જમ્મુ -કાશ્મીરના પૂંછમાં સેનાએ ઘૂસણખોરીના પ્રયાસને નિષ્ફળ બનાવતા બે આતંકીઓને ઠાર કર્યા છે. માર્યા ગયેલા આતંકીઓના મૃતદેહ મળી આવ્યા છે. આર્મીના પ્રવક્તા લેફ્ટનન્ટ કર્નલ દેવેન્દ્ર આનંદે આ ઘટનાની પુષ્ટિ કરી છે.
તેમણે કહ્યું કે નિયંત્રણ રેખા પારથી આતંકવાદીઓએ સોમવારે વહેલી સવારે પૂંછ સેક્ટરમાં ઘૂસણખોરી કરવાનો પ્રયાસ કર્યો હતો. એલર્ટ સૈનિકો દ્વારા પડકારવામાં આવતાં આતંકવાદીઓ સાથે ફાયરિંગ કરી હતી અને વળતો જવાબ સૈનિકોએ આપ્યો હતો . જેમાં પહેલા એક આતંકવાદી માર્યો ગયો હતો. થોડા સમય બાદ બીજો આતંકવાદી પણ માર્યો ગયો. બંનેના મૃતદેહ મળી આવ્યા છે. તેની પાસેથી એકે -47 રાઇફલ મળી આવી છે. આ વિસ્તારમાં હજુ પણ સર્ચ ઓપરેશન ચાલુ છે.
ઉલ્લેખનીય છે કે અફઘાનિસ્તાનમાં તાલિબાનના કબજા બાદ જમ્મુ -કાશ્મીરમાં પણ આતંકવાદનો ખતરો વધી ગયો છે.માહિતી પ્રાપ્ત થઇ છે કે આતંકવાદી સંગઠન જૈશ-એ-મોહમ્મદના 38 આતંકીઓએ તાલિબાન આતંકવાદીઓ પાસેથી તાલીમ લીધી છે. અત્યાધુનિક હથિયારોનો ઉપયોગ કરવાની સાથે, માહિતી ટેકનોલોજીમાં તાલીમ પામેલા આ ભયાનક આતંકવાદીઓ એક અઠવાડિયા પહેલા પાકિસ્તાન અધિકૃત કાશ્મીર (PoK) ના હજીરા સ્થિત જૈશના તાલીમ શિબિરમાં પહોંચ્યા હતા. પૂંછના ચક્કન દાં બા સામે હજીરા કેમ્પમાં હિલચાલને તીવ્ર બનાવવાના ઇનપુટ્સ પણ મળ્યા હતા
પૂંછનો વિસ્તાર સરહદ પારના આતંકવાદ માટે અત્યંત સંવેદનશીલ છે. સૂત્રોના જણાવ્યા અનુસાર, અહીં કોટલી, હજીરા, બાગ અને કેટલાક અન્ય વિસ્તારોમાં આતંકવાદીઓના ટ્રેનિંગ કેમ્પ ચાલી રહ્યા છે. આ જિલ્લામાંથી એલઓસી પર 20 થી વધુ લોન્ચિંગ પેડ પણ સક્રિય હોવાનું જાણવા મળે છે. દરેક લોન્ચ પેડ પર 10-12 આતંકીઓને ઘૂસણખોરી માટે તૈયાર રાખવામાં આવ્યા છે.
