છેલ્લા કેટલાક દિવસોમાં જમ્મુ -કાશ્મીરમાં વધેલા આતંકી હુમલા વચ્ચે કેન્દ્રીય ગૃહમંત્રી અમિત શાહ ઘાટીની મુલાકાત લેવાના છે. ગૃહમંત્રી અમિત શાહ 23 થી 25 ઓક્ટોબર સુધી જમ્મુ -કાશ્મીરમાં રહેશે.સૂત્રોના જણાવ્યા અનુસાર, ગૃહમંત્રી શાહની ત્રણ દિવસની મુલાકાત કેન્દ્રના મોટા કાર્યક્રમની બીજી આવૃત્તિનો ભાગ છે જે આ વર્ષે 8 સપ્ટેમ્બરથી શરૂ થઈ હતી, જેના હેઠળ 70 કેન્દ્રીય પ્રધાનોએ કેન્દ્રશાસિત પ્રદેશની મુલાકાત લીધી હતી.
જમ્મુ -કાશ્મીરમાં કલમ 370 હટાવ્યા બાદ અમિત શાહની ઘાટીની આ પ્રથમ મુલાકાત હશે. ગૃહમંત્રીની આ મુલાકાત વિવિધ કેન્દ્રીય યોજનાઓ વિશે લોકોને જાણ કરવા તેમજ જમીન પરથી પ્રતિસાદ મેળવવા માટે બનાવવામાં આવી છે. અત્યાર સુધી ઘણા મંત્રીઓ જનતા સુધી પહોંચ્યા છે. સૂત્રોએ જણાવ્યું હતું કે, ઘાટી પહોંચ્યા બાદ અમિત શાહ અધિકારીઓને મળશે, કાયદો અને વ્યવસ્થાની સ્થિતિની સમીક્ષા કરશે અને વિવિધ પ્રોજેક્ટ્સની સમીક્ષા કરશે
સૂત્રોએ જણાવ્યું કે, શાહ ત્યાં ભાજપના નેતાઓ સાથે પણ મુલાકાત કરશે, જેમાં સુરક્ષા, વિકાસ પ્રોજેક્ટ્સ, મેગા આઉટરીચ પ્રોગ્રામ વગેરે જેવા વિવિધ મુદ્દાઓ પર ચર્ચા કરવામાં આવશે. કેન્દ્ર સરકારનો પ્રથમ મેગા આઉટરીચ કાર્યક્રમ ગયા વર્ષે 18-24 જાન્યુઆરી દરમિયાન થયો હતો જેમાં 36 કેન્દ્રીય મંત્રીઓએ જમ્મુ-કાશ્મીરની મુલાકાત લીધી હતી. આ કાર્યક્રમનો ઉદ્દેશ જમ્મુ અને કાશ્મીરમાં ચાલી રહેલા પ્રોજેક્ટ્સ અને કલમ 370 અને 35 એ નાબૂદ થયા બાદ વિકાસની સમીક્ષા કરવાનો છે.
