સિતારના તાર અને કૌભાંડના તારમાં એક સામ્યતા છે. સિતારના તાર યોગ્ય રીતે પકડાય તો સૂર નીકળે છે અને આ જ રીતે કૌભાંડના તાર યોગ્ય રીતે પકડાય તો તેમાથી અનેક કૌભાંડો નીકળે છે. ગુજરાતમાં આવા જ કૌભાંડના એક તારથી અનેક રહસ્યોદઘાટન થવા માંડ્યા છે.
થોડા સમય પહેલા ડિરેક્ટોરેટ ઓફ રેવન્યુ ઇન્ટેલિજન્સ (DRI)એ અને ગુજરાત એટીએસની ટીમે અમદાવાદમાં પાલડીના આવિષ્કાર એપાર્ટમેન્ટમાં દરોડા પાડ્યા હતા. આ સમયે ફ્લેટ ભરીને સોનું અને રોકડ મળતા ATS અને DRI બંને ચોંકી ઉઠ્યા હતા. આ ફ્લેટ મહેન્દ્ર શાહનો હોવાનું તેમની જાણમાં આવ્યું હતું. મહેન્દ્ર શાહ અને પુત્ર મેઘ શાહનું કામ જ લોકોના બેનામી રૂપિયા ફેરવવાનું અને તેને વ્હાઇટ કરી આપવાનું હોવાનું તેમની જાણમાં આવ્યું હતું. હજી પિતાપુત્ર તો તેમની પક્કડમાં આવ્યા નથી, પરંતુ મહેન્દ્ર શાહને ત્યાં પડેલા દરોડાથી તે ખબર પડી કે રાજ્યમાં મહેન્દ્ર શાહ જેવા એક નથી અનેક હવાલા ઓપરેટરો છે જે ધનવાનોના અને રાજકારણીઓના બ્લેકના કરોડો રૂપિયા વ્હાઇટ કરી આપે છે.
આના પગલે હવે ઇન્કમ ટેક્સ પણ હરકતમાં આવી ગયું છે અને તેને ખબર પડે છે કે મેઘ શાહ જેવા ગુજરાતમાં એક નથી અનેક છે અને ફક્ત ગુજરાત જ નહીં દેશભરમાં આવા હવાલા ઓપરેટરોની ભરમાર પડી છે. આટલું ઓછું હોય તેમ તાજેતરમાં મેઘ શાહની પુત્રી સત્તાવાળાઓના હાથમાં આવી ગઈ છે. તેથી આગામી દિવસોમાં મોટા રહસ્યોદઘાટન થાય તો આશ્ચર્ય નહીં થાય.
આના તારના આધારે બીજા હવાલા ઓપરેટર સંજય શાહને ત્યાં પણ આવકવેરા વિભાગે દરોડા પાડ્યા હતા અને 20 કરોડથી પણ વધુની રોકડ જપ્ત કરી હતી. અહી આવકવેરા વિભાગને સંજય શાહની મોડસ ઓપરેન્ડીની પણ ખબર પડી હતી. આના પગલે તેમને ખબર પડી કે સંજય શાહ આણી મંડળી કરોડો રૂપિયા શેરબજારમાં ફેરવે છે, તેમા ગેરકાયદેસર રીતે સટ્ટો રમે છે અને શેરબજારનો જ ઉપયોગ બ્લેકના વ્હાઇટ કરવા માટે કરે છે. આમ દરેક હવાલા ઓપરેટર બ્લેકના વ્હાઇટની આગવી પદ્ધતિ અપનાવતો હોવાનું આવકવેરા વિભાગને જાણવા મળ્યું છે.
આ તો થઈ ફક્ત બે જ ઓપરેટરોની વાત થઈ. આખા રાજ્યના મોટા બિલ્ડરો, ઝવેરીઓ, રાજકારણીઓ, ડોક્ટરો, રાજકારણીઓ, કારોબારીઓ અને વ્યવસાયીઓને આ જ હવાલા ઓપરેટરો બ્લેકના વ્હાઇટ કરી આપે છે. આમ રાજ્યમાં બ્લેકના વ્હાઇટનો ધંધો પૂરબહારમાં ખીલ્યો છે. તેઓ કમિશન લઈને આ બધાના રૂપિયા બ્લેકના વ્હાઇટ કરે છે અને બજારમાં વ્યાજે પણ ફેરવતા હોવાનું જાણમાં આવ્યું છે.
