Maintenance for Hindu Widow Daughter-in-law: અલ્હાબાદ હાઈકોર્ટે એક મહત્વપૂર્ણ ચુકાદો આપતા જણાવ્યું છે કે હિન્દુ વિધવા મહિલાઓ તેમના ભરણપોષણ માટે સસરા પાસે દાવો કરી શકે છે. જસ્ટિસ અરિંદમ સિંહા અને જસ્ટિસ સત્યવીર સિંહની બેન્ચે ટિપ્પણી કરી હતી કે, પત્નીનું ભરણપોષણ કરવાની પતિની જવાબદારી તેના મૃત્યુ પછી પણ કાયદાકીય રીતે ચાલુ રહે છે, જે વિધવા વહુને તેના સસરા પાસેથી ગુજારો માંગવાનો અધિકાર આપે છે.

કાયદો શું કહે છે?

હાઈકોર્ટે ‘હિન્દુ દત્તક અને ભરણપોષણ અધિનિયમ, 1956’ ની કલમ 19 અને 21 નો ઉલ્લેખ કરતા સ્પષ્ટ કર્યું છે કે કેટલીક ચોક્કસ શરતો હેઠળ વિધવા વહુ સસરાની મિલકતમાંથી ભરણપોષણ મેળવવા માટે હકદાર છે.

Maintenance માંગવા માટેની મુખ્ય શરતો

કોર્ટે આ અધિકાર આપવાની સાથે કેટલીક શરતો પણ સ્પષ્ટ કરી છે, જે જાણવી ખૂબ જરૂરી છે. આ શરતો મુજબ, આત્મનિર્ભરતાના અભાવે વિધવા વહુ ત્યારે જ સસરા પાસે મદદ માંગી શકે જ્યારે તેની પાસે પોતાની કોઈ કમાણી ન હોય અથવા પોતાની કોઈ મિલકત ન હોય જેનાથી તે ગુજરાન ચલાવી શકે. અન્ય કોઈ સ્ત્રોત ન હોવાના કિસ્સામાં, જો વિધવા મહિલા તેના મૃત પતિની મિલકતમાંથી, તેના માતા-પિતાની મિલકતમાંથી અથવા તેના બાળકો અને તેમની મિલકતમાંથી ભરણપોષણ મેળવવામાં સંપૂર્ણપણે અસમર્થ હોય, તો જ તે સસરા પાસે દાવો કરી શકે છે. જોકે, આ માટે સસરા પાસે સાધન હોવા પણ જરૂરી છે. સસરાની જવાબદારી ત્યારે જ બને છે જ્યારે તેમની પાસે પોતાની હિસ્સેદારીવાળી અથવા પૈતૃક મિલકત હોય. જો સસરા પાસે આવકનું કોઈ સાધન ન હોય તો તેઓ બંધાયેલા નથી. વધુમાં, જો વહુ બીજા લગ્ન કરી લે છે, તો સસરાની ભરણપોષણ આપવાની આ જવાબદારી કાયદેસર રીતે સમાપ્ત થઈ જાય છે.

પુત્રીના લગ્ન બાદ પિતાની જવાબદારી નથી

આ કેસની સુનાવણી દરમિયાન કોર્ટે એક અન્ય મહત્વની વાત પણ કહી કે, એક પિતાની જવાબદારી તેની પુત્રીના લગ્ન પછી સમાપ્ત થઈ જાય છે. પિતા તેની પરણિત પુત્રીનું ભરણપોષણ કરવા માટે કાયદેસર રીતે બંધાયેલા નથી, સિવાય કે તે વિધવા થઈ ગઈ હોય અને તેની પાસે ગુજરાન ચલાવવાનો કોઈ સ્ત્રોત ન હોય.

શું હતો સમગ્ર મામલો?

હકીકતમાં, હાઈકોર્ટ એક પતિ દ્વારા દાખલ કરવામાં આવેલી અપીલ પર સુનાવણી કરી રહી હતી. પતિએ આક્ષેપ કર્યો હતો કે તેની પત્નીએ ભરણપોષણ મેળવવા માટે ખોટું બોલીને હકીકતો છુપાવી છે. જોકે, કોર્ટે પત્નીનો પક્ષ સાંભળ્યા બાદ અને કાયદાની જોગવાઈઓ તપાસ્યા બાદ આ મહત્વની ટિપ્પણી કરી હતી.

આ પણ વાંચો: પરિણીત પુરુષનું લિવ-ઈન રિલેશનશિપમાં રહેવું ગુનો નથી, અલ્હાબાદ હાઈકોર્ટનો ઐતિહાસિક ચુકાદો

આ પણ વાંચો: અલ્હાબાદ હાઈકોર્ટના બે અલગ ચુકાદા પર વિવાદ, શું છૂટાછેડા વગર લિવ-ઈન કાયદેસર છે?

આ પણ વાંચો: ખાનગી મિલકત પર પ્રાર્થના માટે પરવાનગી જરૂરી નથી, અલ્હાબાદ હાઈકોર્ટે કરી સ્પષ્ટતા