શુક્રવારે ભારતની અધ્યક્ષતામાં સંયુક્ત રાષ્ટ્ર સુરક્ષા પરિષદ ની બેઠક યોજાઈ હતી. આ દરમિયાન, ભારતે અફઘાનિસ્તાનની કથળતી પરિસ્થિતિ પર પોતાના મંતવ્યો શેર કર્યા અને યુદ્ધગ્રસ્ત દેશમાં તાલિબાનની વધતી હિંસાને જોતા તાત્કાલિક અને વ્યાપક યુદ્ધવિરામનો આગ્રહ કર્યો. નોંધનીય છે કે ભારત ઓગસ્ટ મહિના માટે યુએનએસસી ની અધ્યક્ષતા કરી રહ્યું છે.
સંયુક્ત રાષ્ટ્રમાં ભારતના રાજદૂત ટી.એસ. તિરુમૂર્તિએ કહ્યું કે, અફઘાનિસ્તાનના પાડોશી તરીકે અહીંની વર્તમાન પરિસ્થિતિ અમારા માટે ગંભીર ચિંતાનો વિષય છે. હિંસાનો અંત આવવાના કોઈ સંકેત દેખાતા નથી. યુએનનો અહેવાલ સ્પષ્ટ કરે છે કે નાગરિક મૃત્યુ અને લક્ષિત હત્યાઓ રેકોર્ડ સ્તરે પહોંચી ગઈ છે. તેમણે કહ્યું કે ધાર્મિક અને વંશીય લઘુમતીઓ, છોકરીઓ, અફઘાન સુરક્ષા દળો, ઉલેમા, જવાબદાર હોદ્દા પરની મહિલાઓ, પત્રકારો, માનવાધિકાર કાર્યકરો અને યુવાનોને નિશાન બનાવવામાં આવી રહ્યા છે.
અફઘાનિસ્તાનના સંરક્ષણ મંત્રીના નિવાસસ્થાને હુમલો કરવામાં આવ્યો હતો, એક ભારતીય પત્રકારની હત્યા કરવામાં આવી હતી જ્યારે તે હેલમંડ અને હેરતમાં રિપોર્ટિંગ કરી રહ્યો હતો. સ્પિન બોલ્ડકમાં 100 થી વધુ નિર્દોષ નાગરિકોની નિર્દયતાથી હત્યા કરવામાં આવી હતી. તેમણે કહ્યું કે, અફઘાનિસ્તાનમાં કથળતી સુરક્ષા સ્થિતિ પ્રાદેશિક શાંતિ અને સ્થિરતા માટે ગંભીર ખતરો છે. તિરુમૂર્તિએ વધુમાં જણાવ્યું હતું કે, કાયદેસર અને પારદર્શક લોકશાહીની સ્થાપના માટે ભારત હંમેશા અફઘાનિસ્તાનની પડખે રહ્યું છે.
તેમણે કહ્યું કે અફઘાનિસ્તાનમાં શાંતિ સ્થાપવા માટે અહીં સ્થિત આતંકવાદીઓના સલામત આશ્રયસ્થાનોને તાત્કાલિક નાબૂદ કરવા પડશે અને તેમની સપ્લાય ચેઇન તોડવી પડશે. અફઘાનિસ્તાનના પડોશીઓ અને પ્રદેશને આતંકવાદ, અલગતાવાદ અને ઉગ્રવાદથી ખતરો નથી તેની ખાતરી કરવાની જરૂર છે. તમામ પ્રકારના આતંકવાદ માટે ઝીરો ટોલરન્સની નીતિ અપનાવવાની જરૂર છે. તે સુનિશ્ચિત કરવું પણ જરૂરી છે કે કોઈ પણ આતંકવાદી જૂથ અફઘાનિસ્તાનનો ઉપયોગ તેમની નાપાક યોજનાઓને અમલમાં લાવવા માટે સક્ષમ નથી.
તિરુમૂર્તિએ વધુમાં કહ્યું કે જે લોકો આતંકવાદીઓને સામગ્રી અને આર્થિક મદદ પૂરી પાડે છે તેમને જવાબદાર માનવા જોઇએ, આંતરરાષ્ટ્રીય સમુદાય તરીકે આપણે એ સુનિશ્ચિત કરવું જોઈએ કે અફઘાનિસ્તાન પ્રત્યેની આપણી પ્રતિબદ્ધતા જળવાઈ રહે. તેમણે કહ્યું કે, ભારત શાંતિપૂર્ણ, લોકશાહી અને સમૃદ્ધ ભવિષ્યને સુનિશ્ચિત કરવા અને અફઘાન સમાજના તમામ વર્ગોના અધિકારો અને હિતોને પ્રોત્સાહન અને રક્ષણ આપવા માટે અફઘાનિસ્તાનને તમામ શક્ય સહાય પૂરી પાડવાનું ચાલુ રાખશે.
