World News : અમેરિકાના રાષ્ટ્રપતિ Donald Trump સત્તામાં આવ્યા બાદ તેના પરંપરાગત સાથી દેશો સાથેના સંબંધોમાં તણાવ જોવા મળી રહ્યો છે. ખાસ કરીને યુરોપમાં, નાટો જેવા ગઠબંધનો વચ્ચે અવિશ્વાસ અને અસંતોષ વધતો જાય છે.
જર્મનીમાં અમેરિકન સૈનિકો સામે વિરોધ
યુરોપના સૌથી મોટા સાથી દેશોમાંના એક Germany માં અમેરિકાની હાજરી સામે ખુલ્લો વિરોધ થઈ રહ્યો છે. જર્મનીની જમણેરી રાજકીય પાર્ટી Alternative for Germany (AfD) એ દેશમાં તૈનાત આશરે 40,000 અમેરિકન સૈનિકોને હટાવવાની માંગ કરી છે.
પાર્ટીના નેતા Tino Chrupalla એ સ્પષ્ટ કહ્યું છે કે જર્મનીએ પોતાની વિદેશ નીતિમાં Washington, D.C. પરથી નિર્ભરતા ઘટાડવી જોઈએ. તેમણે દેશમાંથી અમેરિકન સૈનિકો સાથે સાથે વિદેશી પરમાણુ શસ્ત્રો અને લશ્કરી ઠેકાણાઓ દૂર કરવાની પણ માંગ કરી છે.
નાટો અને અમેરિકાની ભૂમિકા પર પ્રશ્નો
NATO (નાટો)માં અમેરિકા લાંબા સમયથી મુખ્ય ભૂમિકા ભજવે છે, પરંતુ યુરોપિયન દેશો હવે માને છે કે ગઠબંધનમાં અમેરિકાના હિતોને વધારે પ્રાથમિકતા આપવામાં આવે છે. કેટલાક દેશોનો આરોપ છે કે અમેરિકા તેમને પોતાના વિદેશી યુદ્ધોમાં ખેંચે છે.
ઈરાન સાથેના તણાવ અને યુદ્ધ જેવી પરિસ્થિતિઓએ આ મતભેદોને વધુ ઊંડા કર્યા છે. જર્મન ચાન્સેલર Friedrich Merz એ પણ અમેરિકા પર આક્ષેપ કર્યો છે કે તેણે સંઘર્ષ ઘટાડવા બદલે તેને વધાર્યો છે.
જર્મનીમાં અમેરિકન સૈનિકોની હાજરી
અહેવાલો મુજબ, જર્મનીમાં 40,000થી વધુ અમેરિકન સૈનિકો અને 12થી વધુ લશ્કરી ઠેકાણાઓ છે. તેમાં સૌથી મહત્વપૂર્ણ Ramstein Air Base છે, જે યુરોપમાં અમેરિકાનું મુખ્ય સૈનિક મથક માનવામાં આવે છે.
આ બેઝને કારણે જર્મનીમાં સુરક્ષા અંગે ચિંતા વધી રહી છે, કારણ કે સંભવિત યુદ્ધની સ્થિતિમાં તે નિશાન બની શકે છે.
ટ્રમ્પની નીતિઓથી વધતો વૈશ્વિક તણાવ
2025માં સત્તા સંભાળ્યા બાદ ટ્રમ્પે નાટો દેશો સાથે કઠોર વલણ અપનાવ્યું છે. તેમણે યુરોપિયન દેશોને સંરક્ષણ ખર્ચ GDPના 5% સુધી વધારવાની માંગ કરી છે અને સ્પષ્ટ કહ્યું છે કે જો તેઓ આવું નહીં કરે તો તેમને પોતાની સુરક્ષા જાતે સંભાળવી પડશે.
ટ્રમ્પ(Trumps)ના નિવેદનો સાથી દેશોને અસ્વસ્થ બનાવી રહ્યા છે
તે સિવાય, ટ્રમ્પ (Trumps)ના કેટલાક નિવેદનો અને વર્તન—જેમ કે યુરોપિયન નેતાઓ પર ટીકા અને વિવાદાસ્પદ ટિપ્પણીઓ—સાથી દેશોને અસ્વસ્થ બનાવી રહ્યા છે.
શું અમેરિકા એકલું પડી રહ્યું છે?
વિશ્લેષકો માને છે કે ટ્રમ્પ(Trumps)ની નીતિઓ દાયકાઓથી ચાલતી અમેરિકાની વિદેશ નીતિને બદલતી દેખાઈ રહી છે. જો યુરોપિયન દેશો અમેરિકા થી દૂર થવાનું ચાલુ રાખશે, તો વૈશ્વિક રાજનીતિમાં મોટા ફેરફારો આવી શકે છે.
