World News : અમેરિકાના રાષ્ટ્રપતિ Donald Trump એ ઈઝરાયલ અને લેબનોન વચ્ચે 10 દિવસના યુદ્ધવિરામ(Ceasefire)ની જાહેરાત કરી છે. તેમણે સોશિયલ પ્લેટફોર્મ ‘ટ્રુથ સોશિયલ’ પર પોસ્ટ કરીને જણાવ્યું કે લેબનોનના રાષ્ટ્રપતિ Joseph Aoun અને ઈઝરાયલના વડાપ્રધાન Benjamin Netanyahu સાથે ચર્ચા બાદ આ નિર્ણય લેવાયો છે. યુદ્ધવિરામ(Ceasefire) ભારતીય સમય મુજબ ગુરુવારે સવારે 2:30 વાગ્યાથી અમલમાં આવશે.
ટ્રમ્પે જણાવ્યું કે બંને દેશો વચ્ચે 34 વર્ષમાં પહેલી વાર વોશિંગ્ટનમાં સીધી વાતચીત થઈ હતી, જેમાં અમેરિકાના વિદેશમંત્રી Marco Rubio પણ હાજર રહ્યા હતા. તેમણે ઉપપ્રમુખ J. D. Vance સહિતના અધિકારીઓને કાયમી શાંતિ માટે પ્રયત્ન કરવા સૂચના આપી છે.
લેબનોનના રાષ્ટ્રપતિએ યુદ્ધવિરામ(Ceasefire) માટે ટ્રમ્પનો આભાર વ્યક્ત કર્યો અને દેશમાં સ્થિરતા માટે તેને જરૂરી ગણાવ્યો.
બીજી તરફ, હોર્મુઝ જળસંધિમાં તણાવ યથાવત છે. અમેરિકી સેન્ટ્રલ કમાન્ડ મુજબ, નાકાબંધી બાદ 72 કલાકમાં 14 જહાજોને પાછા ફરવા મજબૂર કરવામાં આવ્યા છે. અમેરિકાએ સ્પષ્ટ કર્યું છે કે કાર્યવાહી ફક્ત ઈરાન સાથે સંકળાયેલા જહાજો પર જ લાગુ પડે છે.
ફ્રાન્સના રાષ્ટ્રપતિ Emmanuel Macron એ ભારતના પ્રધાનમંત્રી Narendra Modi સાથે વાતચીત કરીને હોર્મુઝમાં જહાજોની સુરક્ષા મુદ્દે ચિંતા વ્યક્ત કરી. બંને દેશોએ વિસ્તારમાં શાંતિ જાળવવા સહકાર આપવાનો નિર્ણય લીધો.
ઈઝરાયલે ઈરાનને ચેતવણી આપી છે કે જો તે અમેરિકાની સાથેની વાટાઘાટોમાં ડીલ નહીં કરે તો વધુ કડક હુમલાઓનો સામનો કરવો પડશે. રક્ષણ પ્રધાન Israel Katz એ કહ્યું કે ઈરાન પાસે “સમજૂતી અથવા વિનાશ” જેવા બે જ વિકલ્પ છે.
લેબનોનની રાજકીય સંસ્થા હિઝબુલ્લાહના નેતા Hussein Hajj Hassan એ ઈઝરાયલ સાથે સીધી વાતચીતને ગંભીર ભૂલ ગણાવી અને તેને તરત બંધ કરવાની માંગ કરી.આ દરમિયાન, ટ્રમ્પે પાકિસ્તાનના નેતૃત્વની પ્રશંસા કરી અને કહ્યું કે ઈરાન મુદ્દે તેમની ભૂમિકા મહત્વપૂર્ણ રહી છે.
જમીન પર સ્થિતિ હજુ પણ ગંભીર છે. ઈઝરાયલી હવાઈ હુમલામાં દક્ષિણ લેબનોનના કાસ્મિયેહ વિસ્તારમાં મહત્વપૂર્ણ પુલ તબાહ થયો છે, જેના કારણે ટાયર અને સિડોન વચ્ચેનો સંપર્ક તૂટી ગયો છે.
ઈરાન તરફથી પણ કડક પ્રતિક્રિયા આવી છે. ઈરાની સેનાના ચીફ Amir Hatami એ જણાવ્યું કે દેશની રક્ષા માટે તેઓ બલિદાન આપવા તૈયાર છે અને કોઈપણ હુમલાનો મક્કમ જવાબ આપવામાં આવશે.
આ તમામ ઘટનાઓ વચ્ચે, યુદ્ધવિરામ ભલે શરૂ થયો હોય, પરંતુ પશ્ચિમ એશિયામાં તણાવ હજી યથાવત છે.
