New Delhi News : સુપ્રીમ કોર્ટે (Supreme Court) એક મહત્વપૂર્ણ ચુકાદામાં સ્પષ્ટ કર્યું છે કે ઓછી શૈક્ષણિક લાયકાત ધરાવતા ઉમેદવારો માટે ખાસ અનામત રાખવામાં આવેલી સરકારી અથવા જાહેર ક્ષેત્રની નોકરી માટે ઉચ્ચ લાયકાત ધરાવતી વ્યક્તિ પોતાની વાસ્તવિક લાયકાત છુપાવીને અરજી કરી શકતી નથી.
ન્યાયમૂર્તિ અહસાનુદ્દીન અમાનુલ્લાહ અને ન્યાયમૂર્તિ આર. મહાદેવનની બેન્ચે જણાવ્યું કે આવી સ્થિતિમાં ઉચ્ચ લાયકાત ધરાવતા ઉમેદવારને પસંદગી આપવાથી ખરેખર તે પદ માટે યોગ્ય અને પાત્ર ઉમેદવારને તકથી વંચિત રાખવામાં આવે છે.
કોર્ટ સમક્ષ આવેલ કેસમાં એક ઉમેદવારે સિન્ડિકેટ બેંકમાં બેંક એટેન્ડન્ટ તરીકે નોકરી મેળવવા માટે પોતાની સ્નાતકની લાયકાત છુપાવી હતી. સંબંધિત પોસ્ટ માત્ર 10મા ધોરણ સુધીની શૈક્ષણિક લાયકાત ધરાવતા ઉમેદવારો માટે અનામત રાખવામાં આવી હતી. બાદમાં આ હકીકત સામે આવતા બેંકે કર્મચારીને સેવામાંથી દૂર કર્યો હતો.
મદ્રાસ હાઈકોર્ટે કર્મચારીને ફરીથી સેવામાં લેવાનો આદેશ આપ્યો હતો, પરંતુ સુપ્રીમ કોર્ટે (Supreme Court)હાઈકોર્ટનો આ નિર્ણય રદ કર્યો. કોર્ટે જણાવ્યું કે રાજ્ય અને જાહેર સંસ્થાઓ મોડેલ નોકરીદાતા તરીકે કેટલીક પોસ્ટ્સ ખાસ કરીને ઓછી લાયકાત ધરાવતા ઉમેદવારોને રોજગારીની તક આપવા માટે અનામત રાખી શકે છે.
બેન્ચે વધુમાં નોંધ્યું કે ઉચ્ચ લાયકાત છુપાવીને આવી નોકરી મેળવવી અન્ય યોગ્ય ઉમેદવારોના અધિકારોનું હનન છે. જાહેર રોજગારમાં દરેક ઉમેદવારને નિર્ધારિત લાયકાતના આધારે સમાન તક મળવી જોઈએ.
સુપ્રીમ કોર્ટે (Supreme Court)પોતાના અગાઉના ‘જોમોન કેકે વિરુદ્ધ શાજીમોન પી. અને અન્ય’ કેસના ચુકાદાનો ઉલ્લેખ કરતાં જણાવ્યું કે માત્ર વધુ લાયકાત ધરાવવાથી કોઈ ઉમેદવારને દરેક પ્રકારની નોકરી પર દાવો કરવાનો અધિકાર મળતો નથી.
આ સાથે કોર્ટે બેંક મેનેજમેન્ટ દ્વારા કર્મચારીને બરતરફ કરવાનો નિર્ણય યોગ્ય ગણાવ્યો અને અપીલ મંજૂર કરી.