આ ઉપરાંત બ્લેકના વ્હાઇટ કરવા માટે જનધન ખાતાનો ઉપયોગ થતું હોવાનું પણ પ્રકાશમાં આવ્યું છે. તેમા ગરીબો અને જરૂરિયાતમંદોના બેન્ક ખાતા મહિને 15 હજાર રૂપિયાના ભાડાંથી લેવામાં આવતા હતા અને આ ખાતાઓમાં કરોડો રૂપિયાની એન્ટ્રી પડતી હતી. હવે જનધનખાતામાં કરોડો રૂપિયાની એન્ટ્રી પડે એટલે કે સ્વાભાવિક રીતે આ ખાતુ આવકવેરા ખાતાની નજરમાં આવે જ. આના પગલે ઇન્કમ ટેક્સે કરોડો રૂપિયાના વ્યવહારો થતાં હોય તેવા જનધન ખાતાની ચકાસણી કરી હતી અને છેવટે આવા ત્રણ લાખ, હા ત્રણ લાખ ખાતા બંધ કરવામાં આવ્યા હતા.
કોઈને કલ્પના પણ આવે કે બ્લેકને વ્હાઇટ કરવા માટે આ પ્રકારે જનધન ખાતાનો ખાતાનો ઉપયોગ થાય, આ બતાવે છે કે હવાલા પાડતા કૌભાંડીઓ કલ્પનામાં પણ ન હોય તેવી રીતે કામ કરતા હોય છે, તંત્રની આંખ ઉઘડે તે પહેલા તો કરોડો રૂપિયાની હેરાફેરી તેમણે કરી લીધી હોય છે. આમ ગુજરાતમાં હવે બ્લેકના વ્હાઇટ કરવા તે એક ધીકતો ધંધો છે.
ઇન્કમ ટેક્સ સમજી ગયું છે કે ગુજરાતમાં જ હવાલા ઓપરેટરો પકડાયા છે તે તો હજી આ કિસ્સામાં પાશેરાની પહેલી જ પૂણી છે. આવું ફક્ત ગુજરાતમાં જ નહીં પણ દેશભરમાં થાય છે અને આ રીતે રૂપિયા હવાલા દ્વારા વિદેશ પણ મોકલાય છે અને પછી તે રાઉન્ડ ટ્રિપિંગ દ્વારા મોરેશિયસ રૂટે ભારતમાં પરત પણ આવે છે. સત્તાવાળાઓની નાક નીચે આ બધુ થાય છે, પરંતુ પૂરતી ચકાસણીના અભાવે સત્તાવાળાઓ કંઈપણ સમજે તે પહેલા આખો બધો ખેલ થઈ ચૂક્યો હોય છે.
રિઝર્વ બેન્કથી લઈને ઇન્કમ ટેક્સ, એન્ફોર્સમેન્ટ ડિરેક્ટોરેટ, ડિરેક્ટોરેટ ઓફ રેવન્યુ ઇન્ટેલિજન્સ જેવી બધી જ નિયમનકારી સંસ્થાઓ આ પાછળ લાગેલી હોવા છતાં પણ કૌભાંડીઓએ એવી જાળ ગૂંથી હોય છે કે તેઓ પોતે કશાની જાળમાં આવતા નથી. આ તો મેઘશાહ અને સંજય શાહ જેવાનો પત્તો મળી ગયો, પણ શું આખા દેશમાં આ જ બે હવાલા ઓપરેટર છે જરા પણ નહીં.
ઇન્કમ ટેક્સ વિભાગ પણ માને છે કે આવા હવાલા ઓપરેટર કે એન્ટ્રી ઓપરેટર એક કે બે નહીં પણ ઘણી મોટી સંખ્યામાં છે. દેશના દરેક શહેરોમાં આ પ્રકારના એન્ટ્રી ઓપરેટર કાર્યરત છે. બસ હજી સુધી ઇન્કમ ટેક્સ કે ઇડી ત્યાં સુધી પહોંચ્યું નથી.
આના પગલે હવે ઇન્કમ ટેક્સ દેશભરના એન્ટ્રી ઓપરેટરો અને ડેટા ઓપરેટરો કઈ રીતે આખુ કૌભાંડ ચલાવે તેની કવાયત હાથ ધરી છે. એક વખત આ કવાયત પૂરી થાય તેના પછી આખા દેશના એન્ટ્રી ઓપરેટરો અને તેના આધારે બ્લેકમાં કમાણી કરનારાઓ પર આવકવેરા ખાતાનો સકંજો કસાશે તે નિશ્ચિત છે.
આ પણ વાંચો: ઇરાન-ઇઝરાયેલ યુદ્ધ, માનવતાનો ખાત્મો
આ પણ વાંચો: વિજય રૂપાણી સૌરાષ્ટ્રના રાજકારણની મહામૂડી
આ પણ વાંચો: એક યુદ્ધ જ રોકશે બીજું યુદ્ધ
