આજથી (16 ફેબ્રુઆરી) ગુજરાત વિધાનસભાના બજેટ (Gujarat Budget Session 2026) સત્રનો પ્રારંભ થયો. 15મી વિધાનસભાના આઠમા સત્રના પ્રથમ દિવસે જ ગૃહની બહાર અને અંદર રાજકીય ચહલપહલ જોવા મળી. ગોપાલ ઈટાલીયા અને ચૈતર વસાવા ‘ટ્રેડ ડીલ હટાવો, કિસાન બચાવો’ લખેલા પોસ્ટર સાથે વિધાનસભા પહોંચતા રાજકીય માહોલ ગરમાયો. સત્ર શરૂ થાય તે પહેલાં ભાજપે પોતાની વ્યૂહરચના નક્કી કરવા મહત્વપૂર્ણ બેઠક પણ યોજી હતી.
Gujarat Budget Session 2026: રાજ્યપાલનું સંબોધન અને વિપક્ષનો વિરોધ
સત્રના પ્રારંભે રાજ્યપાલ આચાર્ય દેવવ્રતે આશરે 21 મિનિટ સુધી ગૃહને સંબોધિત કર્યું. તેમણે રાજ્ય સરકારની જનકલ્યાણકારી યોજનાઓ, કૃષિ અને ઈન્ફ્રાસ્ટ્રક્ચર વિકાસ સહિત ગરીબ કલ્યાણ માટેના પ્રયત્નોનું વિસ્તૃત વર્ણન કર્યું અને સર્વાંગી વિકાસ માટે સરકાર પ્રતિબદ્ધ હોવાનું જણાવ્યું.
રાજ્યપાલના ભાષણ દરમિયાન કોંગ્રેસના ધારાસભ્યો ‘ખેડૂતોનું દેવું માફ કરો’ના નારા લગાવી વિરોધ નોંધાવતા દેખાયા. તેના જવાબમાં ભાજપના સભ્યોએ પાટલીઓ ખખડાવી પ્રતિક્રિયા આપી, જેના કારણે ગૃહમાં થોડીવાર તણાવપૂર્ણ સ્થિતિ સર્જાઈ. ભાષણ પૂર્ણ થયા બાદ રાજ્યપાલે તમામ સભ્યોનો આભાર વ્યક્ત કર્યો અને વિરોધ વચ્ચે પણ સંસદીય પરંપરાનું પાલન કરવાની લાગણી વ્યક્ત કરી.
ઉપાધ્યક્ષ પદે પૂર્ણેશ મોદીની પસંદગી
ગાંધીનગરમાં યોજાયેલા સત્ર દરમિયાન ઉપાધ્યક્ષ પદ માટે ચૂંટણી યોજાઈ, જેમાં રાજકીય સ્પર્ધા વચ્ચે અંતે પૂર્ણેશ મોદીની બહુમતીથી વિજેતા જાહેર થયા. દિનેશ ઠાકોરે શૈલૈષ પરમારના નામનો પ્રસ્તાવ મૂક્યો હતો, જ્યારે જીતુ વાઘાણીએ પૂર્ણેશ મોદીના નામે પ્રસ્તાવ રજૂ કર્યો હતો. મતવિચારણા બાદ બહુમતી સમર્થન પૂર્ણેશ મોદીને મળ્યું.
આમ આદમી પાર્ટીએ મતદાન દરમિયાન કોઈ ઉમેદવારને ટેકો ન આપતા ‘NOTA’ વિકલ્પ પસંદ કર્યો. ઉપાધ્યક્ષ તરીકે પસંદગી બાદ પૂર્ણેશ મોદીએ વિપક્ષ નેતા તુષાર ચૌધરીની બાજુમાં સ્થાન ગ્રહણ કર્યું.
દિવંગત સભ્યોને શ્રદ્ધાંજલિ, બે મિનિટનું મૌન
સત્રના પ્રથમ દિવસે ગૃહના નેતા અને મુખ્યમંત્રી ભુપેન્દ્ર પટેલે પૂર્વ વિધાનસભ્યોને શ્રદ્ધાંજલિ અર્પી. પૂર્વ મંત્રી સ્વ. મનસુખ છગનલાલ જોષી, સ્વ. મોહંમદ ગુલામમોહયુદીન સુરતી તેમજ અન્ય પૂર્વ સભ્યોના અવસાન પર શોક વ્યક્ત કરવામાં આવ્યો.
વિધાનસભાના અધ્યક્ષ શંકર ચૌધરી, મંત્રી અર્જુન મોઢવાડીયા તથા અન્ય સભ્યોએ પણ ભાવાંજલિ આપી. સમગ્ર ગૃહે દિવંગત આત્માઓની શાંતિ માટે બે મિનિટનું મૌન પાળ્યું.
ભાજપની વ્યૂહરચના બેઠક
સત્ર પૂર્વે ભાજપે ધારાસભ્યો સાથે બેઠક યોજી, જેમાં વિપક્ષના પ્રશ્નોને કેવી રીતે જવાબ આપવો, ગૃહમાં સંગઠિત હાજરી સુનિશ્ચિત કરવી અને મહત્વપૂર્ણ મતવિચારણાઓ દરમિયાન એકતા જાળવવી તે અંગે માર્ગદર્શન આપવામાં આવ્યું.
સ્કૂલ બોમ્બ ધમકી મુદ્દે નિવેદન
રાજ્યમાં સ્કૂલમાં બોમ્બની ધમકી અંગે ગૃહ રાજ્યમંત્રી હર્ષ સંઘવીએ જણાવ્યું કે મામલે ડીજીપીને તાત્કાલિક તપાસ માટે સૂચનાઓ અપાઈ છે. અગાઉની સમાન ઘટનાઓમાં દોષિતો સામે કડક પગલાં લેવાયા હોવાનું તેમણે જણાવ્યું. સાથે જ તેમણે તમામ ધારાસભ્યોને બજેટ સત્ર માટે શુભેચ્છા પાઠવી અને જનહિતના મુદ્દાઓ ઉઠાવવા અનુરોધ કર્યો.
આ પણ વાંચો: જામનગરમાં શોભાયાત્રામાં 45 વર્ષમાં પહેલી જ વખત ડીજે બંધ રખાતા શ્રદ્ધાળુઓ લાલઘૂમ
આ પણ વાંચો:સેવન્થ ડે સ્કૂલનો વિવાદ: 2,400 વિદ્યાર્થીઓને RTE હેઠળ પ્રવેશ ન આપ્યો
