Sports News: ભારત કોમનવેલ્થ ગેમ્સ 2030નું આયોજન કરવા માટે દાવેદાર બન્યું છે. આ માટે ભારત નાઇજીરીયા સામે સ્પર્ધા કરશે. ભારત અને નાઇજીરીયાએ નિર્ધારિત સમયમર્યાદા 31 ઑગસ્ટ 2025 સુધીમાં પોતાની ઔપચારિક બોલીઓ રજૂ કરી દીધી છે.

અમદાવાદને હોસ્ટ શહેર તરીકે પસંદ

ભારતીય ઓલિમ્પિક એસોસિએશન (IOA) એ અમદાવાદને કોમનવેલ્થ ગેમ્સ માટે સંભાવિત હોસ્ટ શહેર તરીકે પસંદ કર્યું છે. અમદાવાદમાં આંતરરાષ્ટ્રીય સ્તરના ખેલકૂદ મેદાનો અને સુવિધાઓ ઉપલબ્ધ છે. ખાસ કરીને, નરેન્દ્ર મોદી સ્ટેડિયમ જેવી વિશ્વ સ્તરીય ઈન્ફ્રાસ્ટ્રક્ચર ભારતના પક્ષમાં મજબૂત દાવેદારી ઉભી કરે છે.

CS દ્વારા મૂલ્યાંકન પ્રક્રિયા

કોમનવેલ્થ સ્પોર્ટ્સ (CS) અનુસાર, ભારત અને નાઇજીરીયાની બોલીઓનું મૂલ્યાંકન CS એક્ઝિક્યુટિવ બોર્ડ દ્વારા નિયુક્ત કમિશન કરશે. સપ્ટેમ્બર 2025ના અંતમાં લંડનમાં બંને દેશોને પોતાની યોજનાઓ અને પ્રસ્તુતિઓ રજૂ કરવાની તક મળશે. ત્યારબાદ અંતિમ નિર્ણય લેવામાં આવશે કે કયો દેશ 2030ના કોમનવેલ્થ ગેમ્સનું આયોજન કરશે.

મૂલ્યાંકન પેનલ અને અધ્યક્ષ

આ સમગ્ર પ્રક્રિયાની દેખરેખ માટે મૂલ્યાંકન પેનલ રચવામાં આવી છે, જેના અધ્યક્ષ સેન્ડ્રા ઓસ્બોર્ન છે. તેમની આગેવાની હેઠળ પેનલ બંને દેશોની સુવિધાઓ, બજેટ, ખેલાડીઓ માટેની સગવડો, પ્રેક્ષકોની વ્યવસ્થા અને લાંબા ગાળાના ખેલકૂદ વિકાસ જેવા મુદ્દાઓનું મૂલ્યાંકન કરશે.

કેનેડાનો પીછેહઠવાનો નિર્ણય

ગેમ્સ માટે કેનેડાએ પણ રસ દાખવ્યો હતો, પરંતુ બજેટની મર્યાદાઓને કારણે તેણે પોતાની દાવેદારી પાછી ખેંચી લીધી છે. આ કારણે હવે સ્પર્ધા માત્ર ભારત અને નાઇજીરીયા વચ્ચે મર્યાદિત રહી છે.

CS પ્રમુખની પ્રશંસા

કોમનવેલ્થ સ્પોર્ટ્સના પ્રમુખ ડોનાલ્ડ રકરે ભારત અને નાઇજીરીયાની રજૂઆતની પ્રશંસા કરી છે. તેમણે જણાવ્યું કે બંને દેશોએ રમતો માટેની દૃષ્ટિ અને આયોજન પ્રભાવશાળી છે, જે કોમનવેલ્થ ગેમ્સના ભાવિ વિકાસ માટે લાભદાયી સાબિત થઈ શકે છે.

2030 કોમનવેલ્થ ગેમ્સનું આયોજન ભારત માટે એક ઐતિહાસિક ક્ષણ સાબિત થઈ શકે છે. ભારતે અગાઉ 2010માં દિલ્હી ખાતે આ રમતોનું સફળ આયોજન કર્યું હતું. જો અમદાવાદને આ રમતોનું યજમાનત્વ મળે તો તે માત્ર ખેલકૂદ ક્ષેત્રમાં જ નહીં, પરંતુ ભારતના વૈશ્વિક પ્રતિષ્ઠામાં પણ મોટો વધારો કરશે. બીજી તરફ, નાઇજીરીયા માટે પણ આ પહેલીવાર હશે કે તે આ આંતરરાષ્ટ્રીય રમતોનું આયોજન કરશે.

આ પણ વાંચો: શું ટીમ ઈન્ડિયા આજે ફરી કરશે બાઉન્સ બેક? બુમરાહ પર મોટી જવાબદારી છે, સિરાજ-કૃષ્ણને પણ સાથે રમવું પડશે

આ પણ વાંચો:  ડ્રેસિંગ રૂમમાં ઋષભ પંત સામે કેએલ રાહુલે જોડ્યા હાથ,BCCIનો આ વીડિયો ખૂબ વાયરલ થયો

આ પણ વાંચો: એન્ડરસન-તેંડુલકર ટ્રોફી વિવાદ પર સચિન તેંડુલકરે મૌન તોડ્યું: ‘મેં પટૌડી પરિવારને કહ્યું હતું કે હું મારાથી બનતું બધું કરીશ…’