લઈને ઉચ્ચ પોલીસ અધિકારીએ જાતે જ આ મામલાની તપાસ હાથમાં લીધી હતી. જેમાં યુવતી અને તેના બોયફ્રેન્ડ સહિત પરિવારજનોને બોલાવી પૂછપરછ કરતા સમગ્ર મામલામાં એક નવો વળાંક આવ્યો હતો. જેમાં નવલખી મેદાનમાં બોયફ્રેન્ડ સાથે બેઠેલી યુવતી પર ગેંગરેપ થયો હોય તેવા પ્રકારનો કોઇ બનાવ બન્યો જ નથી તેવુ યુવતી અને તેના પરિવારજનો દ્વારા પોલીસ સમક્ષ જણાવાયું હતું. યુવતી અને તેના પરિવારજનોના નિવેદન બાદ આ ઘટનામાં ‘રેપ’નો ગુનો ન બનતો હોવાથી પોલીસ દ્વારા હવે માત્ર લૂંટનો ગુનો નોંધીને વધુ તપાસ હાથ ધરવામાં આવી છે.
