વર્લ્ડ કપ 2023ની અંતિમ લીગ મેચમાં ભારતે નેધરલેન્ડને 160 રનથી હરાવ્યું છે. ICC ક્રિકેટ વર્લ્ડ કપમાં ભારતનો આ સતત નવમો વિજય છે. ભારતે ટુર્નામેન્ટમાં ભાગ લેનારી તમામ ટીમોને હરાવી છે. આ જીત સાથે, ભારત 18 પોઈન્ટ સાથે પોઈન્ટ ટેબલમાં ટોચ પર છે. નેધરલેન્ડ સામે પ્રથમ બેટિંગ કરતા ભારતે શ્રેયસ અય્યર અને કેએલ રાહુલની સદીની મદદથી 50 ઓવરમાં 4 વિકેટ ગુમાવીને 410 રન બનાવ્યા હતા. જવાબમાં નેધરલેન્ડની ટીમ 13 બોલ બાકી રહેતા 47.5 ઓવરમાં તમામ વિકેટ ગુમાવીને માત્ર 250 રન જ બનાવી શકી હતી.
411 રનના લક્ષ્યનો પીછો કરવા આવેલી નેધરલેન્ડની ટીમની શરૂઆત સારી રહી ન હતી. મોહમ્મદ સિરાજે બીજી જ ઓવરમાં 4 રનના અંગત સ્કોર પર બારેસીને પેવેલિયન મોકલી દીધો હતો. કોલિન એકરમેને 32 બોલમાં 35 રન બનાવ્યા હતા. કુલદીપ યાદવે કોલિન અને મેક્સની ભાગીદારી તોડી હતી. મેક્સને રવિન્દ્ર જાડેજાએ 30ના સ્કોર પર પેવેલિયન મોકલ્યો હતો. વિરાટ કોહલીએ સ્કોટ એડવર્ડ્સને આઉટ કર્યો હતો. બુમરાહે લીડને પેવેલિયનમાં મોકલ્યો.સિરાજે બ્રાન્ડ એન્જેલબ્રેક્ટને આઉટ કર્યો. કુલદીપે ચાંચને પેવેલિયન મોકલી હતી. રોહિતે તેજાને આઉટ કરીને નેધરલેન્ડની ઇનિંગ્સનો અંત આણ્યો હતો.
નેધરલેન્ડ સામે વર્લ્ડકપ 2023ની અંતિમ લીગ મેચમાં, ભારતીય ટીમે શ્રેયસ અય્યર અને કેએલ રાહુલની સદી અને ત્રણ બેટ્સમેનોની અડધી સદીની મદદથી 50 ઓવરમાં ચાર વિકેટ ગુમાવીને 410 રન બનાવ્યા હતા. ભારત તરફથી શ્રેયસ અય્યરે સૌથી વધુ 128 રન બનાવ્યા હતા. નેધરલેન્ડ માટે બાસ ડી લીડે બે વિકેટ લીધી હતી જ્યારે રોલ્ફ વાન ડેર મર્વે અને પોલ વાન મીકેરેને એક-એક વિકેટ લીધી હતી. વેન બીક ખૂબ ખર્ચાળ સાબિત થયો. તેણે 10 ઓવરમાં 107 રન આપ્યા હતા. આ પહેલા રોહિત શર્મા અને શુભમન ગીલે ભારતને ધમાકેદાર શરૂઆત અપાવી હતી. બંને વચ્ચે પ્રથમ વિકેટ માટે 100 રનની ભાગીદારી થઈ હતી. શુભમન ગિલ 32 બોલમાં 51 રન બનાવીને આઉટ થયો હતો. કેપ્ટન રોહિત શર્માએ 61 રનની ઇનિંગ રમી હતી. વિરાટ કોહલી 56 બોલમાં 51 રન બનાવીને પેવેલિયન પરત ફર્યો હતો. ભારતની ત્રીજી વિકેટ 200ના સ્કોર પર પડી હતી. આ પછી શ્રેયસ અય્યર અને કેએલ રાહુલે 150થી વધુ રનની ભાગીદારી કરી અને ભારતના સ્કોરને 350ની પાર પહોંચાડી દીધી. શ્રેયસ અય્યરે 84 બોલમાં પોતાની સદી પૂરી કરી હતી.
