Monsoon Update: ઉત્તર-પશ્ચિમ ભારત, રાજસ્થાન અને ગુજરાતમાં છેલ્લા કેટલાક દિવસોથી નબળું પડેલું ચોમાસું હવે ફરી સક્રિય થવાની તૈયારીમાં છે. હવામાન વિભાગના જણાવ્યા અનુસાર, ઉત્તર-પૂર્વ ભારતમાં સર્જાયેલી ચક્રવાતી પરિસ્થિતિ અને પશ્ચિમી વિક્ષેપોના પ્રભાવથી 20 જુલાઈ બાદ વરસાદની ગતિવિધિમાં નોંધપાત્ર વધારો થવાની શક્યતા છે. જેના કારણે દેશના અનેક રાજ્યોમાં ભારે વરસાદની સ્થિતિ સર્જાઈ શકે છે.

18 રાજ્યોમાં ભારે વરસાદનું એલર્ટ

હવામાન વિભાગે 14 જુલાઈ માટે વિવિધ રાજ્યોમાં વરસાદને લઈને ચેતવણીઓ જાહેર કરી છે. ઉત્તર પ્રદેશ અને બિહાર સહિત કુલ 18 રાજ્યોમાં ભારે વરસાદ માટે રેડ એલર્ટ જાહેર કરવામાં આવ્યું છે. જ્યારે પૂર્વ ઉત્તર પ્રદેશ, બિહાર, આસામ, મેઘાલય, સિક્કિમ અને હિમાલય પશ્ચિમ બંગાળના વિસ્તારોમાં ઓરેન્જ એલર્ટ લાગુ કરાયું છે.

જમ્મુ-કાશ્મીર, ઓડિશા અને પશ્ચિમ બંગાળના કેટલાક ભાગોમાં યલો એલર્ટ જાહેર કરવામાં આવ્યું છે. બીજી તરફ રાજસ્થાન, પશ્ચિમ મધ્યપ્રદેશ, આંધ્રપ્રદેશ અને ગુજરાતના સરહદી વિસ્તારોમાં આગામી દિવસોમાં ગરમીનો પ્રભાવ યથાવત રહેવાની શક્યતા વ્યક્ત કરવામાં આવી છે.

ઉત્તર પ્રદેશ અને બિહારમાં વરસાદની અછત છતાં ભારે વરસાદની આગાહ

ઉત્તર પ્રદેશના 22 જિલ્લાઓમાં વરસાદની આગાહી કરવામાં આવી છે. જેમાં આઠ જિલ્લાઓમાં ભારે અને પાંચ જિલ્લાઓમાં અતિ ભારે વરસાદ પડી શકે છે. ગોરખપુરમાં છેલ્લા કેટલાક દિવસોમાં 168 મીમી વરસાદ નોંધાતા અનેક વિસ્તારોમાં પાણી ભરાઈ જવાની સ્થિતિ સર્જાઈ છે.

જોકે રાજ્યમાં 1 જૂનથી અત્યાર સુધી માત્ર 158.8 મીમી વરસાદ નોંધાયો છે, જે સામાન્ય કરતાં 17 ટકા ઓછો છે.
બિહારમાં 27 જિલ્લાઓ માટે ઓરેન્જ એલર્ટ જાહેર કરવામાં આવ્યું છે. આગામી ચાર દિવસ સુધી રાજ્યમાં હળવાથી મધ્યમ વરસાદ ચાલુ રહેવાની શક્યતા છે. રાજ્યમાં અત્યાર સુધી સામાન્ય કરતાં 47 ટકા ઓછો વરસાદ નોંધાયો છે.

ઉત્તરાખંડમાં ભૂસ્ખલન, યાત્રા પર અસર

ઉત્તરાખંડમાં સતત વરસાદને કારણે અનેક વિસ્તારોમાં ભૂસ્ખલનની ઘટનાઓ સામે આવી છે. દેહરાદૂન, ચમોલી, રુદ્રપ્રયાગ, બાગેશ્વર અને પિથોરાગઢ માટે યલો એલર્ટ જાહેર કરવામાં આવ્યું છે.

