ઇન્ડિયન પ્રીમિયર લીગના સમાપન સાથે ખાટીમીઠી યાદો તાજી થઇ ગઈ છે. IPLની 14મી સીઝનમાં ધોનીની આગેવાની હેઠળની ચેન્નાઈ સુપર કિંગ્સે વિજેતાનો ખિતાબ મેળવી લીધો છે. BCCI હવે 15મી સીઝનની તૈયારીઓમાં લાગી ગયું છે. આગામી સીઝનમાં આઠના બદલે 10 ટીમ ભાગ લેશે. આ વર્ષે નવી બે ટીમની ખરીદી માટે અરજીઓ પણ મંગાવવામાં આવી રહી છે. આ અંગે BCCI દ્વારા બે વાર તારીખ બદલવામાં આવી છે.
માનવામાં આવી રહ્યું છે કે, આ વર્ષે નવી ટીમ માટે દીપિકા અને રણવીરસિંહ બિડિંગ કરવા માટે જઈ રહ્યા છે. શાહરૂખ ખાન અને પ્રીતિ ઝીંટા સિવાય તેમની બે ટીમ હશે. કહેવામાં આવી રહ્યું છે કે, ટીમના બિડિંગની શરૂઆત 25 ઓક્ટોબરના રોજ શરુ થશે. બે સૌથા બિડર્સ BCCIને મળશે તેવી શક્યતા રહેલી છે.
આ ઉપરાંત ઇંગ્લેન્ડની પ્રતિષ્ઠિત ફૂટબોલ ક્લબ માન્ચેસ્ટર યુનાઇટેડ પણ ટીમ ખરીદવાના દાવેદારોમાં સામેલ છે. સૂત્રોના જણાવ્યા અનુસાર બંનેએ ભૂતકાળમાં બીસીસીઆઈ કાર્યાલયમાંથી ટેન્ડર ફોર્મ ખરીદ્યું હતું અને નિષ્ણાતો સાથે વાતચીત કર્યા પછી, તેઓએ ખૂબ જ ગંભીરતાથી રસ દાખવ્યો છે. આનો અર્થ એ છે કે તેઓએ બિડિંગ માટે ટેન્ડર ફોર્મ સબમિટ કર્યું છે. હવે જોવાનું એ રહે છે કે નસીબ તેમની સાથે રહે છે કે નહીં કારણ કે તેઓ દિગ્ગજો સાથે સ્પર્ધા કરી રહ્યા છે.
પહેલા એવું માનવામાં આવતું હતું કે, માત્ર બે કંપનીઓ જ બે ટીમો ખરીદવાની સ્પર્ધામાં છે, પરંતુ હવે સ્પર્ધા અઘરી બનવાની છે કારણ કે અદાણી ગ્રુપ, આરપી-સંજીવ ગોએન્કા ગ્રુપ અને ટોરેન્ટ ફાર્મા જેવી મોટી કંપનીઓએ પણ ટીમ ખરીદવાની તૈયારી કરી છે. દિગ્ગજ ભારતીય ઉદ્યોગપતિ ઉપરાંત ઇંગ્લિશ પ્રીમિયર લીગના માલિક ગ્લેઝર પરિવારે પણ ટીમ ખરીદવામાં રસ દાખવ્યો છે. તે જ સમયે, એવું માનવામાં આવે છે કે ભારતની એક કોર્પોરેટ જાયન્ટ માન્ચેસ્ટર યુનાઇટેડને ટેકો આપી રહી છે. કોવિડ -19 ને કારણે ગેટ મનીમાં ભારે ઘટાડો થયા બાદ માન્ચેસ્ટર યુનાઇટેડનું દેવું ગયા વર્ષે વધીને $ 455 મિલિયન થયું છે.
સૂત્રો અનુસાર BCCI વિદેશી કંપનીને અધિકારો આપવાના મૂડમાં નથી અને બોર્ડ ભારતીય ખરીદદારને પ્રાધાન્ય આપશે, પરંતુ અહીં “શક્તિશાળી” કોણ છે તે પણ મોટી ભૂમિકા ભજવશે. ટોરેન્ટ ફાર્મા ઉપરાંત, સિંગાપોર સ્થિત પ્રાઇવેટ ઇક્વિટી કંપની, તેમજ યુએસ સ્થિત વેન્ચર કેપિટલ કંપનીએ ટીમ ખરીદવા માટે દસ્તાવેજો ખરીદનારાઓમાં રસ દાખવ્યો છે. આ સિવાય જિંદાલ સ્ટીલના નવીન જિંદાલ અને ઉદ્યોગપતિ રોની સ્ક્રુવાલાએ પણ રસ દાખવ્યો છે.
તમને જણાવી દઈએ કે, બીસીસીઆઈ પાસેથી ટીમ ખરીદવા માટે, દસ્તાવેજ દસ લાખ રૂપિયાના ખર્ચે ખરીદવાનો હતો અને આ રકમ પરત ન કરી શકાય તેવી હતી. નવી બે ટીમોના માલિકોના નામની જાહેરાત માટે માત્ર બે દિવસ બાકી છે. ભારત અને પાકિસ્તાન વચ્ચે 24 ઓક્ટોબરે રમાનારી મહાન મેચના બીજા દિવસે 25 ઓક્ટોબરના દુબઈમાં થશે. આ બધા લોકો આશા રાખીને બેઠા છે અને તેમની ટીમ આવી જાય તે માટે પ્રાર્થના કરશે. આ સ્થિતિમાં તેમના હૃદયના ધબકારા પણ એક અલગ કારણસર વધી ગયા હશે. જો કે, કોનું નસીબ ખુલે છે, કોણ નિરાશ થાય છે, તેના માટે તમે સોમવાર રાત સુધી રાહ જુઓ. નવી ટીમો અને માલિકો બંનેના નામ તમારી સામે હશે.