ભૂસ્ખલનના કારણે ઋષિકેશ-યમુનોત્રી નેશનલ હાઈવે સહિત બે રાષ્ટ્રીય ધોરીમાર્ગો અને 126થી વધુ રસ્તાઓ બંધ થઈ ગયા છે. વિકાસનગર નજીક લખવાર પ્રોજેક્ટ વિસ્તારમાં ભારે કાટમાળમાં મશીનો દટાઈ જવાની ઘટના પણ બની છે. પરિસ્થિતિને ધ્યાનમાં રાખીને કેદારનાથ યાત્રા તાત્કાલિક સ્થગિત કરવામાં આવી છે.

હરિયાણા અને દિલ્હીમાં પૂર જેવી સ્થિતિ

હિમાચલ પ્રદેશમાંથી છોડાયેલા પાણીના કારણે હરિયાણામાં યમુના અને માર્કંડા નદીઓનું જળસ્તર વધ્યું છે. જેના કારણે અનેક નીચાણવાળા વિસ્તારોમાં પૂર જેવી સ્થિતિ સર્જાઈ છે.

દિલ્હીમાં પણ યમુના નદી જોખમી સપાટીએ વહે રહી છે. તાજેતરમાં નદીના જોરદાર પ્રવાહમાં ચાર બાળકો તણાઈ જવાની દુઃખદ ઘટના સામે આવી હતી.

હરિયાણાના નવ જિલ્લાઓમાં વરસાદની આગાહી કરવામાં આવી છે. જ્યારે પંજાબના અનેક જિલ્લાઓમાં પણ વરસાદની સંભાવના વ્યક્ત કરવામાં આવી છે. ચંડીગઢમાં દિવસભર વાદળછાયું વાતાવરણ સાથે છૂટાછવાયા વરસાદની શક્યતા છે.

રાજસ્થાનમાં હજુ ભારે વરસાદની શક્યતા ઓછી

રાજસ્થાનમાં હાલ ચોમાસું નબળું પડ્યું છે અને આગામી એક અઠવાડિયા સુધી ભારે વરસાદની શક્યતા ઓછી છે. બિકાનેર અને જોધપુર વિભાગમાં હવામાન મુખ્યત્વે શુષ્ક રહેશે તેમજ 30થી 40 કિમી પ્રતિ કલાકની ઝડપે ધૂળભરી આંધી ફૂંકાઈ શકે છે.

જોકે 14 અને 15 જુલાઈ દરમિયાન શ્રીગંગાનગર, હનુમાનગઢ, ચુરુ અને બિકાનેરના કેટલાક વિસ્તારોમાં હળવો વરસાદ પડી શકે છે.

છત્તીસગઢમાં આગામી પાંચ દિવસ સતત વરસાદ

છત્તીસગઢમાં ચોમાસું સંપૂર્ણ સક્રિય છે. હવામાન વિભાગના જણાવ્યા અનુસાર રાયપુર સહિત રાજ્યના ઉત્તર ભાગના અનેક જિલ્લાઓમાં આગામી પાંચ દિવસ સુધી સતત વરસાદની શક્યતા છે.

છેલ્લા 24 કલાકમાં સુરગુજા અને બસ્તર વિભાગના કેટલાક વિસ્તારોમાં હળવો વરસાદ નોંધાયો છે. જોકે રાજ્યમાં અત્યાર સુધી 252.4 મીમી વરસાદ નોંધાયો છે, જે સામાન્ય 320.6 મીમીની સરખામણીએ આશરે 21 ટકા ઓછો છે.

હવામાન નિષ્ણાતોના જણાવ્યા અનુસાર, 20 જુલાઈ પછી ચોમાસું ફરી સક્રિય બનતાં ઉત્તર-પશ્ચિમ ભારત, ગુજરાત અને રાજસ્થાન સહિતના વિસ્તારોમાં વરસાદની ગતિવિધિમાં વધારો થવાની સંભાવના છે.

આ પણ વાંચો: ગુજરાતમાં વરસાદનો વિરામ યથાવત, દક્ષિણ ગુજરાત-સૌરાષ્ટ્રમાં છૂટાછવાયા વરસાદની શક્યતા; ખેડૂતોની ચિંતા વધી

આ પણ વાંચો: ઉત્તરાખંડ-હિમાચલમાં ભૂસ્ખલન, 120 રસ્તા બંધ; કાશ્મીરમાં વાદળ ફાટતાં પૂર જેવી સ્થિતિ

આ પણ વાંચો: દિલ્હી સહિત 20 રાજ્યોમાં ભારે વરસાદ અને આંધીનું એલર્ટ, 80 કિમી પ્રતિ કલાકે પવન ફૂંકાવાની શક્યતા